बलिउडको पहिलो ‘सुपर स्टार’ थिए राजेश खन्ना

समाचार

नेपाल लाइभ शुक्रबार, पुस १३, २०८० १३:३५

काठमाडौं– बलिउडमा सत्तरीको दशकमा राजेश खन्ना पहिलो अभिनेताका रूपमा उभिएका थिए। जसलाई दर्शकले ‘सुपर स्टार’ उपाधि दिए।

२९ डिसेम्बर १९४२ मा अमृतसर, पञ्जाबमा जन्मेका जतिन खन्ना उर्फ राजेश खन्नाको बाल्यकालदेखि नै चलचित्रतर्फ झुकाव थियो। उनी अभिनेता बन्न चाहन्थे। यद्यपि उनका बा उनको चाहनाविरुद्ध थिए। खन्नाले आफ्नो करिअरको प्रारम्भिक चरणमा थिएटर गरे।

उनी भारतीय चलचित्र महोत्सवमा सामेल भए र पछि संयुक्त निर्माता संघद्वारा आयोजित अखिल भारतीय प्रतिभा प्रतियोगितामा सहभागी भए। जसमा उनी पहिलो भएका थिए। राजेश खन्नाले सन् १९६६ मा चेतन आनन्दको फिल्म ‘आखरी खत’ बाट आफ्नो सिने करिअर सुरु गरेका थिए। सन् १९६६ देखि १९६९ सम्म राजेश खन्नाले फिल्म उद्योगमा आफ्नो स्थान बनाउन संघर्ष गरे।

निर्माता-निर्देशक शक्ति सामन्तको क्लासिकल फिल्म 'आराधना' मा राजेश खन्नाको अभिनयले चर्चा पाएको थियो। उत्कृष्ट गीत, संगीत र अभिनयले सजिएको यस फिल्मको स्वर्ण जयन्ती सफलताले राजेश खन्नालाई ‘स्टार’को रूपमा स्थापित गर्यो। फिल्म ‘आराधना’ को सफलतापछि खन्ना शक्ति सामन्तको मनपर्ने अभिनेता बने। पछि उनले राजेश खन्नालाई धेरै फिल्ममा काम गर्ने मौका दिए। जसमा ‘कटि पतंग’, ‘अमर प्रेम’, ‘अनुराग’, ‘अजनबी’, ‘अनुरोध’ र ‘आवाज’ आदि पर्छन्।

फिल्म आराधनाको सफलतापछि राजेश खन्नाको छवि रोमान्टिक हिरोको रुपमा बनेको थियो। यो फिल्मपछि, निर्माता र निर्देशकहरूले धेरैजसो फिल्ममा उनको रोमान्टिक छविलाई प्रस्तु गरे। निर्माताहरूले उनलाई कथाको नायकको रूपमा प्रस्तुत गरे। जुन प्रेम सम्बन्धमा आधारित चलचित्र थिए।

सत्तरीको दशकमा लोकप्रियताको शिखरमा पुगेका राजेश खन्नाले हिन्दी फिल्म उद्योगको पहिलो सुपरस्टार हुने अवसर प्राप्त गरे। उनको अभिनयको सबै फ्यान भए पनि उनको क्रेज खासगरी किशोर किशोरीहरूमा निकै उच्च थियो।

एउटा घटनाबारे बलिउडमा सधैं कुरा हुन्छ। एकपटक राजेश खन्ना बिरामी परे, दिल्लीको एक कलेजका केही केटीहरूले उनको पोस्टरमा बरफको झोला राखे ताकि उनको ज्वरो छिट्टै कम होस्। यति मात्र होइन, केटीहरू उनको लागि यति क्रेजी थिए कि आफ्नो रगतले खन्नलाई प्रेम पत्र लेखेर पठाउँथे।

सत्तरीको दशकमा राजेश खन्नामाथि रोमान्टिक भूमिका मात्र निभाउन सक्ने आरोप लाग्न थाल्यो। निर्माता-निर्देशक ऋषिकेश मुखर्जीले राजेश खन्नालाई यो छविबाट बाहिर निकाल्न मद्दत गरे। र १९७२मा 'बावर्ची' जस्तो कमेडी फिल्म निर्माण गरे, जसले सबैलाई छक्क पार्यो। सन् १९७२ मा रिलिज भएको फिल्म ‘आनंद’ मा राजेश खन्नाको अभिनयको नयाँपन देखियो। ऋषिकेश मुखर्जी निर्देशित यस फिल्ममा राजेश खन्ना एकदमै नयाँ शैलीमा देखिएका थिए।

सन् १९६९ देखि १९७६ सम्मको सफलताको स्वर्णिम कालमा राजेश खन्नाले काम गरेका अधिकांश चलचित्र हिट साबित भए तर अमिताभ बच्चनको आगमनपछि उनका फिल्महरू फ्लप हुन थाले।

अभिनयको एकरूपताबाट बच्न, आफूलाई चरित्र अभिनेताको रूपमा स्थापित गर्न र दर्शकको माया पुनः प्राप्त गर्न राजेश खन्नाले अस्सीको दशकदेखि विभिन्न भूमिकामा आफूलाई प्रस्तुत गरेका थिए। यसमा सन् १९८० मा रिलिज भएको फिल्म ‘रेडरोज’ विशेष उल्लेखनीय छ। यस फिल्ममा राजेश खन्नाले नकारात्मक भूमिका खेलेर दर्शकलाई रोमाञ्चित बनाएका थिए।

राजेश खन्नाले पनि सन् १९८५ मा रिलिज भएको फिल्म ‘अलग अलग’ मार्फत फिल्म निर्माणको क्षेत्रमा प्रवेश गरेका थिए। राजेश खन्नाको सिने करिअरमा अभिनेत्री मुमताज र शर्मिला टैगोरसँग उनको जोडी निकै रुचाइएको थियो। राजेश खन्नाले आफ्नो फिल्मी करिअरमा तीन पटक फिल्मफेयर अवार्ड पाएका थिए।

फिल्महरूमा धेरै भूमिका खेलेपछि, राजेश खन्नाले समाज सेवाको लागि राजनीतिमा पनि प्रवेश गरे र १९९१मा नयाँ दिल्ली लोकसभा सीटबाट निर्वाचित भए। राजेश खन्नाले आफ्नो चार दशक लामो फिल्म करिअरमा करिब १ सय २५ फिल्ममा काम गरे। आफ्नो रोमान्सको जादुले दर्शकलाई मन्त्रमुग्ध पार्ने रोमान्सका राजाले सन् २०१२ जुलाई १८ मा यो संसार छाडे।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

काठमाडौं महानगरले गौशाला धर्मशाला सञ्चालन गर्न जिल्ला प्रशासनसँग माग्यो सुरक्षा, मारवाडी सेवा समितिले पशुपतिको जग्गामा गिद्दे नजर लगाएको कोषको आरोप

जापानमा निर्वाचन अभियान सुरु

सबै नेपाली शान्ति सैनिक सुरक्षित छन्ः सेना