रत्ननगर– चितवनको रत्ननगर नगरपालिकामा कर वृद्धि गरिएको विरोधमा सुरु गरिएको रिले अनसन सोमबार पनि जारी छ।
रत्ननगर नगरपालिकाले कर वृद्धि गरेपछि त्यसको विरोधमा नेपाली कांग्रेससहित स्थानीय राजनीतिक दलहरुले सोमबार पनि रिले अनसनलाई निरन्तरता दिएका हुन्। नगरपालिकाले अधिनायकवादी शैलीमा कर थोपर्नेलगायतका काम गरेपछि त्यसको विरोधमा रिले अनसन सुरु गर्नु परेको नेपाली कांग्रेस रत्ननगर नगर समितिका सभापति रुपनराज घिमिरेले जानकारी दिए।
रत्ननगर नगरपलिकाले १ हजार प्रतिशतसम्म कर वृद्धि गरेको भन्दै विभिन्न राजनितिक दलले विरोध गर्दै आएका छन्। उनीहरुले अनसनसँगै नगरपालिकाको राजश्व शाखा समेत बन्द गराएका छन्। नगरपालिकाले कर वृद्धि गरेर आफूहरुलाई मारमा पारेको रत्ननगर नगरपालिका वडा नम्बर ९ का स्थानिय गोपाल शर्माले गुनासो पोखे।
कर वृद्धि विरुद्धको आन्दोलनमा क्षेत्रीय होटल व्यवसायी संघ नेपाल चितवनले समेत ऐक्यवद्धता जनाएको छ।
यता, रत्ननगर नगरपालिकाले भने करको दरमा वृद्धि नभएको तर जग्गाको मुल्याकंन बढेकोले करको रकम बढेको बताउँदै आएको छ। अघिल्लो वर्ष १५ लाख ६१ हजार रुपैयाँ मुल्यांकन भएको जग्गाको अहिले मुल्याकंन बढेर ८६ लाख ९७ हजार पुगेकोले करको रकम बढेको रत्ननगर नगरपालिकाका प्रमुख नारायण वनले बताए।
नगरपालिकाले आन्दोलनरत पक्षहरुसँग वार्ता र सम्वादमार्फत् समस्या समाधान गर्न पनि आग्रह गरेको छ। आन्दोलनरत पक्षसँग वार्ता गरेर समस्या समाधान गर्न आफूहरु तयार रहेको नगरप्रमुख वनले स्पष्ट गरे।
आन्दोलनमा उत्रिएका दलहरुले वृद्धि भएको कर तत्काल फिर्ता हुनुपर्ने माग राखेर आइतबारबाट रिले अनसनको कार्यक्रम सुरु गरेका हुन्। वृद्धि गरिएको कर फिर्ता नभएसम्म रिले अनसनलगायतका विरोधका कार्यक्रम जारी राख्ने आन्दोलनकारीहरुले चेतावनी समेत दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Oytk9IM17G-1753948133.jpg)
-1764146706.png)
