काठमाडौं- मंसिर ४ मा हुने प्रतिनिधि सभा निर्वाचनमा नेकपा एमालेका नेता भीम रावलको टिकट खोसिएपछि अछाम- १ चर्चामा छ।
एकल सिफारिस भएका रावललाई टिकट नदिएर उनको ठाउँमा माओवादी परित्याग गरी एमाले प्रवेश गरेका झपट बोहरालाई उम्मेदवार बनाइएपछि अछाम- १ को चर्चा थप चुलिएको हो।
सो क्षेत्रमा सत्ता-गठबन्धनका तर्फबाट एकीकृत समाजवादीका नेता शेरबहादुर कुँवर चुनावी प्रतिस्पर्धामा छन्।
को हुन् बोहरा?
बोहरा २०७४ सालको निर्वाचनमा नेकपा माओवादी केन्द्रबाट अछाम- क्षेत्र १ को (ख) मा प्रदेश सभामा निर्वाचित भएका थिए। त्यसपछि उनी सुदूरपश्चिम प्रदेश सरकारको आर्थिक मामिला तथा योजना मन्त्री समेत भएका थिए।
माओवादी त्यागेर एमाले रोजेका बोहरालाई माओवादी केन्द्रले पार्टीबाट निष्काशन गरेको थियो। एमालेबाट टिकट पाए पनि पूर्व माओवादी भएका कारण उनी एमालेका जिल्ला स्तरका नेता कार्यकर्तामाझ परिचित हुन बाँकी नै रहेको एमाले नेता कार्यकर्ताहरुको बुझाइ छ।
पूर्वमाओवादी विरुद्ध पूर्वएमाले
नेकपा विभाजनपछि बनेको एकीकृत समाजवादी (एस) मा लागेका शेरबहादुर कुँवरलाई गठबन्धनले साझा उम्मेदवार बनाएको छ। उनी माओवादी छोडेर एमालेमा प्रवेश गरेका बोहरासँग प्रतिस्पर्धा गर्दैछन्।
कुँवर २०६४ सालको पहिलो संविधान सभा निर्वाचनमा अछाम- १ बाट निर्वाचित भएका थिए। उनी प्रत्यक्ष निर्वाचन लड्दा भीम रावल समानुपातिकमा बसेका थिए। त्यतिबेला उनी भीम रावललाई सुरक्षित गर्न प्रत्यक्ष निर्वाचनमा होमिएका थिए।
राष्ट्रिय सभा सदस्य रहेका कुँवर श्रम, रोजगार तथा सामाजिक सुरक्षा मन्त्री हुन्।
यो क्षेत्रमा रामारोशन गाउँपालिका, बान्नीगढी जयगढ गाउँपालिका, चौरपाटी गाउँपालिका, साँफेबगर नगरपालिका र मेल्लेख गाउँपालिका गरी पाँच पालिका पर्छन्।
भीम रावलको साथ कसलाई?
अछाम- १ बाट प्रतिनिधि सभामा एकल सिफारिसमा पर्दा पनि टिकट खोसिएपछि रावल चिढिएका छन्। रावलले टिकट नपाएपछि उनी निकट जिल्लाका नेता कार्यकर्ताले राजीनामा दिएका थिए। अछाम- १ का क्षेत्रीय संयोजक प्रकाश शाह लगायतले पदबाट राजीनामा दिएका थिए।
यद्यपि, शाहले आफूहरुले पार्टीबाट नभई पदबाट मात्रै राजीनामा दिएको नेपाल लाइभसँग बताए। आफूहरुको लामो समयसम्म पार्टीमा लगानी रहेकोले एमाले नछोडेको उनले स्पष्ट पारे।
'जिल्लाबाट सर्वसम्मत सिफारिस गरेर एउटालाई पठायौं, केन्द्रबाट अर्कैलाई उम्मेदवार बनाएपछि पदमा बस्नुको अर्थ नदेखेर राजीनामा दिएका हौं,' उनले भने, ‘ म लगायत ३/३६ जना जिल्ला कमिटीका साथीहरुले राजीनामा गरेका हौं। तर जिल्ला कमिटीको बैठकले हाम्रो राजीनामा अस्वीकृत गरेको छ।’
रावलले टिकट नपाएका कारण पार्टीमा असमति र असन्तुष्टि भए पनि एमालेले पठाएका उम्मेदवारलाई हराउने आफूहरुको उद्देश्य नभएको शाहीले बताए। उनले भने, ‘हामीसँग अरु विकल्प छैन। गठबन्धनका उम्मेदवारलाई जिताउने कुरा भएन। स्वतन्त्र उम्मेदवारलाई जिताउने कुरा पनि भएन। असहमति हुँदाहुँदै पनि पार्टीका उम्मेदवारलाई जिताउनैपर्ने हुन्छ।'
यो क्षेत्रमा एमालेका बोहोरासहित सत्ता गठबन्धनका शेरबहादुर कुँवर, नेपाली कांग्रेसका स्वतन्त्र उम्मेदवार राजन कुँवर, हाम्रो नेपाली पार्टीका तेजप्रसाद शर्माका साथै महेन्द्रबहादुर बोगटी, हिक्मत कुँवरले स्वतन्त्र उम्मेदवारी दिएका छन्।
यस्तो छ स्थानीय तहको अंकगणित
२०७९ वैशाखमा भएको स्थानीय निर्वाचनमा वडाध्यक्षले पाएको मत हेर्ने हो भने अछाम- १ मा कांग्रेस १४ हजार ९६६, नेकपा एमाले १७ हजार ९१८, माओवादी केन्द्र ५ हजार ९६९, एकीकृत समाजवादी २ हजार ७५२ र स्वतन्त्र १ हजार २१६ मत देखिन्छ।
स्था नीय तह निर्वाचनमा रामारोशन गाउँपालिकामा नेपाली कांग्रेसले ३ हजार १९०, माओवादी केन्द्र २ हजार ६६६, नेकपा एमाले २ हजार ९४६ र एकीकृत समाजवादीले ६६ मत प्राप्त गरेको देखिन्छ।
बान्नीगढी जयगढ गाउँपालिकामा नेकपा एमाले २ हजार ७६४, कांग्रेस १ हजार ८२८, माओवादी केन्द्र ६ सय ९९ र एकीकृत समाजवादीले ३ सय ९२ मत पाएका थिए।
त्यस्तै चौरपाटी गाउँपालिकामा कांग्रेस ३ हजार ८४५ एमाले ३ हजार २१४, माओवादी केन्द्र ९ सय ७४ र एकीकृत समाजवादीले ६ सय ९७ प्राप्त गरेको देखिन्छ।
अछाम- १ मा पर्ने एक मात्र साँफेबगर नगरपालिकामा एमालेले ५ हजार ६४४, कांग्रेसले ५ हजार ५७९ र समाजवादीले १ हजार ४० मत प्राप्त गरेका छन्।
यस नगरपालिकामा दुई जना स्वतन्त्रले वडाध्यक्ष जितेका छन्। स्वतन्त्र वडाध्यक्षले ४ सय ५३ मत प्राप्त गरेका छन्।
त्यसैगरी मेल्लेख गाउँपालिका एमालेले ३ हजार ३५०, कांग्रेसले २ हजार ३५२, माओवादी १ हजार ६३० र समाजवादीले ५ सय ५७ मत प्राप्त गरेका छन् भने एक जना स्वतन्त्र वडाध्यक्षमा निर्वाचित भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
