काठमाडौं– सत्ता गठबन्धनकै एउटा घटक जनता समाजवादी पार्टीले एक्कासी बालुवाटारबाट बाहिर निस्केर नेकपा एमालेसँग सहमतिको प्रयास सुरु गर्यो। अन्तत: जसपाको प्रयास सफल भयो र एमालेसँग चुनावी तालमेल गर्न पुग्यो।
सत्ता गठबन्धनमा रहेर केन्द्रमा ४ मन्त्री र मधेस प्रदेशको सरकार जोगाएको जसपाले सत्ता गठबन्धनबाट बाहिरिएर प्रतिपक्षी एमालेसँग तालमेल गरिरहँदा राष्ट्रिय प्रजातन्त्र पार्टी (राप्रपा) पनि एमालेसँगै तालमेलमा थियो।
एमालेसँगको तालमेलमा छुट्टाछुट्टै सहमति गरेका यिनै दुई दल जसपा र राप्रपा आगामी मंसिर ४ मा हुने प्रतिनिधि सभा निर्वाचनमा बाँके- २ मा प्रतिस्पर्धीको रुपमा उभिएका छन्।
एमालेले राप्रपालाई साथ दिएको उक्त क्षेत्रमा जसपाका उम्मेदवार मोहम्मद इस्तियाक राई आफ्नो जितलाई निरन्तरता दिने दाउमा छन्। राप्रपाले बलिया उम्मेदवारका रुपमा पार्टी महामन्त्री धवलशमशेर राणालाई चुनावी मैदानमा खडा गरेको छ।
बाँके २ नेपाली कांग्रेसका पूर्वप्रधानमन्त्री सुशील कोइरालाको क्षेत्र हो। यतिबेला कांग्रेसलाई कोइरालाको विरासत फर्काउने चुनौती छ भने जसपा र राप्रपा परिणाम आफ्नो पक्षमा पार्ने दाउमा छन्।
मुस्लिम, मधेसी र पहाडे मत रहेको यो क्षेत्रमा त्रिपक्षीय प्रतिस्पर्धा हुने देखिन्छ। बाँके- २ मा २०७४ सालको निर्वाचनमा एमालेले वाम-गठबन्धन बनाएर उम्मेदवार खडा गरेको थियो भने कांग्रेस र राप्रपाले तालमेल गरेका थिए। तर जित भने जसपाका राईले निकालेका थिए। यस पटक पनि आफ्नो जित सुनिश्चित रहेको राईको दाबी छ।
उक्त क्षेत्रमा नेपाली कांग्रेसले माओवादी र एकीकृत समाजवादीको गठबन्धनबाट सुदीपनरसिंह राणालाई उम्मेदवार बनाएको छ। लोसपाका अब्दुल हन्नान जसगढ चुनावी मैदानमा छन्।
राप्रपाका उम्मेदवार धवल दुई कार्यकाल स्थानीय जनप्रतिनिधि भएर गरेका कामका आधारमा आफूले निर्वाचन जित्ने दावी गर्छन्।
२०७४ सालमा धवलले नेपालगञ्ज उपमहानगरपालिको मेयर जितेका थिए। मेयरको रुपमा उनी लोकप्रिय नै थिए। यही लोकप्रियतालाई आफ्नो चुनावी नारा बनाएर सांसद हुने दाउमा उनी छन्।
जसपाका उम्मेदवार राई पनि आफ्नो क्षेत्र नगुमाउने रणनीतिमा छन्। उक्त क्षेत्रका मतदाताले फेरि आफूलाई सांसदको रुपमा देख्न चाहेको उनको दावी छ।
त्यस्तै, नेपाली कांग्रेसका उम्मेदवार सुदीपनरसिंह राणाले बाँके- २ मा कांग्रेसको विरासत फर्कने दावी गरे। यस पटक कांग्रेसलाई माओवादी र समाजवादीको पनि साथ रहेकाले आफ्नो विजयको आधार निर्माण भएको उनको भनाइ छ।
स्थानीय निर्वाचनको मत अनुसार पनि कांग्रेस अगाडि रहेको, त्यसमाथि गठबन्धनको मत पनि थप हुँदा आफ्नो जित सहज भएको उनले बताए।
स्थानीय निर्वाचनको मत कांग्रेसको बढी
वैशाखमा सम्पन्न स्थानीय तहको मत हेर्दा बाँके- २ मा कांग्रेस अगाडि देखिन्छ। नेपालगन्ज उपमहानगरपालिकामा रहेका कुल २३ वटा वडामध्ये २१ वटा वडा यो क्षेत्रमा पर्छन्। यीमध्ये स्थानीय चुनावमा जसपाले ६, नेकपा एमालेले ५, नेपाली कांग्रेसले ४, माओवादी केन्द्र र राप्रपाले ३/३ वटा वडा जितेका थिए। यस्तै डुडुवा गाउँपालिकामा जसपाले ३, एमालेले २ र कांग्रेसले एउटा वडा जितेको थियो।
क्षेत्र नम्बर २ अन्तर्गत पर्ने नेपालगन्ज उपमहानगरपालिका र डुडुवा गाउँपालिकामा रहेका वडाध्यक्षका उम्मेदवारले प्राप्त गरेको मत परिणाम हेर्दा कांग्रेस पहिलो, एमाले दोस्रो र जसपा तेस्रो स्थानमा देखिन्छन्। त्यसपछि राप्रपा, माओवादी केन्द्र, नेकपा एकीकृत समाजवादी र लोकतान्त्रिक समाजवादी पार्टी(लोसपा) छन्।
यो क्षेत्रमा कांग्रेसले १८ हजार ३७, एमालेले १५ हजार ४ सय ७८, जसपाले १३ हजार ८ सय ९, राप्रपाले ८ हजार ४ सय ९४, माओवादी केन्द्रले ६ हजार ८ सय ५९, नेकपा एकीकृत समाजवादीले ८ सय २१ र लोसपाले ५ सय ६४ मत प्राप्त गरेका थिए।
सुशील कोइरालाको विरासत फर्काउन कांग्रेसलाई चुनौती
बाँके- २ मा २०७० सालसम्म कांग्रेस नेता सुशील कोइराला चुनाव लड्ने गरेका थिए। कोइरालाको निधनपछि २०७४ को निर्वाचनमा कांग्रेस र राप्रपाबीच चुनावी तालमेल भएको थियो। कांग्रेस र राप्रपाका साझा उम्मेदवार ओमप्रकाश आजाद पराजित भएका थिए। यस्तै बामगठबन्धनका तर्फबाट पशुपतिदयाल मिश्र चुनावी मैदानमा थिए। तर तत्कालीन संघीय समाजवादी पार्टीका मोहम्मद इस्तियाक राईले जित निकाले। राईले २१ हजार पाँच सय ७५ मत ल्याएर जित हात हासिल गरेका थिए भने बाम गठबन्धनका उम्मेदवार मिश्रले १५ हजार ९ सय ५१ मात्र मत पाएका थिए। राप्रपा र नेपाली कांग्रेसका साझा उम्मेदवार आजादले ११ हजार ६ सय २२ मत पाएका थिए।
आफ्नो क्षेत्र बचाउने दाउमा राई
अघिल्लो पटक दुवैतर्फ गठबन्धन हुँदा पनि निर्वाचन जितेका राई यस पटक पनि जित्नुपर्ने चुनौतीमा छन्। शहरी विकास मन्त्री रहेका उनी जसपाले सत्ता गठबन्धनलाई साथ नदिँदा बीचमै बर्खास्तमा परे। मन्त्रीको रुपमा उनले केही प्रभाव पार्न सक्ने भए पनि उक्त अवसर गुमेको छ। तर राईले आफूलाई उक्त क्षेत्रका मतदाताले राम्ररी बुझेकाले जित्नेमा ढुक्क रहेको बताए।
तर उनको जित सहज भने देखिँदैन। उक्त क्षेत्रमा लोसपाले पनि मुस्लिम उम्मेदवार उठाएको छ। धवलशमशेरले जनप्रतिनिधिको रुपमा मुस्लिम प्रभाव क्षेत्रमा केही छाप पारेका कारण भोट विभाजन हुने डर राईलाई देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
