काठमाडौं- नेकपा एकीकृत समाजवादी समानुपातिकमा थ्रेसहोल्ड कटाउन संघर्ष गरिरहेको छ। ९८ लाख ५ हजार ९ सय ३२ मत गणना भइसक्दा एकीकृत समाजवादीले २ लाख ७६ हजार ८९१ मत पुर्याएको छ। अहिलेकै अनुपात हेर्ने हो भने तीन प्रतिशतका लागि अझै करिब ०.१७ प्रतिशत मत अपुग छ।
निर्वाचन आयोगले ६१ प्रतिशत मत खसेको जनाएको छ। यसअनुसार जम्मा मत १ करोड ९ लाख हाराहारी खसेको देखिन्छ। ११ लाख मत गन्न बाँकी छ। जुन समग्रको ९ प्रतिशत हुन आउँछ।
अब गणना हुन बाँकी मतमा ५० हजार हाराहारीमा मत ल्याउनुपर्ने देखिन्छ। यही अनुपातमा मत ल्याउने हो भने उक्त मत पाउने सम्भावना कमजोर देखिन्छ। राष्ट्रिय पार्टी बन्नका लागि कम्तिमा ३ प्रतिशत पुर्याउनुपर्छ। त्यति मत पुग्दा मात्रै समानुपातिकमा सिट पाउने हुन्छ।
अहिलेकै अवस्थामा एमाले ३५ वा ३४, कांग्रेस ३३ वा ३२ सम्म, राष्ट्रिय स्वतन्त्र पार्टी र माओवादी केन्द्रले बढीमा १५, राष्ट्रिय प्रजातन्त्र पार्टीले बढीमा ८ र कम्तिमा ६, जनता समाजवादी पार्टी ५ र जनमत पार्टीले ४ सिट पाउने देखिन्छ।
यदि गणना बाँकी मतमा एकीकृत समाजवादीले त्यही अनुपातमा मत ल्याउँदै अहिलेको ०.१७ प्रतिशत अपुग पूर्ति गर्यो भने उसले ४ सिट पाउनेछ। अन्यको अनुपात घट्नेछ।
एकीकृत समाजवादीले थ्रेसहोल्ड कटाउने सम्भावना भने कमजोर देखिन्छ। उक्त पार्टीले प्रत्यक्ष चुनाव जितेका १० क्षेत्रको समानुपातिक मत पनि लगभग गणना भइसकेको निर्वाचन आयोगको तथ्यांकले देखाउँछ।
प्रत्यक्ष जितेकै ठाउँमा समानुपातिकमा कम
प्रत्यक्षतर्फ तीन सिट जितेको सुदूरपश्चिमका कुनै जिल्लामा पनि समानुपातिक मत १० हजार कट्न सककेको छैन।
सत्तारुढ गठबन्धन दल घटकको रुपमा रहेको एकीकृत समाजवादी पार्टीले सुदूरपश्चिम प्रदेशबाट ३ जना उम्मेदवारहरुले प्रतिनिधि सभामा निर्वाचित भएका छन्। अछाम-२ बाट शेरबहादुर कुँवर, डोटीबाट प्रेम आले र बझाङबाट भानुभक्त जोशी निर्वाचित भएका छन्।
डोटीमा एमाले र कांग्रेसले २२ हजार भन्दा बढी मत ल्याउँदा एकीकृत समाजवादीले बल्ल २ हजार कटाएको छ।
अर्को जितेको अछाममा एमालेले २८ हजार ल्याउँदा एकीकृत समाजवादीको जम्मा ४ हजार छ भने बझाङमा पनि त्यही अनुपातमा छ।
अध्यक्ष माधव नेपालले चुनाव जितेको रौतहट जिल्लाको समानुपातिक मत गणना लगभग अन्तिममा पुगेको छ। जहाँ कांग्रेसले ६५ हजार कटाउँदा एकीकृत समाजवादीको ३२ हजार ७०० मात्रै छ।
कर्णालीमा पनि तीन सिट जितेको छ तर जितेकै जिल्लामा पनि समानुपातिक मत बढीमा ५ हजारका दरले आएको देखिन्छ। दैलेख निर्वाचन क्षेत्र १ बाट अम्मरबहादुर थापा, सल्यानबाट प्रकाश ज्वाला र डोल्पाबाट धनबहादुर बुढा निर्वाचित भएका छन्। बुढाले निर्वाचन जितेको डोल्पामा समानुपातिक मतमा एकीकृत समाजवादी चौंथो नम्बरमा छ। अन्यको ६ हजार आउँदा एकीकृत समाजवादीको जम्मा १८ सय मत आएको छ।
लुम्बिनीको दाङ- १ बाट प्रतिनिधि सभा सदस्यमा एकीकृत समाजवादी पार्टीका मेटमणि चौधरी विजयी भएका छन्। तर, दाङ जिल्लाभरीबाट समानुपातिकमा ४ हजार ६ सय ९१ मत प्राप्त भएको छ। बागमती प्रदेशको धादिङ–१ बाट राजेन्द्र पाण्डे निर्वाचित भएका छन्। समानुपातिकमा भने ८ हजार भन्दा केही बढी मत आएको छ। कृष्णकुमार श्रेष्ठले जितेको बारा जिल्लाकै मत पनि १० हजार पुगेको छैन।
उम्मेदवारले जितेकै क्षेत्रमा समानुपातिकमा कमजोर आएकाले बाँकी जिल्लाबाट आउने सम्भावना कमजोर छ। मत गणना नै सुरु नभएका तीन जिल्ला छन्, बाजुरा, दोलखा, स्याङ्जा- २। यी तीनै जिल्लामा एकीकृत समाजवादीको प्रभाव कमजोर छ। यसले गर्दा पनि राष्ट्रिय पार्टी बन्न सम्भावना कमजोर बन्दै गइरहेको छ।
प्रदेशमा पनि कमजोर
प्रदेशको प्रत्यक्षमा गण्डकी र लुम्बिनीमा शून्य नै भएको छ। अन्यमा पनि उत्साहजनक उपस्थिति छैन। समानुपातिक मत केलाउँदा पनि सबैभन्दा बढी कर्णालीमा ६ दशमलव २० प्रतिशत मत पाएको छ।
त्यसपछि मधेश प्रदेशमा ५ दशमलव ४०, बागमतीमा ३ दशमलव १, लुम्बिनीमा २ दशमलव २५, सुदूरपश्चिममा ५ दशमलव १४ र गण्डकीमा १ दशमवल ५९ प्रतिशत समानुपातिक मत एकीकृत समाजवादीले पाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
