काठमाडौं– त्रिभुवन विश्वविद्यालयले स्नातकोत्तर अध्ययनरत शिक्षाशास्त्र संकायका विद्यार्थीबाट अनलाइन कक्षाको नाममा चर्काे शुल्क असुलिरहेको पाइएको छ।
विभिन्न कारणले भौतिक उपस्थितिमा पठनपाठनमा उपस्थित हुन नसकेका विद्यार्थीलक्षित गरेको अनलाइन कक्षा लिइरहेको केन्द्रीय क्याम्पसको शिक्षा संकायले प्रतिविद्यार्थी एक सेमेस्टरको २० हजार शुल्क असुल्ने गरेको तथ्य सार्वजनिक भएको हो। जबकी भौतिक उपस्थितिमा अध्ययन गर्दा प्रतिसेमेस्टर १० हजार शुल्क छ।
विरोधमा उत्रिए विद्यार्थी
अनलाइन पढ्ने विद्यार्थीहरूबाट चर्काे मूल्य लिएकोमा आपत्ति जनाउँदै त्रिभुवन विश्वविद्यालयमा अध्ययनरत विद्यार्थीहरू विरोधमा उत्रिएका छन। बुधबार त्रिविका विद्यार्थीहरूले शिक्षा संकायका प्रमुखलाई भेटेर त्यसको खबरदारी समेत गरे।
त्रिविमा अध्ययनरत नेविसंघ आवद्ध विद्यार्थी नेता विष्णु बडेलाले शिक्षाशास्त्रले अनलाइन कक्षाका नाममा चर्काे मूल्य असुलेको भन्दै आपत्ति जनाए।
‘शिक्षाशास्त्र संकायले अनलाइन कक्षाको नामको चर्काे मूल्य असुलिरहेको छ। त्यस विषयमा शिक्षाशास्त्र संकाय प्रमुख कविराज पोखरेललाई भेटेर आपत्ति जनाएका छौं। अनलाइन पढ्ने विद्यार्थीरुहरूबाट १० हजार बढी शुल्क लिएर विभेद गरिएको छ। तुरुन्तै कि त्यसको कारण पुष्टि गर्नुपर्यो हैन भने तुरुन्तै घटाउन माग गरेका छौं’, उनले भने, ‘एक हप्ताभित्र शिक्षाशास्त्र संकायमा हट्लाइन टेलिफोन राखेर विद्यार्थीलाई सूचना उपलब्ध गराउन पनि माग गरेका छौं।’
अनलाइन कक्षा लिइरहेका विद्यार्थी देवराज गौतमले अनलाइन कक्षाको शुल्क महंगो भएको बताउँदै समायोजन गरिनु पर्नेमा जोड दिए।
शिक्षाशास्त्र प्रमुख पोखरेल भन्छन– शुल्क घट्दैन, बढ्न सक्छ
शिक्षाशास्त्रका प्रमुख कविराज पोखरेलले भने अनलाइन कक्षाको पठनपाठन भौतिक भन्दा महंगो हुनु स्वाभाविक रहेको दाबी गर्छन्। उनी भन्छन, ‘म पनि यस संकायमा भर्खरै आएकाले मलाई पनि थाहा थिएन। गत वर्षदेखि सुरु भएको कार्यक्रम हो। यो शिक्षाशास्त्र कार्यालय, डीन कार्यालयले तोकेको फिस हो। अनलाइन सुविधाजनक र अन्तर्राष्ट्रिय अभ्यास नै हो।’
विद्यार्थीको गुनासोपछि आफूले शिक्षाशास्त्र संकायका डीन चित्रबहादुर बुढाथोकीसँग यसको वास्तविकताबारे बुझेको बताए। अनलाइन कक्षाको विषयमा अन्तर्राष्ट्रिय अभ्यास पनि त्यही भएको र अझै शुल्क कम लिएको शिक्षाशास्त्र संकायका डीन बुढाथोकीको भनाई उदृत गर्दै पोखरेलले बताए।
उनले भने, ‘इन्डियामा मात्रै एउटा सेमेस्टरमा ३५ हजार आईसी लिन्छ। हामीले त २० हजार मात्रै नेपाली लिएको हो। सप्टवेयर किन्न पर्छ। के के कस्ट छ भन्नुहुन्थ्यो। यसबारेमा डीनसाब नै बढी जानकार हुनुहुन्छ।’
यो भन्दा तल फिस नघट्ने र बरु बढ्न सक्ने उनले बताए। पोखरेलले अनलाइन महंगो भएमा भौतिक कक्षामै फर्खिन सुझाव दिएको उल्लेख गरे। हाल ५०÷६० जना विद्यार्थीले अनलाइन कक्षा लिइरहेको बताउँदै उनले अहिले नयाँ भर्ना सुरु भएको र आगामी दिनमा कति हुन्छन् भन्ने कुरा एकिन नभएको बताए।
भौतिक कक्षामा उपस्थित हुन नसक्ने, काममा व्यस्त रहने विद्यार्थीले नै अनलाइन कक्षा लिने कुरा विश्वविद्यालयको रहेको पोखरेलको बुझाइ छ।
अनलाइन पढ्नैपर्छ भनेर कर गरेका छैनौंः डीन
शिक्षाशास्त्र संकायका डीन चित्रबहादुर बुढाथोकीले भौतिक उपस्थितिमा हुने कक्षा भन्दा अनलाइन कक्षा फरक भएको बताए।
उनले अनलाइन कक्षा खासगरि जागिरेहरू र अन्य कुनै कारणले भौतिक रुपमा उपस्थित हुन नसक्नेहरूका लागि भएको उल्लेख गरे। युरोपमा अनलाइन कक्षा लिने विद्यार्थीहरूले १५ हजार डलर तिर्नु परेको बताउँदै उनले यहाँ मात्रै महंगो नभएको दाबी गरे। उनले महंगो भयो भन्ने विद्यार्थीहरूलाई भौतिक कक्षा लिन आउन आग्रह गरे।
‘उहाँहरूलाई अनलाइन पढ भनेर हामीले कर गरेका छैनौं। उहाँहरूकै माग अनुसार अनलाइन कक्षाको व्यवस्था गरेका हौं’, बुढाथोकीले भने।
उनले शिक्षकहरूलाई तालिम दिनु पर्ने, अनलाइन पाठ्यसामग्री बनाउनु पर्ने भएका कारणले अलि महंगो भएको दाबी गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
