काठमाडौं – कतारमा २२ औँ संस्करणको विश्वकप फुटबल सुरु हुन अब लगभग एक महिनामात्र बाँकी छ। यता, अर्जेन्टिनी राष्ट्रिय फुटबल टोलीमा पर्ने निश्चित भएका फरवार्ड पावलो डिबाला भने घाइते भएका छन्। गत आइतबार इटालियन सिरी ए लिगमा लिसविरुद्ध २–१ गोल अन्तरको जित हात पार्दा उनी घाइते भएका हुन्।
खासमा डिबालालाई अर्जेन्टिनी टोलीमा कप्तान लियोनल मेसीको उत्तराधिकारीको रुपमा हेरिएको थियो। तर, त्यो हुन सकिरहेको छैन। क्षमता भएर पनि उनी निर्णायक क्षणमा कि त लयमा हुँदैनन्, कि त घाइते हुने गर्छन्।
योपटक पनि निर्णायक क्षणमा डिबाला घाइते हुन पुगेका छन् । अब उनले विश्वकप गुमाउने निश्चित प्रायः छ।
दुई वर्षअघि ब्राजिलमा कोपा अमेरिकाको उपाधि जित्दा पनि डिबाला अर्जेन्टिनी टोलीमा थिएनन्। उनीविना नै अर्जेन्टिना २८ वर्षपछि च्याम्पियन बन्यो । यसरी डिबाला कोपा अमेरिका च्याम्पियन हुनबाट बञ्चित भए।
डिबालाको खेल्नेशैली मेसीसँग मिल्छ । यसैकारण उनी ठूला खेलमा सुरुवाती ११ मा पर्दैनन् । मेसी नखेलेको खेलमा मात्र उनले अवसर पाउने गरेका छन् ।
कहिलेकाहीँ मात्र अवसर पाउँदा डिबाला प्रायः दबाबमा खेल्ने गरेको विश्लेषण गरिएको छ। यसकारण उनले सोचेजस्तो प्रदर्शन गर्न सकिरहेका छैनन्। अर्जेन्टिनाबाट ३४ खेल खेलेका डिबालाले मात्र तीन गोल गरेका छन्।
मेसीले सन्याल लिएपछि डिबालाले राष्ट्रिय टोलीमा अवसर पाउन सक्छन्। तर, हाल २८ वर्ष पुगिसकेका उनको त्यो बेलासम्म उमेर बढिसकेको हुनेछ।
डिबालाको क्लब करिअर पनि एकरुपताको छैन। उनी कहिले राम्रो लयमा हुन्छन् त कहिले अति नै खराब लयमा। इटालियन क्लब युभेन्ट्स छोड्न खोज्दा उनलाई च्याम्पियन्स लिग खेलिरहेका कुनै पनि क्लबले लिन चाहेनन्। यसले गर्दा उनी रोमामा जान बाध्य भए।
डिबालालाई अधिकांश फुटबल पण्डितले मेसीसँग तुलना गर्ने गर्छन्। तर, निर्णायक क्षणमा चुक्दा वा भाग्यले साथ नदिँदा उनी मेसीको छेउछाउ पनि पुग्न सकिरहेका छैनन्। यसैकारण, फुटबलका ज्ञाताहरूले उनलाई ‘अभागी’ खेलाडीको संज्ञा दिने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
