व्यवसायीको जोड: लगानीयोग्य पुँजी स्थानीय तहसम्म पुगे मात्रै निजी क्षेत्रको मनोबल उठ्छ

अर्थ समाचार

नेपाल लाइभ बिहीबार, माघ १९, २०७९ १४:४७

काठमाडौं– व्यवसायीहरुले सरकारले स्थानीय तहसम्मै लगानीयोग्य रकम प्रवाह गर्न सके मात्रै निजी क्षेत्रको मनोबल उच्च हुने बताएका छन्। चुनौतिपूर्ण अवस्थामा रहेको अर्थतन्त्रलाई चलायमान बनाएर सरकारले निजी क्षेत्रको मनोबल उच्च बनाउन आवश्यक रहेको उनीहरुको भनाइ छ।

आर्थिक मिडिया सञ्चालक संघले बुधबार आयोजना गरेको अन्तर्क्रिया कार्यक्रममा बोल्दै व्यवसायीहरुले सरकारले स्थानीय स्तरसम्म लगानीयोग्य रकम प्रवाह गर्नसके मात्रै निजी क्षेत्रको मनोबल उच्च हुने बताए। उनीहरुले निजी क्षेत्रको मनोबल उच्च भए मात्रै उद्योग क्षेत्रमा लगानी बढ्ने दाबी पनि गरे।

विगतमा सरकारले लिएका अर्थ नीतिहरुमा एक्कासी परिमार्जन गर्दा अर्थतन्त्रमा देखिएका समस्याले उद्योगी व्यवसायीहरु मारमा परेको उनीहरुको भनाइ छ। अघिल्लो आर्थिक वर्षको मौद्रिक नीतिमा राष्ट्र बैंकले शेयर बजारमा गरेको कडाइका कारण अर्थतन्त्रमा समस्या देखिएको पनि व्यवसायीहरुले दाबी गरे।

कार्यक्रममा बोल्दै नेपाल उद्योग वाणिज्य महासंघका अध्यक्ष शेखर गोल्छाले मुलुकको चुनौतिपूर्ण अर्थतन्त्रलाई माथि उकास्न आवश्यक रहेको बताए। पछिल्लो समय तरलता, शोधानान्तर स्थितिमा अर्थतन्त्र बचेको अवस्था रहेको उनले उल्लेख गरे।

नेपालको अर्थतन्त्र बंगलादेश, श्रीलंका र पाकिस्तानको भन्दा धेरै राम्रो अवस्थामा रहेको गोल्छाले दाबी गरे। सरकारले मुलुकको अर्थतन्त्र चलायमान बनाउनको लागि लगानीयोग्य रकम स्थानीय तहसम्म प्रवाह हुन जरुरी रहेकोमा गोल्छाले जोड दिए। स्थानीय तहसम्म लगानीयोग्य रकम कसरी प्रवाह हुनसके मात्रै बजार चलायमान हुने उनको भनाइ छ।

ग्राउण्ड लेभलसम्म तरलता सहजता भए २० प्रतिशत संकुचन आएको राजस्व पनि उठ्ने र निजी क्षेत्रको मनोबल उच्च भइ लगानी बढ्ने उनको भनाइ छ।

अघिल्लो आर्थिक वर्षको राष्ट्र बैंकको मौद्रिक नीतिमा शेयर धितोकर्जाको लागि ४/१२ को नीति ल्याएकाले मुलुकको अर्थतन्त्रमा ठूलो असर परेको गोल्छाले दाबी गरे।

‘पुँजीबजार संकटमा थियो। अहिले अलिकति सुधार हुँदै गएको देखिन्छ। मुलुकको चुनौतिपूर्ण अर्थतन्त्रलाई माथि उकास्न आवश्यक छ। अहिले तरलता, शोधानान्तर स्थितिमा अर्थतन्त्र बच्यो भन्न सकिन्छ। बंगलादेश, श्रीलंका र पाकिस्तानभन्दा धेरै राम्रो अवस्थामा छौं। उनीहरुसँग नेपालको अर्थतन्त्र तुलना गर्न मिल्दैन,’ गोल्छाले भने, ‘तर अहिले मुलुकको अर्थतन्त्र चलायमान बनाउनको लागि लगानीयोग्य रकम तल्लो तहसम्म प्रवाह हुन जरुरी रहेको छ। तल्लो तहसम्म लगानीयोग्य रकम कसरी प्रवाह हुनसक्छ अनि मात्रै बजार चलायमान हुनसक्छ। अनि मात्रै २० प्रतिशत संकुचन आएको राजस्व माथि उठ्न सक्छ। यो भए मात्रै नेपालको निजी क्षेत्रको मनोबल उच्च भएर लगानी बढ्न सक्छ।’

त्यस्तै, नेपाल चेम्बर अफ कमर्सका उपाध्यक्ष कमलेश अग्रवालले वर्तमान सरकारले निजी क्षेत्रको मनोबल कसरी उच्च बनाउने भन्नेमा केन्द्रित हुनुपर्ने बताए। पछिल्लो समय निजी क्षेत्र बैंकको उच्च ब्याजदरको कारण समस्यामा रहेको भन्दै बैंकको बेसरेट र निक्षेपको ब्याजदर वृद्धि गर्दा कर्जाको ब्याजदर समेत उच्च भएको अग्रवालले उल्लेख गरे।

बैंकहरुले विगतमा पैसा धेरै हुँदा २ प्रतिशतसम्म कर्जा दिएर अहिले ७ प्रतिशतसम्म ब्याजदर कायम गर्दा बैंकको ब्याजदर उच्च भएर निजी क्षेत्र मारमा परेको अग्रवालले दाबी गरे।

अग्रवालले नेपालको अनौपचारिक अर्थतन्त्र भनेको कालो धन नभएको बताए। अग्रवालले विगतमा कमाएको पैसालाई अभिलेखिकरण नगरेकाले अहिले त्यो पैसा बैंकिङ प्रणालीमा आउन नसकेको भन्दै बैंकिङ च्यालनमा आउन स्रोत देखाउनुपर्ने अवस्था रहेको बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

विदेशी निकाय र एनजिओबाट कति पैसा नेपाल आयो सदनलाई जानकारी गराउन माग

नेपाल सरकारका अधिकृत श्यामले ल्याए नयाँ गीत ‘फूलको रङ्ग’

खाँदबारी–किमाथाङ्का सडक सुक्खा पहिरोले अवरुद्ध