काठमाडौं– काठमाडौं महानगरपालिकाका मेयर बालेन्द्र शाह यतिबेला एक्सनमा उत्रिएका छन्। फोहोर उठाउन नसकेकोमा आलोचित शाहले अहिले पार्किङ । फुटपाथ व्यवस्थित बनाउन साथै अवैधानिक संरचना हटाउन पहल थालेका छन्।
यसैगरी काठमाडौं महानगरपालिकाभित्र अवैध रुपमा बनाइएका संरचना भत्काउन डोजरसहित फिल्डमा उत्रिएका हुन्। बुधबार मात्रै उनी महानगरको टोलीसँग काठमाडौं मल र आर बी कम्प्लेक्सका 'अवैधानिक संरचना' भत्काउन पुगे भने कोटेश्वरमा चेतावनी दिएर फर्केका छन्।
अण्डर ग्राउण्ड पार्किङमा पहल
मेयर शाहले दुई दिनअघि बानेश्वर प्लाजाको अण्डरग्राउन्डमा राखिएका पसलहरू खाली गराए। सोमबार नगर प्रहरीले ट्राफिक प्रहरीको सहयोगमा अन्य अन्डर ग्राउन्ड पार्किङको नक्सा पास गराएका भवनलाई पनि हटाउन निर्देशन दियाे।
अन्डरग्राउण्ड पार्किङको नक्सा पास गरेर त्यस्ता स्थललाई व्यापारिक प्रयोजनमा भाडामा लगाइएका छन्, जसले सडकमा पार्किङको चाप बढेको छ। त्यस्तो कार्य नगर्न र हटाउन महानगरले यसअघि नै सूचना जारी गरेको थियो। ३५ दिने म्याद सकिएसँगै महानगरले सोमबार स्थलगतरूपमा कारबाही थालेको हो।
साउन तेस्रो साता मेयर शाहले अनुगमन गर्दै त्यस्ता पसल हटाउन निर्देशन दिएका थिए। मेयर शाहले यसअघि नेपाल प्रहरी र ट्राफिक अधिकारीहरूसँग पनि सल्लाह गरेका थिए। अन्डर ग्राउण्डमा बनेका पार्किङलाई व्यवसायीहरूले अन्य प्रयोजनका लागि प्रयोग गर्दा सडकमा पार्किङ गर्ने, ट्राफिक जाम बढ्ने, सवारी दुर्घटना निम्तिने भन्दै उनी एक्सनमा उत्रेका हुन्।
काठमाडौं मल र आरबी कम्प्लेक्समा डोजर
बुधबार सुन्धारास्थित काठमाडौं मल तथा आरबी कम्प्लेक्सका केही संरचना भत्काइयो। नगर प्रहरी तथा सुरक्षाकर्मीसहित बालेन आफैं डोजर लिएर अनधिकृत संरचना हटाउन पुगे। काठमाडौं मल र आरबी कम्पलेक्ससँगै बनेका टहराका कारण सहरको सौन्दर्य कुरुप भएको र फुटपाथ मिचिएका कारण हिड्नमा समस्या सिर्जना भएको उनकाे भनाइ छ।
उनले न्यूरोड, दरबारमार्ग र बबरमहल क्षेत्रमा अनधिकृत रुपमा बनाइएका संरचना भत्काएका छन्। कोरोना कहरका कारण व्यापार ठप्प भएको र दशैंसम्म भए पनि काम गरेर खान दिन व्यापारीहरुले अनुरोध गरेका थिए । तर शाहले ३५ दिनअघि नै सूचना जारी गरिसकेकाले अब सम्झौता गर्न नसक्ने जवाफ फर्काए। उनले भने, ‘त्यसको क्षतिपूर्ति भाडामा लगाउनेहरुले भर्नुपर्छ।’
काठमाडौं महानगरपालिकामा स्वतन्त्र तर्फबाट मेयर पदमा विजयी बनेका शाहले नक्सा पास नगरी बनाइएका संरचना हटाएरै छोड्ने प्रतिबद्धतासमेत व्यक्त गरेका छन्।
काठमाडौं महानगरपालिकाले शहरी व्यवस्थापन विभाग (भवन निर्माण इजाजत विभाग) बाट जमिनको तल्ला, बेसमेन्टमा गाडी पार्किङ जस्ता प्रयोजनका लागि नक्सा स्वीकृत गरिएको बताएको छ। तर त्यस्ता भवनको निर्माण सम्पन्न पश्चात् प्रयोगमा ल्याएका केहीले स्वीकृति बमोजिम बेसमेन्ट, सेमी बेसमेन्ट, गोदाम र भुइँ तल्लाका नक्साअनुसार प्रयोग नगरेको पाइएको महानगरले जनाएको छ।
अन्य प्रयोजनमा प्रयोग भइरहेकाले स्वीकृति अनुसार प्रयोग नगरे कारबाही गरिने चेतावनीसहित ३५ दिने सूचना जारी गरिएको थियो।
सुरुमा उनी काठमाडौंको थापाथलीस्थित नर्भिक अस्पतालका अनधिकृत संरचना भत्काउन गएका थिए। तर नर्भिकसँग भने मौखिक सहमति गरेर फर्किएका हुन्। अस्पताल जस्तो संवेदनशील ठाउँका लागि केही समय दिनुपर्ने बुझाइअनुसार उनी फर्किएका हुन्। पछि अदालतले भत्काउने निर्णय रोकिदिएको थियो।
काठमाडौं जिल्ला अदालतलाई पत्र
फुटपाथ व्यापारीहरुलाई हटाउने कामबाट सुरु गरेका मेयर शाहले जिल्ला अदालत काठमाडौं पनि नक्सा जारी नगरी बनाएको भन्दै ३५ दिने सूचना दिएको बताएका छन्। उनले यदि जिल्ला अदालतलेसमेत चित्त बुझ्दो जवाफ नदिए जिल्ला अदालत काठमाडौंको संरचनासमेत भत्काउने चेतावनी दिएका छन्।
जिल्ला अदालत काठमाडौंको भवनको कागजपत्र नभेटिएपछि काठमाडौं महानगरपालिकाले पत्र काटेको छ। जिल्ला अदालतको भवन निर्माणका विषयमा महानगरबाट पत्र आाएको जिल्ला अदालतका एक कर्मचारीले पुष्टि गरेका छन्। पत्रमा के रहेको छ व्यहोराका विषयमा छलफलपछि सार्वजनिक गर्न मिल्ने भएकाले अहिले भवनको नक्सापास लगायत अन्य विवरण माग गरिएको उनले बताए।
महानगरपालिकाले जिल्ला अदालत काठमाडौंलाई नक्सा पास भएको विवरण खोजी गर्दा नभेटेपछि त्यसमाथि आवश्यक कारबाही सुुरु गर्नुअघि सफाइ पेस गर्नका लागि पत्र पठाएको जनाएको छ। महानगरपालिकाले अदालतको भवनको नक्सा पासको रेकर्ड नदेखिएकाले अदालतसँग भए पठाउन माग गरेको मेयर बालेन शाहका स्वकीय सचिव भूपदेव शाहले बताए।
पत्र पठाएको तर कुन मितिमा पठाइएको भन्ने विषयमा भने आफूलाई थाहा नभएको शाहले बताए।
फोहोर फाल्ने ठाउँमा सीसीटीभी जोड्ने
महानगरपालिकाका मेयर शाहले उपत्यकामा रातको समयमा जथाभावी फोहोर फाल्नेलाई सीसीटीभी क्यामेरा हेरेर कारबाही गर्ने चेतावनी दिएका छन्। फोहोरको समस्या व्यवस्थित हुँदै गएको बताउँदै केही समयमै उक्त काम हुने बताएका हुन्।
बुधबार नेपाल प्रहरीले आयोजना गरेकोे उपत्यकास्तरीय अपराध अनुसन्धान समीक्षा गोष्ठीमा शाहले अहिले उपत्यकामा रहेको फोहोरको पूर्ण व्यवस्थापनलगत्तै ट्राफिक प्रहरीको समन्वयमा सीसीटीभी हेरेर जथाभावी फोहोर फाल्ने व्यक्तिलाई कारबाही गर्ने चेतावनी दिएका हुन्।
विशेषगरी रातको समयमा यसरी जथाभावी रूपमा फोहोर फालिने गरिएको छ। उपत्यकाको सीसीटीभी क्यामरोका लागि महानगरले बजेटसमेत व्यवस्थापन गरेको पनि मेयर शाहले जानकारी दिएका थिए।
कोटेश्वरमा चेतावनी
काठमाडौं मल, आरबी कम्पलेक्सका अस्थायी संरचना भत्काएलगत्तै महानगरको टोली कोटेश्वर पुगेको थियो। कोटेश्वरका व्यापारीहरुलेसमेत फुटपाथ मिचिने गरि सडकमै व्यापार गरिरहेको, नक्साभन्दा बाहिर संरचना बनाएका र पार्किङका लागि भए बमोजिमका व्यवस्था बिहीबारसम्म गरिसक्न निर्देशन दिएको छ। बिहिबारसम्म व्यवस्थित नगरे आवश्यक कारबाही गर्ने चेतावनी उनले दिएका छन्।
निर्वाचित भएर आएदेखि उनलाई काठमाडौंको फोहोर व्यवस्थापनको समस्याले सतायो। उचित विकल्प खोज्न नसकेको भन्दै उनको व्यापक आलोचनासमेत भयो। तर, त्यतातिरको समस्या समाधान उन्मुख देखिएपछि अन्य क्षेत्रबाट फोहोर व्यवस्थापनमा गुमेको साख फर्काउने कोशिसमा लागेको देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1764146706.png)
-1786513116.png)
