काठमाडौं– काठमाडौं क्षेत्र नम्बर ६ बाट प्रतिनिधि सभामा राष्ट्रिय स्वतन्त्र पार्टीका शिशिर खनाल निर्वाचित भएका छन्। १४ हजार २०४ मत ल्याएर खनाल निर्वाचित भएका हुन्।
यस्तै नेकपा एमालेका सर्वेन्द्र खनालले ८ हजार ९११ मत प्राप्त गर्दा नेपाली कांग्रेसका भीमसेनदास प्रधान ८ हजार ८०५ मतका साथ तेस्रो स्थानमा छन्।
४३ वर्षीय खनाल ‘टिच फर नेपाल’ का सह–संस्थापक तथा पूर्व अध्यक्ष हुन्। उनले सर्वोदय युएसएको कार्यकारी निर्देशक भएर पनि काम गरेका थिए। साथै उनी लजिष्टिक कम्पनी 'पिक एन्ड ड्रप' का सह–संस्थापक समेत हुन्। टिच फर नेपालको संचालक समितिमा त्रिभुवन विश्वविद्यालयका पूर्व उपकुलपति प्रा केदार भक्त माथेमा, नेपाली कांग्रेसका महामन्त्री तथा सांसद गगन थापा, उद्योगपति शेखर गोल्छा, शिक्षाविद प्रा मन वाग्ले, पूर्व अर्थ सचिव रामेश्वर खनाल, पत्रकार किरण नेपाल लगायत छन्।
अमेरिकाबाट राजनीतिक अर्थशास्त्र र सार्वजनिक नीतिमा स्नातकोत्तर उत्तीर्ण गरेका शिशिरले अमेरिकाबाट नेपाल फर्किए पछि ‘टिच फर नेपाल’ नामक संस्था स्थापना गरेका थिए। उनले 'टिच फर नेपाल' मार्फत देशका कुना–कुनाका सामुदायिक विद्यालयको शैक्षिक गुणस्तर सुधारको काम गर्दै आएका थिए।
सन् २०१९ मा युवा सीईओको अवार्डसमेत पाएका खनाल देशको समग्र दिशा परिवर्तनका लागि राजनीति महत्त्वपूर्ण र अपरिहार्य मार्ग भएको भन्दै सक्रिय राजनीति गर्ने सानै देखिको रहर पूरा गर्न राजनीतिमा लागेको बताउँछन्।
सक्रिय राजनीतिमा लागेर विश्वस्तरका विश्वविद्यालयबाट सार्वजनिक नीति तथा राजनैतिक अर्थशास्त्रमा आर्जन गरेको ज्ञान, शिक्षा र समुदायको खारिएको बुझाइ, तुलसीपुर उपमहानगरपालिकामा निर्माण गरेको नीति र परिवर्तनका मार्गचित्र र उद्यमशीलताका पाठहरूलाई देशको वृहत् हितमा लगाउने विचारसहित नयाँ आँट गरेको उनले बताउँदै आएका छन्।
उनी भन्छन्, ‘आफूसँग भएका ज्ञान, सीप र क्षमतालाई केवल बजारको मूल्यमा साट्नुभन्दा पर गएर केही गरिहाल्न हजारौँ पटक सोच्नुपर्ने आफ्नै खाले बाध्यताहरू पनि हुन्छन्। तर, यी बाध्यता र चुनौतीले वर्षौँदेखि मनभित्र रहेको हुटहुटी कहाँ मार्न सक्छ र?’
त्यही हुटहुटीले राष्ट्रिय स्वतन्त्र पार्टीमार्फत चुनावी मैदानमा होमिएका थिए खनाल। यस जितसँगै उनको सांसद् बन्ने सपना पूरा भएको छ।
कक्षा कोठादेखि संसद्सम्म
खनाल १२ वर्ष अघि नेपाल आए। उनले नेपाल आएर 'टिच फर नेपाल' नामक संस्था स्थापना गरे। त्यो संस्थामार्फत सरकारी विद्यालयहरूमा शिक्षाको सुधार गर्ने काम गर्दै आएका थिए। उनीसँग स्थानीय सरकारमा काम गरेको अनुभव पनि छ। उनले दाङ, तुलसीपुरको सल्लाहकारको रूपमा पनि काम गरिसकेका छन्।
‘म लामो समयदेखि सबै विद्यार्थीहरूले गुणस्तरीय शिक्षा पाउनु पर्छ भन्ने हेतुले काम गर्दै आएको छु। मसँग कक्षा कोठादेखि स्थानीय सरकारमा काम गरेको अनुभव पनि छ’, उनी भन्छन्, ‘तर यसरी काम गर्दा हामीले खोजेको जस्तो सुधार हुन सकेन। त्यही भएर नै राजनीतिमा आउने निर्णय लिएको हो।’
खनाल अब सांसद भएपछि मुख्य रूपमा शिक्षा क्षेत्रको सुधारका लागि काम गर्ने बताउँछन्।
‘०७२ सालको संविधानले देश सङ्घीयतामा गयो। र विद्यालयको शिक्षा स्थानीय सरकारको मातहतमा गयो। तर अहिले पनि नेपालको शिक्षा ऐन २०२८ सालको छ’, उनी भन्छन्, ‘५० वर्ष पुरानो शिक्षा ऐनले अहिलेको शिक्षालाई मार्ग निर्देशन गरिरहेको छ। अब हाम्रो काम भनेको परिवेश सुहाउँदो ऐन–कानुन निर्माण गर्ने हो।’
यस्तै शिक्षा, स्वास्थ्य लगायतका विषयलाई प्राथमिकतामा राखेर आफूले काम गर्ने खनाल बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
