काठमाडौं– नेकपा एमाले र राष्ट्रिय प्रजातन्त्र पार्टीले मंसिर ४ गते हुने प्रतिनिधि सभा र प्रदेश सभाको निर्वाचनमा मित्रवत प्रतिस्पर्धा गर्ने र केही क्षेत्रहरुमा गठवन्धन गर्ने सहमति गरेका छन्।
राप्रपाका एक पदाधिकारीका अनुसार देशभर पूर्ण तालमेल भन्दा क्षेत्रगत गर्ने र बाँकी क्षेत्रमा मित्रवत प्रतिस्पर्धा गर्ने सहमति भएको हो। केही दिनदेखिको छलफलका क्रममा झापा, बाँके, रुपन्देही, चितवनको क्षेत्रमा सहमति भएको र अन्यको हकमा छलफल चलिरहेको ती नेताले बताए।
झापामा एमालेले प्रतिनिधि सभामा १ र प्रदेश सभामा १ सिट राप्रपालाई दिने सहमति भएको छ। राप्रपा नेताका अनुसार झापा–३ एमालेले राप्रपालाई छाड्ने छ। उक्त क्षेत्रमा राप्रपाका अध्यक्ष राजेन्द्र लिङ्देन प्रतिनिधि सभाको उम्मेदवार हुने छन्। अन्य क्षेत्रमा एमाले उम्मेदवार हुने छन् र राप्रपाले सहयोग गर्ने छ।
झापा–५ मा एमाले अध्यक्ष केपी शर्मा ओली, ४ मा लालप्रसाद (एलपी) साँवा लिम्बू, २ मा स्थायी कमिटी सदस्य देवराज घिमिरे र १ मा स्थायी कमिटी सदस्य अग्नि खरेललाई उम्मेदवार उठाउने एमालेको तयारी छ।
झापा–१ नेपाली कांग्रेसका महामन्त्री विश्वप्रकाश शर्माको क्षेत्र हो। बाँके–२ मा राप्रपा महामन्त्री धवल शमशेर राणालाई सहयोग गर्ने सहमति दुवै पार्टीका बीचमा भएको छ। उक्त क्षेत्रमा जनता समाजवादीले पनि दाबी गरिरहेको छ। सत्ता गठबन्धन छोडेर एमालेतिर सहमतिका लागि वार्तामा रहेको जसपाले उक्त क्षेत्रमा मोहम्मद इश्तियाक राईलाई उम्मेदवार बनाउने भनेको छ। २०७४ सालको निर्वाचनमा उनी एमालेका उम्मेदवार पशुपति दायल मिश्रलाई पराजित गर्दै विजयी भएका थिए।
एमाले–राप्रपाका बीचमा सहमति भएको अर्को क्षेत्र हो रुपन्देही–३। उक्त क्षेत्र एमाले नेता घनश्याम भुसालको हो। भुसाल उक्त क्षेत्रमा सिफारिस पनि भएका छन्। भुसाललाई यसपटक रुपन्देही–१ र ३ गरी दुई स्थानबाट सिफारिस गरिएको छ। तर, एमाले अध्यक्ष ओलीले भुसालको सिफारिसलाई खासै मन पराएका छैनन्। त्यसैले भुसालको क्षेत्र राप्रपालाई दिने सहमति भएको राप्रपाका एक नेताले बताए। त्यहाँ दीपक बोहरा उम्मेदवार हुनेछन्।
राप्रपा नेता बोहरा पञ्चायतकालदेखिका सदावहार उम्मेदवार हुन्। २०७० को संविधानसभा निर्वाचनमा उनी विजयी भएका थिए। २०७४ को निर्वाचनमा नेपाली कांग्रेसको सर्मथनमा उम्मेदवार भएका बोहरा थोरै मतले पराजित भएका थिए। एमालेका भुसालले ३२ हजार ८६६ मत ल्याउँदा बोहराले २७ हजार ४२२ मत पाएका थिए।
२०७० मा भने नेपाली कांग्रेसका नेता बालकृष्ण खाणले भुसाललाई ८६ मतले पराजित गरेका थिए। यस क्षेत्रबाट २०६४ सालमा पनि खाण नै विजयी भएका थिए।
त्यस्तै, राप्रपाले सहमति भएको दाबी गरेको अर्को क्षेत्र हो, चितवन–३। उक्त क्षेत्रमा माओवादी केन्द्रका अध्यक्ष पुष्पकमल दाहाल ‘प्रचण्ड’ २०७४ सालमा निर्वाचित भएका थिए। वाम गठवन्धनको उम्मेदवार बनेका प्रचण्डसँग नेपाली कांग्रेसको सहकार्यमा राप्रपाका उम्मेदवार विक्रम पाण्डे प्रतिस्पर्धी थिए। प्रचण्डले ४८ हजार २६९ मत प्राप्त गरेर विजयी भएका थिए भने पाण्डेले ३८ हजार ९४२ मत प्राप्त गरेका थिए। यस पटकको स्थानीय निर्वाचनमा एमाले र राप्रपाले तालमेल गरेका थिए भने मााओवादी र कांग्रेसले तालमेल गरेका थिए।
राप्रपाका अनुसार एमालेसँग शुक्रबार निर्णायक वार्ता हुँदैछ। राप्रपा अध्यक्ष लिङ्देन र एमाले अध्यक्ष ओलीका बीचमा नवलपरासी, हुम्ला, कपिलवस्तु, सिन्धुपाल्चोक र अन्य केही जिल्लामा तालमेल गर्ने विषयमा छलफल हुने र शुक्रबार नै टुङ्ग्याउने ती नेताले बताए। राप्रपाले काठमाडौं–२ मा पनि दाबी गरिरहेको छ।
राप्रपाका महामन्त्री भुवन पाठकले एमालेसँगको छलफल सकारात्मक नै रहेको र शनिबारसम्म उम्मेदवाररको अन्तिम तय हुने बताए। उनले कति क्षेत्र भन्ने विषयमा दुवै पक्ष छलफलमै रहेको बताए। उनले देशभरका सबै निर्वाचन क्षेत्रमा तालमेल नगर्ने र केही क्षेत्रमा मात्र सहमति गरेर अन्यमा मित्रवत प्रतिस्पर्धा हुने जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
