जकार्ता (इन्डोनेसिया) : आसियान राष्ट्र इन्डोनेसियाले १८औं एसियाली खेलकुद (एसियाड)को उद्घाटन भव्य बनाउने तयारी गरेको छ।
शनिबार सेन्ट्रल जकार्ताको गेलोरा बुङ कार्नो रंगशालामा एसियाडको उद्घाटन समारोह हुनेछ। उद्घाटन समारोहमा नेपालसहित ४५ देशका खेलाडी, प्रशिक्षक, अफिसियल र अतिथी सहभागी हुनेछन्।
उद्घाटन इन्डनेसियाका राष्ट्रपति जोकोइ विडोडोले गर्नेछन्। उद्घाटन समारोह नेपाली समय अनुसार साँझ सवा ६ बजे सुरु हुनेछ।
उद्घाटन समारोहलाई रंगशालामा उपस्थित ७६ हजार दर्शकले प्रत्यक्ष अवलोकन गर्नेछन्। उद्घाटन समारोहमा सहभागीको टिकट शुक्रबार नै बिक्रि भइसकेको छ। समारोहमा इन्डोनेसियाका चर्चित कलाकारहरुले आफ्नो प्रस्तुति दिनेछन्। अन्गुन, राइसा, टुलुस, इडो कोन्डोलोगिट लगायतले आफ्नो प्रस्तुति दिने बताइएकाे छ।
उद्घाटन समारोहको मञ्चकाे लम्बाई १ सय २० मिटर, चौडाई ३० मिटर र उचाई २६ मिटरको हुनेछ। मञ्चको दृश्य पहाडको जस्तै हुनेछ भने इन्डोनेसियाका रुख पनि देखिनेछन्। यस्तै ४ हजारले आफ्नो नृत्य प्रस्तुत गर्नेछन्। यसका लागि महिनौं अभ्यास गरिएको थियो।
नेपालका ८० सहभागी हुने
उद्घाटन समारोहमा नेपालबाट खेलाडी, प्रशिक्षक, अफिसियल र अतिथी गरी ८० जना सहभागी हुनेछन्। नेपाली टोलीको नेतृत्व खेलकुद मन्त्री जगतबहादुर विश्वकर्माले गर्नेछन्। यस्तै गरी एसियाडमा नेपालका सेभ दि मिसन तथा राष्ट्रिय खेलकुद परिषदका सदस्यसचिव केशव कुमार विष्ट लगायत पदाधिकारी हुनेछन्। नेपालको खेलाडीको नेतृत्व भारोत्तोलनका कमलबहादुर अधिकारीले गर्नेछन्। मार्चपासमा जकार्तामा रहेका खेलाडी सहभागी हुनेछन्।
४५ देशबीच भिडन्त
एसियाडको इतिहासमा पहिलो पटक दुई शहरमा एसियाड आयोजना हुनेछ। दोस्रो पटक एसियाड गर्न लागेको इन्डोनेसियाले जकार्ता र पालेम्वाङमा खेलहरु सञ्चालन गर्ने व्यवस्था मिलाएको छ। इन्डोनेसियाले सन् १९६२ मा पनि एसियाड आयोजना गरेको थियो।
एसियाडमा ४५ देशका ११ हजार ५ सय खेलाडी सहभागी हुनेछन्। ४० खेलका ४६५ इभेन्ट्समा प्रतिस्पर्धा हुनेछ।
प्रतियाेगितामा इन्डोनेसियाका सर्वाधिक ९ सय ५१ खेलाडीले प्रतिस्पर्धा गर्नेछन्। चीनका ८ सय ७९ खेलाडी छन्। थाइल्यान्डका ८ सय १६, दक्षिण कोरियाका ८ सय ७, चाइनिज ताइपेइका ५ सय ५८ र भारतका ५ सय ७२ खेलाडी सहभागी हुनेछन्।
एसियाडमा नेपालको तर्फबाट विभिन्न २९ खेलका खेलाडी, प्रशिक्षक, व्यवस्थापक, अफिसियल गरी जम्मा २ सय ८५ जना सहभागी हुँदैछन्। जसमा १८५ खेलाडी (पुरुष १२९ र महिला ५६), प्रशिक्षक ४८, व्यवस्थापक २४, अफिसियल २७ र दोभाषे १ रहेका छन्।
नेपालले सहभागिता जनाउने २९ खेलमध्ये २३ खेल जकार्ता र बाँकी ६ खेल पालेम्वाङमा हुनेछ।
इन्डोनेसियाको राजधानी जकार्ता र पालेम्वाङ सहरमा हुने एसियाडमा एसियाका नेपालसहित ४५ देशको सहभागिता हुँदैछ। नेपालले आर्चरी, एथलेटिक्स, बास्केटबल (थ्री अन थ्री), ब्याडमिन्टन, बक्सिङ, फेन्सिङ, गोल्फ, जुडो, कराते, कबड्डी, पौडी, तेक्वान्दो, टेबलटेनिस, भलिबल, भारोत्तोलन, उसु, कुराँस, पेनकेक सिलात, कुस्ती, स्क्वास, साइक्लिङ, फुटबल, प्याराग्लाइडिङ, लनटेनिस, सुटिङ, ट्रायथलन, सेपाकताक्रो, स्पोर्ट्स क्लाम्बिङ र स्केटबोर्डमा सहभागिता जनाउदै छ । यी खेल मध्ये लनटेनिस, सुटिङ, ट्रायथलन, सेपाकताक्रो, स्पोर्ट्स क्लाम्बिङ र स्केटबोर्ड पालेम्वाङमा हुनेछ भने बाँकी जकार्तामा हुनेछ।
दुई संस्करण बाहेक सबै एसियाडमा सहभागिता जनाएको नेपालले हालसम्म १ रजत र २२ कास्य गरी २३ पदक जितेको छ । नेपालले १९५४ मा फिलिपिन्सको मनिलामा भएको दोश्रो संस्करण र १९६२ मा इन्डोनेसियाकै जकार्तामा भएको चौथो संस्करणमा भाग लिएको थिएन। नेपालले हालसम्म तेक्वान्दोबाट १ रजत र १३ कास्य, बक्सिङबाट ६ कास्य तथा करातेबाट ३ कांस्य जितेको छ। १९८६ को सिओल एसियाड नेपालले पहिलो पटक पदक प्राप्त गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768291693.png)
-1764146706.png)
