पोखरा- आउँदो मंसिर ४ गते हुने प्रतिनिधि सभा तथा प्रदेश सभा निर्वाचनका उम्मेदवारहरु मतदाता रिझाउन गाउँगाउँ पुगेका छन्।
केही उम्मेदवार त भोट माग्न किसानकै खेतमा पुगेर धान काट्ने, चुट्नेसम्म गरिरहेका छन्। तर धेरै मतदाता भने भोट कसरी हाल्ने भन्ने अन्योलमा छन्। मतदाता शिक्षामा कसैले चासो दिएको देखिँदैन।
गण्डकी प्रदेशमा हालसम्म मतदाता शिक्षासम्बन्धी कुनै कार्यक्रम सुरु भएको छैन। स्थानीय तहलाई मतदाता शिक्षाको जिम्मा दिए पनि उनीहरुले कार्यक्रम सुरु गर्न सकेका छैनन्।
गण्डकी प्रदेशमा मतदाता शिक्षा कार्यक्रम तिहारपछि सुरु हुने निर्वाचन आयोग गण्डकी प्रदेश कार्यालयका प्रमुख हुमनाथ पराजुलीले बताए। ‘अहिले स्थानीय तहलाई जिम्मा दिइएको छ। निर्वाचनको १७ दिनअघिबाट १५ दिन परिचालन गर्ने भन्ने कुरा छ। त्यो तयारी हुँदै छ,’ उनले भने।
मतदाता शिक्षा दिन स्थानीय तहले प्रत्येक वडामा स्वयंसेविका परिचालन गर्ने पराजुलीले बताए। ‘मतदाता शिक्षा सामग्री लोकसेवा आयोगले हामीलाई पठाएको छ। हामी चाहिँ कार्यक्रम सुरु भएपछि वितरण गर्छौं,’ उनले भने।
गएको स्थानीय तहको निर्वाचनमा मतपत्र एकै ठाउँ हुँदा बदर धेरै भए पनि यसपालि बदर कम हुने पराजुलीले दाबी गरे। ‘त्यति बेला ६ वटा मतपत्र एउटै ठाउँमा थिए। त्यो कारणले बढी बदर भएको अनुमान छ,’ उनले भने, ‘अहिले एक ठाउँमा मात्रै मतदान गर्ने हो, सिंगल मतपत्र हो। त्यस कारण बदर कम हुन्छ।’
मतपत्रमा उठेका उम्मेदवारको मात्र चिह्न रहेकाले पनि बदर संख्या कम हुने प्रमुख पराजुलीले उल्लेख गरे। ‘स्थानीय तहमा उम्मेदवार नभएको चिह्न पनि आयो। त्यस कारण पनि बदर भयो। तर अहिले उम्मेदवार भएको मात्रै चिह्न छ। त्यस कारण बदर कम हुन्छ,’ उनले भने।
स्थानीय तह निर्वाचनमा गठबन्धनका कारण हजारौं मत बदर भएको थियो । प्रतिनिधि सभा र प्रदेश सभा निर्वाचनमा अहिले पनि गठबन्धन कायमै छ । जसले गर्दा अहिले पनि मत बदर हुन सक्छ। मत बदरले नतिजालाई समेत असर गर्न सक्छ।
मतदाता घरदैलोसँगै मतदाता शिक्षा कार्यक्रमसँगै लगिएको नेकपा एमाले गण्डकी प्रदेश कमिटी अध्यक्ष नवराज शर्माले बताए। ‘निर्वाचन आयोगले कोण सभा गर्न कम समय दिएको छ, हामी मतदाताको घरदैलो, भेटघाट गरिरहेका छौं,’ उनले भने, ‘घरदैलोसँगै मतदाता शिक्षा पनि सँगै लगेका छौं।’
नमुना मतपत्र आएपछि मसिनो गरी मतदाताकहाँ जाने शर्माले सुनाए। ‘हामी मतदाताकहाँ नमुना मतपत्र आएपछि अलि मसिनो गरी जान्छौँ। त्यसैमा मतदाता शिक्षा पनि रहन्छ,’ उनले भने।
गण्डकी प्रदेशमा प्रतिनिधि सभा प्रत्यक्षतर्फ १८ र प्रदेश सभा प्रत्यक्षतर्फ ३६ निर्वाचन क्षेत्र छन्। जसमा १६ लाख ६२ हजार २ सय ४६ मतदाता छन्। ७ लाख ९२ हजार ६ सय ९७ पुरुष र ८ लाख ६९ हजार ५ सय ३८ महिला र ११ जना अन्य मतदाता छन्।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
