सिड्नी– गैरआवासीय नेपाली संघ (एनआरएनए) को आयोजनामा चौथो विश्व स्वास्थ्य सम्मेलन सुरु भएको छ। सम्मेलनमा विश्वभरका नेपाली स्वास्थ्यकर्मी तथा चिकित्सकहरु प्रत्यक्ष तथा अनलाइनबाट सहभागी भइरहेका छन्।
सेप्टेम्बर १६ देखि १८ सम्म अस्ट्रेलियाको सिड्नीमा आयोजना भइरहेको सम्मेलनको मुख्य नारा ‘सबैका लागि मानसिक स्वास्थ्य तथा सुदृढ स्वास्थ्य सेवा वितरण प्रणाली’ रहेको छ।
एनआरएनएको स्वास्थ्य समितिका अध्यक्ष डा सञ्जीव सापकोटाले सम्मेलन १०० भन्दा बढी देशमा रहेका नेपाली स्वास्थ्यकर्मीहरुलाई एउटै छानामुनि ल्याउने विश्वकै ठूलो भेला भएको बताए। एनआरएनए अस्ट्रेलिया, नेपाल चिकित्सक संघ, नेपाल नर्सिङ एसोसिएसन तथा स्टार्स स्कलर्स नेटवर्क लगायतको साझेदारीमा उक्त सम्मेलन आयोजना गरिएको हो।
सम्मेलनमा विभिन्न देशमा कार्यरत नेपाली स्वास्थ्य विज्ञहरुको कार्यपत्र प्रस्तुति, स्वास्थ्यसम्बन्धी परियोजनाहरूको घोषणा, साझेदारहरूसँगको सहकार्य र स्थानीय अस्ट्रेलियाली समुदायका लागि स्वास्थ्य परीक्षण लगायतको गतिविधि पनि हुने डा. सापकोटाले बताए।
सम्मेलनको पहिलो दिन शुक्रवार डा. दिनेश ज्ञवालीले मानसिक स्वास्थ्यको लागि मानार्थ र एकीकृत दृष्टिकोण विषयक कार्यपत्र पेस गरे। त्यस्तै विमला सापकोटाले महिलामा देखिने स्वास्थ्य समस्या, तिनको रोकथाम र व्यवस्थापन, डा सुनिल साह र डा सञ्जय यादवले दिगो मानसिक स्वास्थ्य विकासका लागि बहुघटक कार्यक्रमहरुको एकीकरण, डा. प्रभात अधिकारीले अवसर र अवरोध, डा. नितेश अर्यालले नेपालमा ज्येष्ठ नागरिकको स्वास्थ्य समस्या र डा नवराज केसीले ग्रामीण क्षेत्रमा बाल रोगबारे प्रस्तुति दिएका थिए।
संघका केन्द्रीय अध्यक्ष कुल आचार्यले प्रवासमा कार्यरत नेपाली चिकित्सक लगायत स्वास्थ्य जनशक्तिले भूकम्प र कोभिडको बेला नेपालमा ठूलो सहयोग गरेको बताए। उनले नेपालको स्वास्थ्य प्रणालीको विकास गर्न प्रवासमा कार्यरत नेपाली जनशक्तिलाई परिचालन गर्न संघले संस्थागत रुपमा काम गरिरहेको पनि जनाए।
३ दिन सम्म चल्ने सो सम्मेलन सिड्नी घोषणापत्र जारी गर्दै आइतबार सम्पन्न हुने गैरआवासीय नेपाली संघले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751267101.jpg)
-1751273553.jpg)
-1749826086.png)
