चितवन– ‘अलिहेको मत विश्लेषण गर्दा हामी नै बलियो उम्मेदवार देखिएका छौं,’ चितवन क्षेत्र नम्बर ३ बाट प्रतिनिधि सभा सदस्यका लागि स्वतन्त्र उम्मेदवार दिनेश कोइरालाले भने, ‘यही अवस्था कायम राख्न सकिए नतिजा हाम्रो पक्षमै आउँछ।’
उम्मेदवार पच्छ्याउने क्रममा मंगलबार भरतपुर महानगरपालिकाको हेल्थपोष्ट चोकमा आफ्नो चुनावी अभियानमा व्यस्त कोइराला गुरुङ समुदायको मृत्यु संस्कारमा भेटिएका थिए।
स्वतन्त्र उठेपनि नेकपा एमालेले समर्थन गर्ने भन्दै उम्मेदवारी नै फिर्ता लिएर अहिले अभियानमा खटिनु र कांग्रेसका ‘इमान्दार साथीहरु’को सहयोग आफूलाई रहनु नै जित्ने आधार भएको कोइरालाले दाबी गरे।
कोइरालाले आफ्नो जितको आधार सुनाए पनि अवस्था भने केही फरक देखियो। मंगलबार भरतपुर १५ को सारदानगर चोकको एक चिया पसमा भेटिएका केही मानिसहरुले चितवन ३ को चुनावी माहोलबारे केही नयाँ विषय खुलाए।
1668314173.jpg)
‘अहिले धेरैजसोको खेतमा धान काट्ने काम भइरहेको छ। त्यहाँ गएर हेर्नुस् ५ जना महिलाले धान काटेको ठाउँमा एक जना पुरुष पनि पाउन मुस्किछ। पुरुष जति सबै विदेशतिर छन्। यहाँको निर्णायक भोटर नै महिला हुन्,’ शिक्षण पेसाबाट निवृत्त भएका माधव गैरेले महिलालाई जस्ले आफूतिर तान्न तान्न सक्छ उसैले चुनाव जित्ने आधार हामीलाई सुनाए।
भोटर लिस्टमा भएका धेरैजसो पुरुषहरु बाहिर भएकाले महिलाहरु नै यो चुनावमा निर्णाय भोट भएको उनको बुझाई छ।
यो विषयलाई राप्रपाका उम्मेदवार विक्रम पाण्डेले भने भरपुर उपभोग गरेको देखियो। भरतपुरका टोलैपिच्छे भएका आमा तथा महिला समूहलाई पाण्डेले तिहारमा आफ्नो घरमा देउसीभैलो खेल्ने भनेर निम्तो नै दिएका रहेछन्।
‘भैलो खेल्न बोलाउने र ठूलो रकम दिने, कुन समूहलाई के आवश्यकता छ, ती सामानहरु समेत किनेर पाण्डेले निर्णायक भोटर मानिएका महिलाहरुको समूहलाई आफ्नो पकडमा राखेको देखिन्छ,’ अर्का मतदाता किशोर केसीले पनि गैरेकै भनाइलाई पुष्टि हुने कुरा हामीलाई सुनाए।
1668314086.jpg)
टोल टोलमा भएका विभिन्न क्लब, महिला समूह, गुम्बाहरुमा चुनाव लाग्नुभन्दा अघिदेखि नै आर्थिक सहयोग गरेर पाण्डेले आफूतर्फ माहोल बनाएको उनीहरुको बुझाइ छ।
भरतपुर–९ की कमला पौडेल पाण्डेकै निम्तोमा आफूहरु भैलो खेल्न गएको स्वीकार गर्छिन्। उनी मात्रै होइन यसवर्ष धेरै समूहहरु पाण्डेकै निम्तोमा उनको घरमा देउसी भैलो खेल्न पुगेका थिए।
पाण्डेको यो रणनीति अन्य दलका उम्मेदवारलाई थाहा नभएको भने होइन। ‘तिहारको बेलामा देउसी भैलो खेल्न पाइने नै भयो। दान दिने कुराले यति दान दिन मिल्दैन भनेर हामीले प्रश्न गर्ने ठाउँ पनि रहेन,’ नेपाली कांग्रेसका १ जना स्थानीय नेताले भने।
आर्थिक चेलखेल गरेर चुनाव प्रभावित पार्न खोजेको आरोप अन्य दलहरुले पाण्डेलाई लगाएका छन्।
महिला तथा आमाहरु अहिले उम्मेदवारहरुको केन्द्रमा रहेका छन्। उनीहरुलाई आफूतर्फ आकर्षण गर्न अहिले पनि उम्मेदवारहरु लागिरहेको देखिन्छ।
चितवन ३ मा नेकपा एमाले र कांग्रेसका उम्मेदवार छैनन्। एमालेले कांग्रेसका बागी तथा स्वतन्त्र उम्मेदवार दिनेश कोइरालालाई समर्थन गर्दै उम्मेदवारी फिर्ता लिएको थियो।
1668314086.jpg)
उता गठबन्धन दल कांग्रेसले चितवन ३ मा माओवादीलाई छाडेको छ। माओवादीको तर्फबाट डा भोजराज अधिकारी चुनावी मैदानमा छन्।
जसले जिते पनि वैशाखीकै भर
चितवन ३ मा ३ जनाबीच मुख्य प्रतिस्पर्धा हुने देखिएको छ। गठबन्धनको तर्फबाट डा भोजराज अधिकारी, एमालेले समर्थन गरेका दिनेश कोइराला र राप्रपाका विक्रम पाण्डेबीच मुख्य प्रतिस्पर्धा हुने देखिन्छ।
कसैको पक्षमा पनि स्पष्ट मत नदेखिएकाले यी तीनै उम्मेदवारमध्ये जसले जिते पनि वैशाखीकै भरमा चुनाव जित्ने निश्चित छ।
1668314085.jpg)
माओवादीका उम्मेदवार अधिकारीलाई जितका लागि कांग्रेसको पूर्ण साथ चाहिन्छ। गत स्थानीय तहको चुनावमा वडाध्यक्षले पाएको मतलाई आधार मान्दा एमाले, कांग्रेस भन्दा चितवन ३ मा माओवादी कमजोर देखिएको छ। जसकारण अधिकारीलाई जितका लागि कांग्रेसको पूर्ण साथ चाहिने देखिन्छ।
गठनबन्ध गर्दा चितवन ३ माओवादीले पाएपछि कांग्रेसका केन्द्रीय सदस्य दिनेश कोइरालाले स्वतन्त्र उम्मेदवारी दिएका थिए। उनले उम्मेदवारी दिएपछि एमालेले कोइरालालाई समर्थन गर्दै उम्मेदवारी फिर्ता लिएको थियो। कोइरालालाई जितका जसरी पनि एमालेको साथ र कांग्रेसकै केही भोट काट्नुपर्ने अवस्था देखिन्छ।
उता राप्रपाका पाण्डे पनि आफ्नै बुतामा चुनाव जित्न सक्ने अवस्थामा छैनन्। उम्मेदवार नै नभएको एमाले र असन्तुष्ट कांग्रेस समर्थकको भोट तानेर वैशाखीको भरमा चुनाव जित्ने दाउमा पाण्डे देखिन्छन्।
1668314085.jpg)
चितवन ३ मा भरतपुर महानगरपालिकाका वडाहरु ६, ८, ९, १३, १४, १५, १६, १७, १८, १९, २०, २१, २२, २३, २४, २५, २६, २७ र २८ तथा माडी नगरपालिकाका ९ वटै वडाहरू पर्छन्। गत वैशाखमा भएको स्थानीय तह निर्वाचनमा चितवन ३ अन्तर्गत पर्ने २९ वडामध्ये नेपाली कांग्रेसले १० वटा, एमालेले ४ वटा, माओवादी केन्द्रले ७ वटा, एकीकृत समाजवादीले ४ वटा, राप्रपाले २ वटा र स्वतन्त्र उम्मेदवार १ जनाले वडाध्यक्ष जितेका थिए।
वडाअध्यक्षहरुले पाएको एकीकृत मतमा एमाले अगाडि छ। त्यहाँ एमालेले २९ हजार ७७१, नेपाली कांग्रेसले २९ हजार ३४३, माओवादी केन्द्रले १० हजार ९४०, राप्रपाले ६ हजार १९८, एकीकृत समाजवादीले ५ हजार ३७ र स्वतन्त्र तथा अन्य पार्टीले ३ हजार ५५९ मत पाएका छन्।
चितवन ७ का स्थानीय भक्तिबिलास न्यौपानेले आफ्नो चुनावी अंकगणित हामीलाई सुनाए। उनका अनुसार दिनेशलाई समर्थन गरेर उम्मेदवारी नै फिर्ता लिनु भनेको एमाले जसरी पनि गठबन्धन हराउने दाउमा देखिन्छ। यता कांग्रेस कै भोट काट्ने र एमालेको साथमा जित्ने दाबी गरेका कोइरालाले कांग्रेसको खासै भोट काट्न नसक्ने देख्छन् उनी। ‘यस्तो अवस्थामा जसरी पनि गठबन्धन हराउ अभियानमा लागेका एमालेहरुले मत खेर जान नदिने भन्दै अन्त स्वीङ गर्ने सम्भावना छ,’ न्यौपानेले भने।
न्यौपानेले भनेस्तो एमालेको मत अन्त स्वीङ भएको अवस्थामा विक्रम पाण्डेकै ‘भाग्य’ चम्किन सक्ने बुझाइ पनि चितवन ३ मा देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
