कलाकार पी सिंहका कलाकृति कतार अन्तर्राष्ट्रिय कला महोत्सवमा

प्रवास

नेपाल लाइभ बुधबार, मंसिर ६, २०८० १६:२०

दोहा- कतारको दोहामा जारी कतार अन्तर्राष्ट्रिय कला महोत्सवमा नेपालयात्रा कला प्रदर्शनीको छैटौं संस्करण ‘कतार कन्भास २०२३’ प्रदर्शन भै रहेको छ।

मंगलबारबाट सुरु भएको कला महोत्सवमा कलाकार पी सिंहका एक्रिलिक र वाटर कलरका चित्रहरू राखिएका छन्, जसमा नेपालको प्राकृतिक दृश्य, वन्यजन्तु लगायत नेपालका वास्तुशिल्पका दृष्टिले धनी प्राचीन मन्दिर र गुम्बाहरूलाई कलात्मक रूपमा चित्रण गरिएको छ।

यसअघि युके र नेपालका विभिन्न ठाउँमा कला प्रदर्शनी गरिसकेका कलाकार पी सिंह आफ्ना चित्रहरूमार्फत् नेपाली संस्कृतिको प्रवर्द्धन गर्न प्रतिबद्ध छन्।

कलाकार सिंहले नेपाली कलाकृतिहरूप्रति दर्शकहरूको उत्साहजनक प्रतिक्रिया प्राप्त भइरहेको बताए। उनले भने, ‘कतारमा आफ्नो कलाकृतिमार्फत् नेपालको प्रतिनिधित्व गर्न पाउँदा म निकै हर्षित छु। पाँच दिने प्रदर्शनीमा सयौं आगन्तुकहरुलाई नेपाली कला, संस्कृति र परिदृश्य देखाउन पाउनु साँच्चै रोमाञ्चक छ।’

399972415_1261755177834066_7363537865206820511_n-1700649284.jpg

कतार कला महोत्सवमा पी सिंहकी छोरी रोस्लिन सिंहले पनि आफूले सिर्जना गरेका केही पानी रंग र पेन्सिल कलाकृतिहरू प्रदर्शन गर्दैछिन्। बेलायतमा बायोमेडिकल इन्जिनियरिङ अध्ययन गरिरहेकी १९ वर्षीया सिंहले भनिन्, ‘यस कला महोत्सवमा नेपालसम्बन्धी मेरा केही कलाकृतिहरू प्रदर्शन गर्न पाएकोमा म निकै उत्साहित छु।’

कतार इन्टरनेशनल आर्ट फेस्टिभल २० देखि २५ नोभेम्बर २०२३ सम्म चल्ने छ, जसमा ६५ भन्दा बढी देशका कलाकारहरूको सहभागिता रहेको छ। ‘हामी नेपालका कलाकृतिहरूको प्रतिनिधित्व देख्न पाउँदा खुसी छौं,’ उक्त फेस्टिभलकी प्रमुख रश्मी अग्रवालले भनिन्, ‘उदीयमान प्रतिभाहरू, स्थापित मास्टरहरू, कला विशेषज्ञहरू, आलोचकहरू, र शिक्षाविद्हरूलाई एकै ठाउँमा ल्याउँदै, मूर्तिकला, चित्रकला, र डिजिटल र मूर्तिकला स्थापनाहरूसहित कलात्मक विषयहरूको व्यापक दायरा प्रदर्शन गर्दै महोत्सवले विश्वव्यापी प्लेटफर्मको रूपमा काम गरिरहेको छ।’

प्रदर्शनीको अवलोकन गरेपछि कतारका लागि नेपाली राजदूत डा नरेश विक्रम ढकालले भने, ‘कतार कला महोत्सवमा नेपालको प्रतिनिधित्व देख्दा गर्व लागेको छ। म यो प्रयासको साँच्चै प्रशंसा गर्छु।’ लन्डनको एसएमबीसी बैंकमा कार्यरत सफ्टवेयर इन्जिनियर सिंह आफ्नो खाली समयमा जोशका साथ चित्रहरु कोर्छन्। उनले विकास गरेका ‘टाइपशाला’ ‘टाइपिङ ट्युटर,’ Thamel.com, ‘नेपाली युनिकोड’ र ‘राजमार्ग’ रोड इन्जिनियरिङ लगायतका सफ्टवेयर निकै लोकप्रिय छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

आचारसंहिता उल्लङ्घन गर्ने ४३ युट्युव च्यानललाई कारवाही गर्न प्रहरीमा सिफारिस : ३ अनलाइन कालोसूचीमा

सिन्धुलीमा बस दुर्घटना, दुई जनाको घटनास्थलमै मृत्यु

इजरायलविरुद्धको आक्रमणका लागि इरानी कमाण्डर सम्मानित