काठमाडौं– प्रस्तावित प्रधानन्यायाधीश दिपकराज जोशीको संसदीय सुनुवाई आज हुँदै छ। उक्त सुनुवाईका लागि संसदीय सुनुवाई समितिले आवश्यक तयारी पुरा गरेको छ।
विगतमा फितलो र अध्ययनविनाको प्रस्तुति तथा प्रश्न सोधार्इका कारण संसदीय सुनुवाईको आलोचना भएकाले यस पटक समितिले अघिल्लै दिन तयारी गरेको हो।
समितिले जोशीका लागि मुख्यरुपमा ४० प्रश्न सोध्ने तयारी गरेको छ। जोशीलाई १५ सदस्य रहेको समितिका सबै सांसदले आलो–पालो पद्धतिबाट यी प्रश्नहरु राख्ने बताइएको छ। मंगलबार र बुधबार उजुरीकर्तासँग छलफल गरेपछि समितिले उनलाई सोध्ने प्रश्नहरुको तयारी गरेको हो।
संसदीय सुनुवाईमा पहिलो पटक व्यवस्थित रुपमा यसरी प्रश्न निर्माण गरिएको हो। यसअघि सांसदहरुले आफ्नो मनखुसि रुपमा प्रश्न सोध्दै आएका थिए। यसरी सांसदहरुले प्रश्न सोध्दा विषय र सुनुवाईको औचित्यभन्दा बाहिर गएपछि यसलाई व्यवस्थित गर्न समितिले यस्तो प्रक्रिया अवलम्वन गरेको समितिका जेष्ठ सदस्य लक्ष्मणलाल कर्णले बताए। ‘विगतमा संसदीय सुनुवाईको निकै आलोचना भएकाले यसपटक अघिल्लै दिन प्रभावकारी तयारी गरिएको छ।’, उनले भने।
समितिमा दर्ता भएका उजुरीमध्ये एनसेल प्रकरणका विषयमा सांसदहरुले चासो व्यक्त गरेपछि यसलाई पहिलो प्रश्नको रुपमा राखिएको छ।
बैठकमा सहभागी एक सांसदका अनुसार देशलाइ ठूलो राजश्व नोक्सान गर्ने उक्त आदेशको बारेमा गम्भीर उजुरी परेकाले एनसेल प्रकरण पहिलो नम्बरको प्रश्नमा राखिएको हो।
त्यसैगरी, क्यासिनो र अन्य करका मुद्दामा छुट दिने आदेश किन भयो?, कर फर्स्याैट आयोगमा रहँदा अर्बौं राजस्व छुट दिएका चुडामणी शर्मालाई किन सामान्य धरौटीमा रिहा गरियो?, हाडिगाउँ र अन्य स्थानका सार्वजनिक जग्गा व्यक्तिको नाममा हुने भनि कसरी फैसला भयो? जस्ता प्रश्नहरु राखिएको छ। त्यस्तै, जोशीको शैक्षिक प्रमाणपत्रको बारेमा समेत उजुरी परेकाले यसको बारेमा प्रष्ट पार्न समेत आग्रह गर्ने तयारीमा समिति रहेको छ।
प्रधानमन्त्री र प्रधानन्यायाधीश निवास बालुवाटारसँगै जोडिएको सार्वजनिक जग्गा व्यक्तिका नाममा हुनेगरी आदेश गर्नेमध्येका एक जोशी भएकाले उक्त विषयमा पनि प्रश्न गरिने भएको छ।
मुआब्जा समेत वितरण भइसकेको अवस्थामा सार्वजनिक जग्गा व्यक्तिको नाममा हुने आदेश मौजुदा भूमिसुधार ऐन विपरीत भएको भन्दै जोशीमाथि उजुरी परेको थियो। सो सम्बन्धमा समेत समितिले जोशीको जवाफ लिने बताइएको छ।
न्यायालयमा देखिएको भ्रष्टाचार र विचौलियाहरुको नियन्त्रणका लागि के–कस्ता योजना छन्? जस्ता न्यायालयको सुधार सम्बन्धका प्रश्नहरुसमेत समितिले तयार पारेको छ। मुख्यरुपमा सार्वजनिक भएका र उजुरी परेका विवादहरुमा प्रश्न तयार गरिएको र सुनुवाईका क्रममा थप अन्य प्रश्न पनि समावेश हुने नेपाली कांग्रेसका सांसद ज्ञानेन्द्रबहादुर कार्कीले बताए। समग्र न्यायालय र सुनुवाई समितिको स्तरीयता कायम हुने गरी सुनुवाई हुने कार्कीले बताए।
आज समितिको बैठकमा जोशीलाई १ बजे बोलाइएको छ। बैठकमा सांसदहरुले जोशीसँग प्रश्न गर्नेछन्। दुई तिहाईले उनलाई अस्वीकार गर्न सक्नेछन्। तर हालसम्म यस्तो नजिर नभएकाले अस्वीकार हुने सम्भावना देखिँदैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
