काठमाडौं– विद्युतीय चुरोट (भेप)मा लुकाएर ल्याइएको ९ किलो सुन तस्करी प्रकरणमा बुधबार जिल्ला सरकारी वकिल कार्यालय काठमाडौंले काठमाडौं जिल्ला अदालतमा मुद्दा दर्ता गरेको छ। प्रहरीको केन्द्रीय अनुसन्धान ब्यूरो (सीआईबी)ले गरेको अनुसन्धानअनुसार पुरक अभियोजनमार्फत् अदालतमा मुद्दा दर्ता गरिएको छ।
भेपमार्फत् भएको ९ किलो सुन तस्करीको पुरक अभियोजनमा सरकारी वकिल कार्यालय काठमाडौंले ४ जनालाई प्रतिवादी बनाएको छ। नेपालको समेत नागरिकता भएका भनिएका चिनियाँ मुलका बेल्जिम नागरिक दावा छिरिङलाई मुख्य अभियुक्त बनाइएको छ। बेल्जिम नागरिक दावा ६० किलो सुन तस्करी प्रकरणको पनि मुख्य अभियुक्त हुन्।
भेपमार्फत् भएको सुन तस्करी प्रकरण सतहमा आएपछि त्रिभुवन अन्तर्राष्ट्रिय विमानस्थलको भन्सारबाट जाँचपास भइसकेको अवस्थामा ६० किलो बढी सुन बरामद भएको थियो। मोटरसाइकलको ब्रेक प्याडका रुपमा भित्रिएको सुन तस्करीमा पनि दावाको मुख्य भूमिका रहेको अनुसन्धानबाट खुलेको थियो।
यस्तै, दावाका सवारी चालक लोकेन्द्र पौडेल, राहुल महरा, नीमा गुरुङलाई मतियारका रुपमा अभियुक्त बनाइएको छ। राहुल महरा पूर्व सभामुख तथा नेकपा माओवादी केन्द्रका उपाध्यक्ष कृष्णबहादुर महराका छोरा हुन्।
भेपमार्फत् भएको सुन तस्करी प्रकरणमा नेकपा माओवादी केन्द्रका उपाध्यक्ष एवम् पूर्वसभामुख कृष्णबहादुर महरा र उनका छोरा राहुल महराको संलग्नताको पनि ‘प्रमाण’ देखिएको विषय सार्वजनिक भएको थियो। तर सरकारी वकिलले पूर्वसभामुख महराविरुद्ध मुद्दा चलाएन।
सीआईबीको अनुसन्धानमा दावाकै योजनामा सुन आयात भएको देखिएपछि उनलाई मुख्य अभियुक्त करार गरिएको हो। दावाले भन्सार ऐन, २०६४ को दफा ५७ को उपदफा (१) बमोजिमको कसुर गरेको अभियोगपत्रमा दाबी गरिएको छ। दफा ५७ को (१) मा कसैले कुनै मालवस्तु चोरी निकासी वा चोरी पैठारी गरेमा वा गर्न प्रयत्न गरेमा वा खास बाटोबाट मात्र निकासी वा पैठारी गर्न पाउने गरी दफा ३ बमोजिमको बाटो तोकिएकोमा सो बाटोबाट बाहेक अन्यत्रबाट निकासी पैठारी गरेमा वा गर्न प्रयत्न गरेमा मालवस्तु जफत गरी कारबाही गर्न सकिने उल्लेख छ। जसअनुसार ९ किलो सुनको बिगो ५ करोड रुपैयाँभन्दा बढी भएकाले ५ वर्षसम्म कैद हुनुपर्ने मागदाबी गरिएको छ।
राहुलसहित ३ जनाको हकमा भने माथि उल्लेखित दफा ५१ को (१) अनुसारको कसुर गर्न सहयोग गरेको उल्लेख गर्दै मुद्दा दर्ता गरिएको छ। राहुलसहित ३ जना प्रतिवादीको हकमा भनिएको छ, ‘भन्सार ऐनको दफा ५७ (१) बमोजिमको कसुर कार्य गर्नका लागि सोही ऐनको दफा ५७ को उपदफा (३) बमोजिमको कसुर गरेको पाइयो।’
भन्सार ऐनको दफा ५७ को उपदफा ३ मा ‘दफा ५७ को (१) बमोजिमको कसुर गर्न मद्दत गर्ने वा दुरुत्साहन दिने व्यक्तिलाई भन्सार तथा अदालतले कसुरदारलाई सरह सजाय गर्न सक्नेछ’ भन्ने व्यवस्था गरिएको छ।
राहुलसहित ३ जनालाई मतियार तथा सहयोगीको रुपमा करार गरिए पनि अदालतले मुख्य कसुरदारलाई सरह सजाय गर्न सक्ने बाटो भने खुल्ला छ।
योसँगै चारै जना प्रतिवादीलाई संगठित अपराधको दफा ९ को खण्ड (क) बमोजिमको थप सजाय पनि मागदाबी गरिएको छ। जसअनुसार मुख्य मुद्दा अर्थात् मुख्य अभियुक्त र मतियारको रुपमा उनीहरुलाई जति सजाय हुन्छ त्यसको आधा सजाय हुनसक्ने व्यवस्था छ।
त्यसैगरी दावाको हकमा भने मुलुकी फौजदारी अपराध संहिताको कसुर पनि आकर्षित गरिएको छ। दावाले उक्त संहिताको दफा १५२ को (१) मा उल्लेख भएको ‘आपराधिक विश्वासघात गर्न वा गराउन नहुने’ व्यवस्था विपरीतको कसुर गरेको दाबी गरिएको छ। यस्तो कसुर गर्ने व्यक्तिलाई ३ वर्षसम्म कैद वा ३० हजार रुपैयाँसम्म जरिवाना वा दुबै सजाय हुनसक्ने व्यवस्था छ।
अभियोग पत्रका उल्लेख गरिएको कसुरअनुसार मुख्य अभियुक्त दावाविरुद्ध सबै गरेर १० वर्ष ६ महिना कैद सजाय मागदाबी भएको छ। यस्तै, अन्य ३ जना अभियुक्त राहुल महरा, दावाका गाडी चालक पौडेल र नीमा गुरुङविरुद्ध अधिकतम् ७ वर्ष ६ महिना कैद सजाय मागदाबी भएको छ।
फ्लाई दुबईको जहाजमार्फत् गत पुस १० गते चिनियाँ नागरिक लि ह्यानसङ्गले सुटकेशमा लुकाएर भेपभित्र सुन ल्याएका थिए। सुनले भरिएको उक्त सुटकेश संकास्पद देखिएपछि विमानस्थल भन्सारले नियन्त्रणमा लिएको थियो।
भन्सारले पासपोर्टसमेत लिएर चिनियाँ नागरिक होसाङलाई छाडेको थियो। भोलिपल्टै चिनियाँ नागरिक होसाङले आफ्नो पासपोर्ट फिर्ता लिएर उनी स्वदेश फर्किका थिए।
होसाङबाट बरामद भएका २ वटा सुटकेश आगमन कक्ष छेउकै कुनामा थिए। पछि उक्त सुटकेशभित्र भेपको रुपमा सुन रहेको खुलेपछि त्यहाँबाट गायव पारेर बेचिएको खुलेको थियो।
यो प्रकरणमा यसअघि नै सीआईबीले विमानस्थल भन्सारका नायव सुब्बा २७ वर्षीय रेवन्त खड्का, सिन्धुपाल्चोकको सुनकोशी गाउँपालिका–६ घर भएका ३२ वर्षीय भन्सार एजेन्ट दिनेश बस्नेत, सुनसरीको धरान उपमहानगरपालिका–२ घर भइ काठमाडौंको न्यूरोडमा घडी पसल सञ्चालन गर्दै आएका वेदप्रकाश अग्रवाल, भारतको महाराष्ट्रका ३९ वर्षीय व्यापारी साहेब राव पाण्डुरङ मरगले, सिन्धुपाल्चोककै सुनकोशी–६ का ३२ वर्षीय अमृत कार्की, पोखरा महानगरपालिका–४ का २२ वर्षीय पूर्व सुरक्षागार्ड निर्मलकुमार विकलाई पक्राउ गरेर मुद्दा दायर गरेको थियो। उनीहरु पुर्पक्षमा अहिले कारागारमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1738557849.jpg)
-1764146706.png)
-1763721444.png)
-1765273665.jpg)
