काठमाडौं– यो वर्षका लागि सबैभन्दा प्रतिक्षित स्मार्टफोन आइफोन १५ सार्वजनिक भएको छ। अमेरिकी बहुराष्ट्रिय कम्पनी एप्पलले आइफोन १५ र १५ प्रो सिरिजका फोनहरु सार्वजनिक गरेको हो। आइफोन १५ को प्रतिक्षामा रहेकाहरुलाई खुसीको खबर छ कि यो डिभाइसमा युएसबी–सी पोर्ट उपलब्ध छ।
एप्पलले अघिल्लो वर्ष नै आफ्ना फोनको चर्जर युएसबी–टाइप–सी हुने घोषणा गरेको थियो। युरोपियन युनियनको नयाँ नियमका कारण पनि एप्पल आइफोन १५ मा युएसबी–सी चार्जर उपलब्ध गराउन ‘बाध्य’ भएको हो।
आइफोन १५, १२८ जीबी स्टोरेज क्षमता भएको फोनको मूल्य अमेरिकी डलर ७९९ बाट सुरु हुन्छ। आइफोन १५ प्लस, १२८ जीबी भर्सनको को मूल्य ८९९ अमेरिकी डलरबाट सुरु हुने बताइएको छ।
आइफोन १५ प्रोको मूल्य ९९९ अमेरिकी डलरबाट सुरु हुने बताइएको छ। जुन गत वर्ष सार्वजनिक आइफोन १४ प्रोको मूल्य बराबर नै हो। आइफोन १५ प्रो म्याक्सको मूल्य १ हजार १९९ डलरबाट सुरु हुने बताइएको छ। जुन अघिल्लो वर्ष सार्वजनिक भएको आइफोन १४ प्रो म्याक्सभन्दा १०० डलर बढी हो।
के छ नयाँ?
आइफोन प्रयोगकर्ताका लागि युएसबी–सी चार्जर एउटा नयाँ र खुसीको कुरा हो। तर यसको डिजाइनलाई लिएर भने धेरै अपेक्षा नगर्दा पनि हुन्छ। किनभने आइफोन १४ को तुलनामा आइफोन १५ को डिजाइनमा खासै केही परिवर्तन छैन। आइफोन १५ र १५ प्लसमा क्रमश ६.१ इन्च र ६.७ इन्चको डिस्प्ले दिइएको छ।
आइफोन १५ का सबै मोडलहरु डाइनामिक आइसल्याण्डका साथ उपलब्ध हुनेछन्। यो एउटा पिल–सेप्ड कटआउट हो, जुन पहिलोपटक आइफोन १४ र आइफोन १४ प्रो म्याक्समा प्रयोग भएको थियो।
आइफोन १५ मा पनि अर्गानिक लाइट–एमिटिङ डायोड (ओलिड) सुपर रेटिना डिस्प्ले उपलब्ध छ। जसले १६०० नट्सको ब्राइटनेसका साथ डोब्ली भिजनलाई सपोर्ट गर्छ। सनलाइटका बेला फोनको पिक–ब्राइटनेस २ हजार निट्स पुग्छ, जुन आइफोन १४ को तुलनामा दोब्बर बढी हो।
आइफोन १५ मा गरिएको सबैभन्दा ठूलो परिवर्तन युएसबी–सी नै हो। त्यसका अतिरिक्त क्यामेरामा पनि केही सुधारहरु गरिएको छ। मुख्य क्यामेरा सेन्सर ४८ मेगापिक्सलको छ। जबकि आइफोन १४ मा १२ मेगापिक्सलको मुख्य क्यामेरा सेन्सर थियो। फोनमा १२ मेगापिक्सलको अल्ट्रावाइड सेन्सर पनि छ। जसले टेलिफोटो र पोट्रेट मोडमा धेरै सुधारको अनुभव उपलब्ध गराउनेछ।
एप्पलले आइफोन १५ को क्यामेरामा नाइट मोड, लाइभ फोटो र एक्सन मोडमा पनि सुधार गरेको छ। तपाईं सेल्फीको फ्यान हो भने आइफोन १५ को फ्रन्ट क्यामेराले अटोफोकस र पोट्रेट लाइटिङको सुविधा उपबल्ध गराउँछ।
एप्पलले आइफोन १५ को चिप ए–१६ मा पनि सुधार गरेको छ। यही चिप गत वर्ष सार्वजनिक भएको आइफोन १४ प्रो मोडलमा पनि उपलब्ध थियो। एप्पलले ‘अल–डे ब्याट्री लाइफ’को पनि प्रतिबद्धता जनाएको छ।
एप्पल वाच सिरिज ९ मा जस्तै आइफोन १५ मा सेकेन्ड–जेनेरेसन अल्ट्रा वाइडब्यान्ड चिप उपलब्ध छ। जसले भविष्यमा सार्वजनिक हुने अन्य डिभाइससँगको कनेक्टिभिटीलाई सुधार गर्नेछ।
आइफोन १५ मा भएका परिवर्तन बुँदागत रुपमा:
- आइफोन १५ र १५ प्लस ५ वटा रङ (कलर भेयरियन्ट): पिङ्क, यल्लो, ग्रीन, ब्लु र ब्ल्याकमा उपलब्ध हुनेछ।
- आइफोन १५ प्रो मोडलको फोन ब्ल्याक टाइटेनियम, ह्वाइट टाइटेनियम, ब्लु टाइटेनियम र न्याचुरल टाइटेनियम फिनिसमा उपलब्ध हुनेछ।
- आइफोन १५ प्रो ए–१७ बायोनिक चिपका साथ उपलब्ध हुनेछ, जसले फोनको स्पिड र समग्र पर्फरमेन्समा सुधार गरेको एप्पलको दाबी छ।
- आइफोन १५ का सबै मोडलमा एप नोटिफिकेशनका लागि ‘डाइनामिक आइसल्याण्ड’ हुनेछ, जुन गत वर्ष सार्वजनिक भएका प्रो र म्याक्स डिभासमा उपलब्ध थियो।
- फोन २ वटा डिस्प्ले साइजमा उपलब्ध हुनेछ एउटा ६.१ इन्चमा र अर्को ६.७ इन्चमा।
- आइफोन १५ मा क्यामेराको गुणस्तरमा सुधार गरिएको छ, मुख्य क्यामेरा सेन्सर ४८ मेगापिक्सलको छ।
- र, सबैभन्दा नोटिसेबल परिवर्तन चार्जिङ पोर्टको नै हो। आइफोन १५ मा युएसबी टाइप सी चार्जर उपलब्ध हुनेछ। यद्यपि एन्ड्रोइडका फोनमा उपलब्ध हुने टाइप सी चार्जरले आइफोन १५ का डिभाइसहरु चार्ज गर्न सकिनेछ भन्ने कुनै ग्यारेन्टी छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
