अमेरिका– संयुक्त राज्य अमेरिकाको न्यूयोर्क राज्यबाट नेपाली मूलकी सराहना श्रेष्ठ डेमोक्रयाट पार्टीको तर्फबाट राज्य विधानसभा सदस्यमा निर्वाचित भएकी छन्।
उनी अमेरिकामा राज्यस्तरीय विधान सभा सदस्य अर्थात् सांसदमा विजयी हुने दोश्रो नेपाली अमेरिकी तथा अमेरिकी राजनीतिमा माथिल्लो पदमा पुग्ने नेपाली मूलकी पहिलो महिला हुन्।
यसभन्दा पहिले मेरिल्याण्ड राज्यमा डा ह्यारी भण्डारी राज्य विधानसभा सदस्यमा निर्वाचित भएका थिए।
सराहना श्रेष्ठ मंगलबार भएको निर्वाचनमा ३५ हजार ४९३ मत ल्याई विजयी भएकी छिन्।
उनले आफ्ना रिपब्लिकनका प्रतिद्वन्द्वीलाई हराई न्यूयोर्क राज्यको सांसद बन्ने अवसर प्राप्त गरेकी हुन्।
उनले विधानसभा डेमोक्र्याटिक प्राथमिक निर्वाचनमा १३ कार्यकालसम्म विजयी भएकी केभिन काहिललाई पराजित गरेकी थिइन्।
पहिलो पुस्ताकी नेपाली-अमेरिकी श्रेष्ठलाई न्यूयोर्ककी युवा अमेरिकी सांसद अलेक्जान्ड्रिया ओकासियो-कोर्टेजले समर्थन गरेकी थिइन्।
२०१९ मा मात्र अमेरिकी नागरिकता लिएकी सराहना श्रेष्ठले पर्यावरणको क्षेत्रमा काम गर्दै आएकी छन्। उनले आफ्नो चुनावी अभियानमा कुनै पनि संस्थाबाट चन्दा नलिने उद्घोष गरेकी थिइन्।
उनले चुनावी अभियानमा मानसिक स्वास्थ्य, दीर्घकालीन हेरविचार र प्रजनन हेरचाहसहित सबैका लागि सुलभ स्वास्थ्य सेवाका लागि आफूले काम गर्ने बताएकी थिइन्।
२१ वर्ष पहिले सन् २००१ मा सुसांख्य चित्रालेख (कम्युटर ग्राफिक्स) अध्ययन गर्न अमेरिका आएकी श्रेष्ठ हाल आफ्ना पतिसहित न्यूयोर्कको हडसन भ्यालीमा बस्दै आएकी छन्।
इन्स्टाग्राममा एक संदेश लेख्दै सराहनाले आफुलाई विजयी बनाउने मतदाताहरु र रात दिन मेहनत गर्ने स्वयम्सेवीहरुलाई धन्यवाद दिएकी छन्।
‘भविष्य सुन्दर हुनै पर्छ र तपाईंहरुसँगै मिलेर सुन्दर भविष्य बनाउने यो अवसर पाएकोमा मैले आफूलाई अत्यन्तै सम्मानित ठानेकी छु,’ उनले भनिन्।
(यो समाचार बिहीबार बिहान अद्यावधिक गरिएको हो। सं.)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
