काठमाडौं– कञ्चनपुरकी १३ वर्षीया बालिका निर्मला पन्तको बलात्कारपछि हत्या घटनामा दोषीलाई कारबाहीको माग गरेका छन्।
प्रतिपक्षी नेपाली कांग्रेसका सांसदहरुले दोषीमाथि कारबाहीको माग गरे भने सत्तापक्षका सांसदहरुले लासमाथि राजनीति नगर्न आग्रह गरे।
आइतबारको संसदमा शून्य र विशेष समयमा बोल्ने सांसदहरुले आफ्नो धारणा राखेका छन्।
केही सांसदहरुले राखेका धारणाको सम्पादित अंशः
डिला संग्रौला पन्त, कांग्रेस
निर्मला पन्तको ट्युसन पढेर घर फर्कने बेलामा सामूहिक बलात्कार गरी घाँटी थिचेर मारेर नजिकैको उखुबारीमा मृत अवस्थामा फेला परेकी छन्। पिडित परिवार, नागरिक समाज र बुद्धिजीवीहरु उनका न्यायको लागि संघर्षमा छन्। उनलाई न्याय दिनुको सट्टा सरकार दमन र शोषणमा उत्रिएको छ। पन्तको हत्यारा र दोषीलाई कडाभन्दा कडा कारबाहीको माग राख्न चाहन्छु।
दीपकप्रकाश भट्ट, नेकपा
तीन दिनअगाडि जब त्यो घटना घट्यो। पन्तको बलात्कारपछि हत्या भएको घटना जानकारीमा आएपछि त्यो घटनाको अनुसन्धान गर्न प्रहरी प्रशासन र राजनीतिक दलहरु जब छलफल गरिरहेका थिए। परिवारका सदस्यहरुलाई अनुसन्धानमा सहयोग गर्नका लागि आग्रह गर्दागर्दै पनि अहिलेसम्म परिवारका सदस्यहरुले हामी लास बुझ्छौं भन्दाभन्दै पनि लास बुझ्न दिइएको छैन। स्वभाविक रुपमा मानवीय संवेदना हराउँदै गएको र मानवीयतामा नै प्रश्न चिह्न उठ्नेगरी जुन घटना घटिरहेका छन्। यसमा हामी गम्भीर हुनु जरुरी छ। तर लासमाथि राजनीति गर्ने संकीर्ण सोचले यस्ता कामहरुलाई समयमै सम्बन्धित अपराधीहरुलाई सर्वस्व सहित… । (समय सकिएको)
निरुदेवी पाल, नेकपा
म त्यस्तो देशको नागरिक हुँ, जहाँ हरेक तीनमध्ये एक महिला हिंसामा पर्छन्। यो महिला बालबालिका मन्त्रालयका सचिवले पेश गरेको प्रतिवेदनमा छ। म निर्मला पन्तको विषयमा कुरा उठाउन चाहिरहेको छु। जसको लास अस्तिमात्रै उखुबारीमा भेटिएको छ। हामी भन्न चाहन्छौं कि त्यो लासमाथि राजनीति नगरियोस्। पिडकलाई कारबाही गरियोस् र पिडितलाई न्याय दिइयोस्। तर तिनै महिलामाथि राजनीति गर्ने कतिपय राजनीतिक दलहरुलाई म भन्न चाहन्छु, तपाईंहरुले राजनीति त्यो लासमाथि होइन, त्यसरी नगर्नुस्। दोषीहरुलाई कडाभन्दा कडा कारबाही गरियोस्। सर्वस्वसहित कडाभन्द कडा कारबाही गरियोस्।
पूर्णकुमारी सुवेदी, नेकपा
निर्मलाको हत्याको विषयले साह्रै नै दुखी बनाएको छ। यसको बारेमा छानबिन गरेर दोषीमाथि कडाभन्दा कडा कारबाही गरियोस्।
प्रमिला राई, कांग्रेस
प्रत्येक दिनजसो महिला तथा बालबालिकामाथि हिंसा भएको छ। र बलात्कृत भइरहेका छन्। त्यस्तै, यही १० गते बिहीबार निर्मला पन्तको सामूहिक बलात्कारपछि विभत्स हत्या गरिएको छ। र चारचार दिनसम्म त्यो हत्यारालाई पक्रिन नसकेको खबर हामीले सुनिरहेका छौं। छिटोभन्दा छिटो दोषीहरुलाई पक्रेर हदैसम्मको कारबाही गरी पिडितहरुलाई उचित क्षतिपूर्ति सरकारबाट प्राप्त होस्।
उमा रेग्मी, कांग्रेस
हामीले पटकपटक यो हाउसमा भनेका छौं। ७७ वर्षिया वृद्धादेखि साढे २ वर्षिया बालिकासम्म शृंखलाबद्ध रुपमा बलात्कृत भइरहेको छ। यसै शृंखलामा कञ्चनपुरमा १३ वर्षिया निर्मलाको बलात्कार भएको छ। बलात्कार भएपछि जनता आन्दोलित भए। सरकारले बलात्कारीलाई खोजेर कारबाही गर्नुको साटो जनतालाई कारबाही गरेको छ। जनतामाथि लाठी बर्साएको छ। धरपकड गरेको छ। आन्दोलित जनतालाई धरपकड गर्ने, अनि यहाँ लासमाथि राजनीति नगर भन्ने? लासको राजनीति गर्ने पार्टी नेपाली कांग्रेस होइन। त्यहाँका जनता होइनन्। बलात्कारीलाई खोजी गरेर हदैसम्मको कारबाही होस्। आज भारतमा पनि मृत्युदण्डको व्यवस्था छ, अमेरिकामा पनि छ। कानुन संशोधन र निर्माण गरेर मृत्युदण्डसम्मको कारबाही गर्नुपर्छ, बलात्कारीलाई।
भरतकुमार साह, कांग्रेस
कञ्चनपुरमा निर्मला पन्तको बलात्कार भएको छ। त्यो जघन्य अपराध हो। योभन्दा ठूलो अपराध अरु हुनसक्दैन। भारतमा यस्तो घटनामा मृत्युदण्डको प्रावधान छ। यहाँ पनि सरकारले अपराधीहरुलाई तुरुन्तै पक्रेर कारबाही गरोस्। ढिलासुस्ती नगरोस्। सरकारले ढिलासुस्ती गर्छ भने हामी कुनै हालतमा छाड्ने छैनौं। हामी लासमा राजनीति गर्दैनौं। लासमा राजनीति गर्ने पार्टी नेपाली कांग्रेस होइन। हामी अपराधीलाई कारबाही होस् भन्ने चाहन्छौं। ढिला नहोस्, पिडितले न्याय पाउन्। अपराधीहरुलाई नेपालको कानुनले दिएको ठूलोभन्दा ठूलो कारबाही होस्।
भैरवबहादुर सिंह, नेकपा
निर्मला पन्तको हत्याराहरु, बलात्कारीहरुलाई कानुनको कठघरामा उभ्याएर कडा कारबाही होस्।
रंगमति शाही, कांग्रेस
निर्मला पन्तको सामूहिक बलात्कारपछि हत्या भएको छ। संसदमा जवाफ दिनेबेला प्रधानमन्त्रीले भन्नुभएको थियो, जब घटना हुन्छ, त्यहाँ सरकार दौडिहाल्छ, पुगिहाल्छ, हामी न्याय दिइहाल्छौं भनेर जवाफ दिनुभएको थियो। तर आज चारचार दिनसम्म सुनुवाइ पनि भएको छैन। हत्यारा पत्ता लागेको छैन भनेर प्रहरीले अगाडि बढाउनुभएको छैन। त्यसको साटो न्याय माग्ने महिलाहरुलाई निर्ममतापूर्वक लाठी प्रहार गरेको छ। यसको घोर भर्त्सना गर्दै दोषीमाथि कारबाही होस् भन्ने जोडदार माग गर्दछु।
सरिता गिरी
बलात्कार भयो, हत्या भयो। त्यो आफ्नो ठाउँमा छ। हिजोदेखि जनता सडकमा उत्रिएका छन्। आन्दोलित छन। प्रहरी प्रशासनबाट केही व्यक्तिलाई गिरफ्तार गरेको कुरा आइरहेको छ। मैले अनलाइनमा देखें, जुन ठाउँमा बालिकाको मृत शरीर पल्टेको छ। त्यहाँ अधिकृतहरु उभिनुभएको छ। र त्यो बालिकाले लगाएको ट्राउजरलाई खाल्डोमा रहेको पानीमा पखालेको छ। यो प्रमाण मेटाउने अपराध हो। सरकारी अधिकारीहरुको संरक्षणमा।
त्यसैले जसले बलात्कार गरेको छ, त्यो आफ्नो ठाउँमा छ। तर सरकारको मातहतमा सम्बन्धित प्रमाणहरु मेटाउने काम गरिएको छ भने त्यो भन्दा पनि गम्भीर अपराध हो। म माग गर्छु, गृहमन्त्रीले तुरुन्त सभामा जानकारी गराउन्। किनभने, त्यहाँ स्थानीय जनताहरु कुटाइ खाइरहेका छन्। पुलिसले निर्ममतापूर्वक लाठी प्रहार गरिरहेको छ। स्थानीय जनताले सूचना मागिरहेका छन्। स्थानीय जनतामाथि अर्को अन्याय भइरहेको छ।
लक्ष्मी परियार, कांग्रेस
निर्मला पन्तलाई सामूहिक बलात्कार गरेर मृत अवस्थामा उखुबारीमा फालिएको अवस्थामा भेटिएको छ। त्यो बलात्कार गर्ने अपराधीलाई कारबाही माग गरेर त्यहाँका महिलाहरु, नागरिक समाजहरु सडकमा उत्रिएका छन्। यसरी कारबाही गर भनेर उत्रिने समूहलाई नेपाल सरकारले दमन गरेर, प्रहरीले लाठी चार्ज गरिरहेको छ। यसको म घोर भर्त्सना गर्दछु। मलाई अचम्म लाग्यो, यहाँ सांसदहरुले लासमा राजनीति गरेको कुरा उठाउनुभयो। हामीलाई थाहा छ, कुन राजनीति कुन पृष्ठभूमिको हो भनेर।
बिना बुढाथोकी
यस्तो घटनामा कडाभन्दा कडा कानुन ल्याई अबोध बालिकादेखि वृद्धा आमासम्म सबैलाई अमनचयन र शान्ति सुरक्षाको प्रत्याभूति गराउन जरुरी छ। चाँडोभन्दा चाँडो अपराधीलाई कानुनी दायरामा ल्याई कडा कारबाहीको माग गर्दछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
