काठमाडौं– नेपालबाट रोजगारीका लागि कामदार मलेसिया जाने प्रक्रिया बन्द भएको विषयमा मलेसियामा चौतर्फी आवाज उढ्न थालेको छ।
रोजगारीका लागि मलेसिया जाने नेपाली कामदारसँग चर्को रकम असुल्ने ६ संस्थालाई अवैधानिक ठहर गर्दै नेपाल सरकारले खारेज गरेपछि मलेसिया जाने नेपाली कामदारको श्रम स्वीकृति रोकिएको थियो।
यस विषयमा मलेसियाका सम्बन्धित निकायमा चर्को आवाज उढ्न थालेको छ। मलेसियाली सञ्चार माध्यमहरूमा समाचार प्रकाशित भएअनुसार नेपाली कामदारलाई मलेसिया जान रोक लगाइएको विषयमा नेपालभन्दा मलेसिया सरकारले धेरै चासो देखाउन थालेको हो।
मलेसियाली अंग्रेजी दैनिक ‘द स्टार’सँगको अन्र्तवातामा मलेसियाका मानव संशाधन मन्त्री कुलासेगरनले रोजगारीका लागि मलेसिया जाने नेपाली कामदारमाथि विभिन्न संस्थाले लगाउँदै आएको आर्थिक भार तथा सिण्डिकेट हटाउने विषयमा सरकार प्रष्ट रहेको बताएका छन्। नेपालले कामदार रोकेको निर्णयमाथि पुर्नविचार गर्न समेत मन्त्री कुलासेगरनले नेपाल सरकारलाई आग्रह गरेका छन्। यो विषयमा नेपालमा सरकारसँग खुल्ला छलफल गर्ने मन्त्रीले अन्र्तवाताका क्रममा बताएका थिए।
नेपाल सरकारले सबै प्रक्रिया मिलाएर युवालाई मलेसिया पठाउने सम्बन्धमा काम गरिरहेका बेला मलेसिया सरकारले नै त्यहाँ जान चाहने कामदारको प्रक्रिया नरोक्न अपिल गरेको हो।
गएको एक सातादेखि मलेसियाका सञ्चार माध्यमहरुले नेपाली कामदार रोकिएको विषयलाई उच्च प्रथामिकता दिई समाचार सम्प्रेषण गर्न थालेपछि त्यहाँस्थित सरकारले पनि चासो लिन थालेको हो।
सोमबार मलेसियाकाे मन्त्रिपरिषद् बैठकमा छलफल हुने
मलेसियाका रोजगारदाता कम्पनी, संसद र सरकारले नै नेपाली कामदारको आपूर्ति बन्द भएको विषयमा एक सातादेखि चासोका साथ छलफल गरिरहेका मलेसियास्थित नेपाली दूतावासका कार्यवाहक प्रमुख कुमारराज खरेलले जानकारी दिए।
नेपाली कामदारको आपूर्ति रोकिएको विषयमा सोमबार मन्त्रिपरिषद् बैठकमा छलफल गर्ने आश्वासन मन्त्री कुलासेगरनले दिएको खरेलले बताए।
मलेसियाका रोजगारदाताहरुले मलेसियाका सरकारी निकायमा पुगेर नेपाली श्रमिक ल्याउने व्यवस्था मिलाउन दबाव सिर्जना गरेको कार्यवाहक राजदूत खरेलको भनाइ छ।
पछिल्लो समय कतिपय रोजगारदाता कम्पनीले मन्त्री कुलासेगरनलाई भेटेरै उद्योग व्यवसायहरुमा कामदारको अभाव हुनसक्ने बताउँदै उक्त समस्याको समाधान तत्काल खोज्न आग्रह गरेका छन्।
मलेसिया जाने नेपाली श्रमिकसँग विभिन्न नाममा झन्डै १९ हजार असुल्ने गरिएको थियो। श्रम, रोजगार तथा सामाजिक सुरक्षा मन्त्रालयले मलेसिया रोजगारीमा जाने कामदारमाथि आर्थिक भार थप्दै आएका बायोमेट्रिक, भिएलएन, माइग्राम्स, जिएसजी, वानस्पट सेन्टर र ओएसी बन्द गर्ने निर्णय गरेसँगै त्यहाँ जाने कामदारको प्रक्रिया समेत बन्द भएको थियो।
नेपाली दूतावासमार्फत करिब २७ हजार डिमान्ड प्रमाणिकरण
सरकारले नेपालबाट रोजगारीका लागि मलेसिया जाने युवाको नयाँ श्रम स्वीकृति तथा प्रक्रिया गत जेठ ३ गतेदेखि नै बन्द गरेको छ। तर, मलेसियास्थित नेपाली दूतावासबाट भने नयाँ कामदारको माग प्रमाणीकरण गर्ने क्रम जारी नै रहेको छ।
नयाँ श्रम स्वीकृति जारी गर्न बन्द गरेपछिको २ महिनाको अवधिमा दूतावासले करिब २७ हजार नयाँ कामदारको माग प्रमाणीकरण गरेको जनाएको छ।
‘मलेसियाका रोजगारदाता कम्पनीबाट आएका नयाँ कामदारको माग प्रमाणीकरण गर्ने काम रोकिएको छैन। नेपाल सरकारले नयाँ श्रम स्वीकृति जारी गर्न बन्द गरेपछिको २ महिनाको अवधिमा करिब २७ हजार नयाँ कामदारको माग प्रमाणीकरण गरिएको छ।’, कार्यवाहक राजदूत खरेलले भने।
परराष्ट्र मन्त्रालय र श्रम मन्त्रालयबाट नयाँ कामदारको नयाँ प्रमाणीकरण रोक्न आधिकारिक पत्र प्राप्त नभएकाले सो काम भइरहेको राजदूत खरेलले प्रस्ट पारे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
