काठमाडौं– एक वर्षअघि तत्कालीन गृहमन्त्री जनार्दन शर्माले साउन महिनाभित्रै ठमेल, दरबारमार्ग लगायतका क्षेत्र २४ घन्टा खुलाउने योजना सार्वजनिक गरे। योजना कार्यान्वायन नहुँदै उनी जिम्मेवारीबाट हटे।
त्यस्तै, अहिलेका गृहमन्त्री रामबहादुर थापा ‘बादल’ले पनि वैशाख महिनाभित्र पर्यटकीय क्षेत्र ठमेल र दरबारमार्ग २४ घन्टा खुलाउने योजना अघि बढाए। उनको योजना पनि अघि बढ्न सकेको छैन। वैशाखभित्र त कुनै तयारी नै भएन, साउन १५ गतेदेखि २४ घन्टा खुलाउने तयारी भए पनि फेरि कार्यान्वायन रोकिएको छ। पर्यटकीय बजार २४ घन्टा खुलाउने निर्णय यसपटक पनि अलपत्र परेको छ।
पूर्वाधारको अभावका कारण ठमेल र दरवारमार्ग २४ घन्टा खुलाउने निर्णय आजदेखि लागू गर्न नसकिएको महानगरीय प्रहरी परिसर काठमाडौंका डिएसपी मोहन थापाले बताए। सबैतिर सिसिटिभी जडान नभएको र थप प्रहरी जनशक्ति समेत उपलब्ध नभएकाले सो योजना लागू हुन नसकेको प्रहरी अधिकारीहरु बताउँछन्। यसैगरी, यो योजनामा जिल्ला प्रशासन कार्यालय काठमाडौं र महानगरपालिकाले पनि चासो दिएको छैन।
जिल्ला प्रशासन कार्यालय काठमाडौंले साउन १५ देखि ठमेल र दरबारमार्ग २४ घन्टा खुलाउने बताएको थियो। सहायक प्रमुख जिल्ला अधिकारी बासुदेव घिमिरे संयोजकत्वको समितिले एउटा प्रतिवेदन समेत बुझाएको थियो।
सो समितिले जयनेपाल चोकदेखि केशरमहल चोक, केशरमहल चोकदेखि लैनचौर, लैनचौरदेखि मनाङ होटल चोक, मनाङ होटल चोकदेखि सोह्रखुट्टे ओरालो हुँदै क्षेत्रपाटी चोक समेत २४सै घन्टा खुलाउन सिफारिस गरेको थियो। त्यस्तै, क्षेत्रपाटी चोकदेखि जेपी मोड हुँदै ज्याठा चोक, ज्याठा चोकदेखि जमल चोक, जयनेपाल चोकदेखि कृष्णपाउरोटी, काठमाडौं प्लाजा हुँदै महेन्द्र सालिक चोकसम्मका स्थानमा २४ घन्टा व्यवसाय सञ्चालन गर्न दिन सकिने उल्लेख थियो।
जिल्ला प्रशासन कार्यालयले २४ घन्टा खुला गर्ने उक्त क्षेत्रमा रात्रिकालीन मनोरञ्जनमूलक सेवा (क्लब, डिस्कोथेक, पव, डान्सबार, दोहोरी, मसाज), होटल तथा गेस्टहाउस, डिपार्टमेन्टल स्टोर, रेष्टुराँ, क्याफे, बार, कफी तथा केक सप, किराना पसल, यातायात सेवा (ट्याक्सी, बस र पेट्रोलपम्प), मेडिकल सेवा, बैंकिङ सेवा (विदेशी मुद्रा सटही काउन्टर, एटिएम) हुनुपर्ने उल्लेख गरिएको छ।
सो समितिले सय जनाभन्दा बढी क्षमता भएका स्थानमा प्राथमिक उपचारका सामग्रीसहित एकजना पारामेडिकल राख्नुपर्ने सिफारिस गरेको थियो।
सरकारले सन् २०२० लाई ‘भिजिट नेपाल इयर– २०२०’ मनाउन लागेको छ। यस्तो अवस्थामा विदेशीप पर्यटकलाई आकर्षित गर्न मुख्य बजार २४ घन्टा खुलाउनुपर्ने माग पर्यटन व्यवसायीले राख्दै आएका छन्।
यी क्षेत्रमा हाल केही डिस्कोहरु राति २ बजेसम्म सञ्चालन हुने गरेका छन्। डिस्को तथा दोहोरी लगायत १२ बजेसम्म खुल्छन्। केहीले अदालतबाट आदेश लिएर ढिलोसम्म चलाउने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
