काठमाडौं- परराष्ट्रमन्त्री प्रदीपकुमार ज्ञावलीले युरोपका केही देश नेपालको ऊर्जा र पूर्वाधार निर्माणमा लगानी गर्न इच्छुक रहेको बताएका छन्।
युरोपेली मुलुक पोर्चुगल, लक्जेमवर्ग र बेल्जियमको साताव्यापी भ्रमण पूरा गरी बुधबार स्वदेश फर्केपछि त्रिभुवन अन्तर्राष्ट्रिय विमानस्थलमा पत्रकारसँग कुरा गर्दै उनले युरोपेली मुलुकहरु नेपालको ऊर्जा, पूर्वाधार र कृषि क्षेत्रमा लगानी गर्न इच्छुक रहेको पाएको बताए।
आगामी दिनमा युरोपबाट प्रत्यक्ष लगानी भित्र्याउन सकिने विश्वास व्यक्त गर्दै परराष्ट्रमन्त्री ज्ञवलीले नेपालको विकास र व्यापारमा युरोप महत्वपूर्ण साझेदार भएकाले नेपालका उत्पादनलाई युरोप प्रवेशमा छुट दिन आग्रह गरेको जनाए।
नयाँ सरकारको आर्थिक नीति, लगानी मैत्री वातावरण, समावेशी संविधानका बारेमा युरोपेली मुलुकले आफूसँग जिज्ञासा राखेको मन्त्री ज्ञवालीले बताए।
उनले भने, 'नेपाल भारत र चीनको अर्थतन्त्रबाट लाभान्वित हुन खोजिरहेको छ, त्यो आर्थिक साझेदारी र भूराजनीतिक सन्तुलनलाई साथसाथै लिएर नेपाल बढ्न खोजी रहेको विषयमा चासो रहेको मैले पाएँ।'
नेपालका विमान कम्पनीले आफ्ना सेवा बोइङबाट एयरबसमा रुपान्तरण गरिसक्दा समेत युरोपमा उडान भर्न नपाउँदा कठिनाइ भएको जानकारी गराउँदै यसलाई छिटोभन्दा छिटो हटाउन आग्रह गरेको ज्ञवालीले बताए।
पोर्चुगलका विदेशमन्त्रीसँग भएको प्रतिनिधिमण्डलस्तरको बैठकमा सम्बन्धलाई आगामी दिनमा थप सुदृढ तुल्याउने र सहयोगका क्षेत्र पहिल्याउन परामर्श समयन्त्र बनाउने विषयमा हस्ताक्षर भएको उनले जनाए।
मन्त्री ज्ञावलीले त्यहाँ ठूलो संख्यामा रहेका नेपालीको हितको निम्ति सहकार्यका साथ अघि बढ्ने बारे विचार विमर्श भएको बताए। बेल्जियम र लक्जेम्बर्गका आफ्ना समकक्षीसँगको वार्ता र छलफलमा लगानी अभिवृद्धि र व्यापार विस्तारका अतिरिक्त अन्तर्राष्ट्रिय मञ्चमा विकासशील देशको पक्षमा शान्तिका लागि साझा सहकार्य गर्ने विषयमा गहन छलफल गरेको मन्त्री ज्ञवालीले बताए।
युरोप भ्रमणका क्रममा मन्त्री ज्ञावलीले युरोपेली मुलुकमा रहेका नेपाली राजदूतलाई परिवर्तित सन्दर्भमा नेपालले अहिले अवलम्बन गरेको आर्थिक विकास र समृद्धिको लक्ष्यलाई परिपूर्ति गर्न र त्यसलाई सफल तुल्याउन तथा नेपालको छविलाई माथि उकास्ने ढंगले काम गर्न निर्देशन दिएका थिए।
युरोपियन इस्न्टिच्युट फर एसियन इस्ट्राटेडिजले आयोजना गरेको छलफलमा समेत भाग लिएका मन्त्री ज्ञावलीले त्यहाँ नेपालले प्राप्त राजनीतिक उपलब्धि र शान्ति कसरी दिगो बनाउने भन्ने विषयमा बोलेका थिए।
मन्त्री ज्ञवालीले गैरआवासीय नेपाली संघको युरोपस्तरीय क्षेत्रीय भेलाका सहभागीलाई संविधानले दिएको सामाजिक, आर्थिक र सांस्कृतिक अधिकारको पूर्णरुपमा उपयोग गर्दै अब सम्पूर्ण ध्यान नेपालको विकास र समृद्धिमा केन्द्रित गरेर कार्यक्रम अघि बढाउन सुझाव दिएका थिए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
