भन्सार प्रमुखको बयान: ९ किलो सुन लुकाइएको भेप छुटाउन राहुल महराले पटक–पटक दबाब दिए

सुरक्षा/अपराध

नेपाल लाइभ बुधबार, असोज २४, २०८० १२:५९

काठमाडौं– विद्युतीय चुरोट (भेप)मा लुकाएर भएको सुन तस्करी प्रकरणको अर्को (पुरक) अभियोग पनि अदालत टेकेको छ। प्रहरीको केन्द्रीय अनुसन्धान ब्यूरो (सीआईबी)ले गरेको अनुसन्धानअनुसार जिल्ला सरकारी वकिल कार्यालय काठमाडौंले बुधबार काठमाडौं जिल्ला अदालतमा मुद्दा दायर गरेको हो।

दायर मुद्दामा नेपालको समेत नागरिकता भएका भनिएका चिनियाँ मुलका बेल्जिम नागरिक दावा छिरिङलाई मुख्य अभियुक्त बनाइएको छ। यस्तै, दावाका सवारी चालक लोकेन्द्र पौडेल, राहुल महरा, नीमा गुरुङलाई मतियारका रुपमा अभियुक्त बनाइएको छ। राहुल महरा पूर्व सभामुख तथा नेकपा माओवादी केन्द्रका उपाध्यक्ष कृष्णबहादुर महराका छोरा हुन्।

भेपमार्फत् भएको सुन तस्करी प्रकरणमा नेकपा माओवादी केन्द्रका उपाध्यक्ष एवम् पूर्वसभामुख कृष्णबहादुर महरा र उनका छोरा राहुल महराको संलग्नताको पनि ‘प्रमाण’ देखिएको विषय सार्वजनिक भएको थियो। तर सरकारी वकिलले पूर्वसभामुख महराविरुद्ध मुद्दा चलाएन।

भेपमा लुकाएर ल्याएको सुन तस्करीको अनुसन्धानका क्रममा प्रहरीको केन्द्रीय अनुसन्धान ब्यूरोले त्रिभुवन अन्तर्राष्ट्रिय विमानस्थल भन्सार कार्यालयका तत्कालीन प्रमुख अरुण पोखरेलको पनि बयान लिएको थियो। बयानका क्रममा तत्कालीन भन्सार प्रमुख पोखरेलले सुन लुकाएर ल्याइएको भेप रहेको सुटकेस छुटाउन राहुल महराले आफूलाई पटक पटक दबाब दिएको बताएका छन्। साथै उक्त विषयमा पूर्व सभामुख एवम् माओवादी केन्द्रका उपाध्यक्ष कृष्णबहादुर महराले पनि आफूलाई फोन गरेको पोखरेलको बयान छ।

राहुल महराले उक्त भेप लिलामी गरिदिन र उक्त लिलामी आफूहरुकै समुहलाई मिलाइदिन भनेर पटक–पटक फोन गर्ने र कार्यालयमा समेत आएर दबाब दिने गरेको पनि पोखरेलले बयानमा बताएका छन्। पूर्व सभामुख महराले पनि फोन गरेर आफ्नो छोरा राहुल भेट्न आउने र उनले भनेअनुसार सहयोग गरिदिन भनेर भनेको पोखरेलले उल्लेख गरेका छन्।

‘कृष्ण बहादुर महराले मोबाइल नम्बर ९८५१२२४०५५ बाट फोन गरी मेरो छोरा राहुल महरा आउँछ। के रहेछ हेरीदिनु, सहयोग गरिदिनु भनि भनेका थिए,’ पोखरेलले बयानमा भनेका छन्, ‘राहुल महराले मेरो मोबाइल नम्बर ९८४१२९५४१३ मा एसएमएस गरी म राहुल महरा हो। भेटेर कुरा गर्नु छ भनि म्यासेज पठाएको थियो।’

विद्युतीय चुरोट (भेप) दाखिला भएपछि नियमानुसार लिलाम वा नष्ट गर्ने प्रकृया अगाडि बढिरहेको अबस्थामा विभिन्न व्यक्तिहरु मालबस्तु लिलाम प्रकृया अगाडि बढाइदिइ आफूलाई नै सकार गराइदिने बाताबरण बनाइदिनु भनि आफू लगायत कार्यालयका निमित्त प्रमुख बिष्णु प्रसाद पौडेललाई समेत भनेको पोखरेलले बयानमा उल्लेख गरेका छन्।

‘म सँग पहिले चिनजान नभएको, आफूलाई राहुल महरा भनि चिनाउने व्यक्ति मेरो कार्यालयको कार्यकक्षमा आइ, भेटी सो ईलेक्ट्रिक सिगरेटको चाँडो लिलाम गरी मेरो समुहलाई नै दिलाइदिनु भनेका थिए,’ पोखरेले बयानमा भनेका छन्, ‘पटक–पटक गरी ६/७ पटक सोही बिषयलाई लिएर कार्यालयमा दवाब दिन आउने क्रममा एक दिन निज राहुल महरा ३ जनासहित सोही विषयमा कुरा गर्न आउँदा कुरा गर्ने क्रममा नाम थर समेत थाहा नभएका अन्दाजी ५५ वर्षको, मोटो शरीर भएको, उचाइ ५.७ फिट भएको मंगोलियन जस्तो देखिने व्यक्तिले जफत भएको माल बस्तु रहेको सुटकेस हेर्नको लागि अनुरोध गरेका थिए।’

‘गोदाममा रहेको मालबस्तु किन हेर्नु पर्‍यो, तपाईंहरु पटक–पटक किन यो कामको लागि आउनुभएको?’ भनेर आफूले भनेको उनले बयानमा उल्लेख गरेका छन्।

‘सुटकेशमा कुनै शंकास्पद मालबस्तु रहेको छ कि! यसमा प्रहरीले समेत अनुसन्धान गर्ने कुरा रहेको छ कि भनेर शंका लागेको र पटक पटक दबाब दिनुको नियत बुझ्न पनि प्रहरीलाई अनुरोध गरेको थिएँ,’ उनले बयानमा भनेका छन्, ‘आयोजनाको लागि ईलेक्ट्रिक सिगरेट चाहिने भए बजारमा अरु पनि ईलेक्ट्रिक सिगरेट पाउन सकिने भन्दा निजले होईन यो जफत भएको ईलेक्ट्रिक सिगरेट नै चाहिन्छ भनि जवाफ समेत दिएको थिए। सोपश्चात कुनै खास ईलेक्ट्रिक सिगरेटको लागि उनीहरुको अत्यधिक चासो अस्वाभाविक लागेको थियो।’

त्यसपछि सो मालबस्तुको सम्बन्धमा थप छानबिन गर्ने क्रममा गोदाममा रहेको ईलेक्ट्रिक सिगरेट साटिएको अबस्थामा फेला परेको पोखरेलले बयानमा बताएका छन्। ईलेक्ट्रिक सिगरेट साटिएको अवस्थामा फेला परेपछि विस्तृत अनुसन्धान गर्नुपर्ने देखिएकोले र तत्कालै प्रमुख भन्सार प्रशासकको हैसियतले थप अनुसन्धान कारबाहीको लागि सीआईबीलाई पत्राचार गरेको पोखरेलले बयानमा बताएका छन्।

फ्लाई दुबईको जहाजमार्फत् गत पुस १० गते चिनियाँ नागरिक लि ह्यानसङ्गले सुटकेशमा लुकाएर भेपभित्र सुन ल्याएका थिए। सुनले भरिएको उक्त सुटकेश संकास्पद देखिएपछि विमानस्थल भन्सारले नियन्त्रणमा लिएको थियो।

भन्सारले पासपोर्टसमेत लिएर चिनियाँ नागरिक होसाङलाई छाडेको थियो। भोलिपल्टै चिनियाँ नागरिक होसाङले आफ्नो पासपोर्ट फिर्ता लिएर उनी स्वदेश फर्किका थिए।

होसाङबाट बरामद भएका २ वटा सुटकेश आगमन कक्ष छेउकै कुनामा थिए। पछि उक्त सुटकेशभित्र भेपको रुपमा सुन रहेको खुलेपछि त्यहाँबाट गायव पारेर बेचिएको खुलेको थियो।

यो प्रकरणमा यसअघि नै सीआईबीले विमानस्थल भन्सारका नायव सुब्बा २७ वर्षीय रेवन्त खड्का, सिन्धुपाल्चोकको सुनकोशी गाउँपालिका–६ घर भएका ३२ वर्षीय भन्सार एजेन्ट दिनेश बस्नेत, सुनसरीको धरान उपमहानगरपालिका–२ घर भइ काठमाडौंको न्यूरोडमा घडी पसल सञ्चालन गर्दै आएका वेदप्रकाश अग्रवाल, भारतको महाराष्ट्रका ३९ वर्षीय व्यापारी साहेब राव पाण्डुरङ मरगले, सिन्धुपाल्चोककै सुनकोशी–६ का ३२ वर्षीय अमृत कार्की, पोखरा महानगरपालिका–४ का २२ वर्षीय पूर्व सुरक्षागार्ड निर्मलकुमार विकलाई पक्राउ गरेर मुद्दा दायर गरेको थियो। उनीहरु पुर्पक्षमा अहिले कारागारमा छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

घरायसी विवादका क्रममा श्रीमतीको गोली हानी हत्या, श्रीमान पक्राउ

विपिनको रिहाइबारे कतारका विदेश राज्यमन्त्रीसँग परराष्ट्रमन्त्री राणाको फोनवार्ता

गाजा वार्ताको ‘अन्तिम चरण’ मङ्गलबार कतारमा सुरु हुने