जाकार्ता (इन्डोनेसिया)- चारैतिर झकिझकाउ। साँझमा बत्तीका रंगीन प्रकाशले रंगशालाको सौन्दर्य उस्तै मनमोहक। लहरै गाडिएका एसियाडमा सहभागी हुने हरेक देशका फरफरक झन्डा।
बिहीबार साँझ इन्डोनसियाको राजधानी जाकार्तास्थित गेलोरा बुङ कार्नो रंगशाला पुग्दाको दृश्य हो यो। यही रंगशालामा शनिबार १८औं संस्करणको एसियाली खेलकुद (एसियाड) प्रतियोगिताको उद्घाटन हुँदैछ। एसियाका नेपालसहित ४५ देशले विभिन्न ४२ खेलमा प्रतिस्पर्धा गर्दैछन्।
नेपालले यहाँ २९ खेलमा भाग लिएको छ। जहाँ जसमा १८५ खेलाडी (पुरुष १२९ र महिला ५६) ले प्रतिस्पर्धा गर्दैछन्। उद्घाटन समारोहमा उपलब्ध खेलाडीहरु मार्चपासमा सहभागी हुनेछन्। जहाँ नेपालीको प्रतिनिधित्व गर्दै भारोत्तलनका कमलबहादुर अधिकारीले नेपालको चन्द्र सूर्यअंकित झन्डा बोक्दैछन्।
नेपालको झन्डा बोकेर ४५ देशका खेलाडी तथा अफिसियल समक्ष प्रस्तुत हुन पाउनु गर्वको कुरा भएको कमलले बताए। 'देशको बोक्न झन्डा बोक्न पाउँदाको खुसी शब्दमा बखान गर्न सक्दिनँ,' उनले खुसी व्यक्त गरे।
कमल एसियाडमा भाग लिएका नेपालका खेलाडीमध्ये सिनियर हुन्। उनले जाकार्ता एसियाडमा ७७ केजी तौल समूहमा प्रतिस्पर्धा गर्दैछन्।
सन् २००६ मा श्रीलंकामा आयोजना भएको दसौं दक्षिण एसियाली खेलकुद (साग) मा स्वर्णपदक हासिल गर्दै उनले सनसनी मच्चाएका थिए। नेपाली सेनाका कमलले ६९ केजी तौल समूहमा नेपालका लागि पहिलो स्वर्ण जितेका थिए, साग गेम्सकै इतिहासमा।
त्यसयता उनले ओलम्पिकमा पनि भाग लिए। एसियाडमा लगातार चौथो पटक प्रतिस्पर्धा गर्दैछन्।
गत वर्ष दक्षिण कोरियाको इन्चोनमा एसियन सिनियर कप र एसियन इन्टर क्लब भोरोत्तोलन च्याम्पियनसिपको नाममा दुई अन्तर्राष्ट्रिय प्रतियोगिता आयोजना भएको थियो। यसमा सहभागी भएका उनले ६ वटा पदक (३–३ कास्य) जितेर अर्को कीर्तिमान बनाए। त्यतिबेला उनी ७७ केजीमा उत्रिएका थिए। कमलले ७७ केजी स्न्याचमा १ सय १७ र क्लिन एन्ड जर्कमा १ सय ४० केजीसहित कुल २ सय ५७ केजी तौल उठाए।
सहभागी नेपाली खेल पदाधिकारी
साग गेम्समा स्वर्ण जित्ने एक्लो नेपाली खेलाडीको इतिहास बोकेका कमलले एसियाली स्तरको प्रतियोगितामा पदक जितेको पनि पहिलो थियो।
एक दशकअघि साग गेम्समा ऐतिहासिक पदक जितेपछि उनी एकाएक सेलिब्रिटी बनेका थिए। उनको बाल्यकालको कहानीले अखबारका पाना भरिए।
सानैदेखि गह्रौं कुरा उचाल्ने र भारी बोक्ने काममा छरितो थिए, कमल। उनले पढ्न भन्दा घरको काममा बढी ध्यान दिन्थे।
चितवनस्थित गीतानगरका कमल ०५४ सालमा नेपाली सेनामा भर्ना भए। त्यसको दुई वर्षमै जीवनले नयाँ मोड लियो। उनी त्रिभुवन आर्मी क्लबका लागि छनोट भए। गणमा असजिलो र गाह्रो सामान उचाल्ने काम पनि छिटो र सहज रुपमा गर्थे, कमल।
त्यसैले त्रिभुवन आर्मी क्लबमा उनको नाम सिफारिस हुँदा उनलाई गणकै बलियो सिपाहीको उपमा दिइएको थियो।
तीन वर्षको नियमित प्रशिक्षणपछि कमलले २०५९ सालमा आयोजना भएको राष्ट्रिय प्रतियोगितामा ६२ केजी तौल समूहमा स्वर्ण जिते। त्यसयता उनले भाग लिएको राष्ट्रिय प्रतियोगितामा दोस्रो हुनुपरेको छैन, सधैं स्वर्ण हात पारेका छन्।
कमलले सन् २००६ को साग गेम्सपछि दोहा एसियाडमा सहभागिता जनाए। उनले २०१० को चीनको ग्वान्झाउ र २०१४ को दक्षिण कोरियाको इन्चोन एसियाडमा गरी तीन वटा एसियाडमा भाग लिइसकेका छन्।
सन् २०१० मा बंगलादेशमा आयोजना भएको साग गेम्समा आफ्नो सानो गल्तीका कारण पदक जित्नबाट चुकेका कमल २०१६ मा भारतमा भएको सागमा भने सहभागिता जनाउन पाएनन्। शान्ति सेनाको मिसनमा कंगो गएका कारण उनले भारतमा भएको साग गेम्स गुमाउनुपर्यो।
सन् २००८ को बेइजिङ ओलम्पिकलाई उनी जीवनको अविस्मरणीय क्षण मान्छन्। ‘एउटा खेलाडीका लागि ओलम्पिका भाग लिन पाउनु सबैभन्दा ठूलो कुरा हो। जुन अवसर मैले पनि पाए,’ कमल भन्छन्।
उनी भारोत्तोलन खेलमा पूर्णरुपले समर्पित भएको १९ वर्ष पुगिसकेको छ। यस अवधिमा उनले तीन वटा उमेर समूहमा खेलिसकेका छन्। सुरुमा ५६ केजी, यसपछि ६९ केजी हुँदै अहिले उनी ७७ केजीमा उत्रिन्छन्।
रोचक कुरा, उनी सहभागी तीन वटै उमेर समूहमा उनको नाममा राष्ट्रिय कीर्तिमान छ। ६२ केजीको क्लिन एन्ड जर्कतर्फ उनले कीर्तिमान बनाएका थिए। ६९ केजी र ७७ केजीमा उनको ३–३ वटा राष्ट्रिय कीर्तिमान छ। दुवै तौल समूहमा उनले स्न्याच, क्लिन एन्ड जर्क र कुल गरी ३–३ वटा कीर्तिमान बनाएका हुन्। कमलले एकै पटक २ सय ५० केजी तौल उठाएर कीर्तिमान बनाएका थिए।
४० वटा हिउँदबर्खा बिताएका कमल अझै जोसिला र फूर्तिला देखिन्छन्। उत्साह उस्तै छ। भन्छन्, 'देशका लागि पदक जित्ने भोक अझै मेटिएको छैन।'
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।