काठमाडौं– चिकित्सा शिक्षामा सुधारको माग गर्दै डा गोविन्द केसी २५ दिनदेखि अनसनमा छन्। अनसनमा रहँदा औषधि तथा कुनै पनि स्वास्थ्य परिक्षण गर्न नमानेका डा केसीको स्वास्थ्यावस्था असामान्य रहेको चिकित्सकहरुले बताएँदै आएका छन्।
गत असार १६ बाट जुम्लामा अनसन सुरु गरेका डा केसीलाई सरकारले बिहीबार मात्रै काठमाडौं ल्याएको थियो। सरकारले अपहरण शैलीमा आफूलाई काठमाडौं ल्याएको भन्दै डा केसीले सामान्य स्वास्थ्य परिक्षण गर्नसमेत मानेका थिएनन्। तर ८० वर्षीया आमा मित्रकुमारी केसीको विशेष आग्रहमा डा केसीले स्वास्थ्य परिक्षण गर्न स्वीकृति दिएका थिए।
सोमबार रगतको रिपोर्ट आएसँगै चिकित्सकहरु भने चिन्तित भएका छन्। रगतका सम्पुर्ण ‘प्यारामिटर’हरु असामान्य देखिएका थिए।
सेतो रक्तकोशिकाको संख्या अहिलेसम्मकै न्यून देखिएको छ। यति कम सेतो रक्तकोशिका भएका बिरामीलाइ कुनै संक्रमण भइहाले, त्यसले भयावह रुप लिनेछ। यही कारण डा केसीलाई भेट्न आउने मानिसहरुलाइ १० मिटर परै राख्ने गरिएको छ। यसका अलावा डा केसी अनसन बस्ने कोठामा प्रवेशका लागि अनिवार्य मास्क र ‘ह्यान्ड स्यानिटाइजर’को प्रयोग गर्ने व्यवस्था मिलाइएको छ। यसले केही हदसम्म संक्रमण रोक्ने भएतापनि अब भने थप सावधानी नअपनाए डा केसीलाई गम्भीर खाले संक्रमण हुने जोखिम रहेको चिकित्सकहरुले बताएका छन्।
डा केसीको रगतमा ग्लुकोजको मात्रा पनि अहिलेसम्मकै सबैभन्दा न्यून देखिएको थियो। शरिरका सबै अङ्गहरुले काम गर्ने भनेकै ग्लुकोजबाट प्राप्त शक्तिले नै हो। यसको मात्रामा कमि आएसँगै अङ्गहरुले बिस्तारै काम गर्न छाड्छ्न्। विशेषत ग्लुकोजको मात्रा घटेसँगै सबभन्दा गम्भीर असर ब्रेनमा देखिन्छ। स्नायुहरु शक्तिहिन बन्दै जान्छन् र बेहोस हुने , सिजर हुने अर्थात छारे रोगका लक्षणहरु पनि देखिन सक्छ।
जुम्लामा रहदै घटेको पोटासियम, म्यागनेजियम र क्यालसियमको मात्रा अझै बढेको छैन। विशेषत पोटासियम एकदमै न्युन छ जसको सिधा सम्बन्ध मुटुसँग हुन्छ। उपचारमा संलग्न चिकित्सकहरुका अनुसार यहि अवस्थामा डा केसीको मुटु जुनसुकै बेला पनि बन्द हुनसक्छ। यति कम पोटासियममा पनि किन इसिजीमा परिवर्तन देखिएन भनेर चिकित्सकहरु छलफल गरिरहेका छन्।
एकपटक इसिजीमा परिवर्तन आउनासाथ डा केसीलाइ सिसियुमै राखेर उपचार गर्नुपर्ने यो भन्दा पहिल्यै चिकित्सकहरुले बताइसकेका छन्।
‘रगतमा अक्सिजनको मात्रा निरन्तर घटिरहेको छ। एकैछिन पनि अक्सिजन नलगाउदा उहाँलाई निकै अप्ठ्यारो हुन्छ , कहिलेकाहीँ त हप्याक–हप्याक नै हुने गरेको छ। अक्सिजन कम भएसँगै छाती पनि बेस्सरी दुख्ने गरेको छ,’ डा केसीसँग चौबिसै घण्टा साथ रहने उनका भाइ किशोर केसीले बताए।
विगत एक–दुई दिनदेखि धैरैपटक वाकवाकी लाग्ने समस्याले पनि डा केसीलार्इ आक्रान्त बनाएको छ।
सरकारले सुरु गर्यो छलफल
अनसन बसेको २४औं दिनमा आएर मात्र सरकार डा केसीका मागका सम्बन्धमा उच्चस्तरीय छलफलमा जुटेको छ। सोमबार मुख्यगरी चिकित्सा शिक्षा विधेयकको संशोधनलाई लिएर नेपाल कम्युनिस्ट पार्टीका नेता सुवास नेम्वाङ, माथेमा कार्यदलका संयोजक केदारभक्त माथेमा र नेपाल मेडिकल काउन्सिलका अध्यक्ष डा धर्मकान्त बाँस्कोटाबीच छलफल भएको छ।
छलफलमा विधेयकमा संशोधन गर्न सकिने बुँदाहरुमा साझा धारणा बनेपछि आज डा केसीको वार्ता टोलीसँग उक्त विषयमा कुराकानी हुने बताइएको छ। त्यसलगत्तै डा केसीसँग उक्त संशोधनका विषयमा कुराकानी हुनेछ।
चिकित्सकद्वारा आजदेखि देशभर ओपिडी टिकट बहिष्कार
यता डा केसीको अनसनमा ऐक्यवद्धता जनाउँदै नेपाल चिकित्सक संघले आजदेखि ओपिडी टिकट, रसिद, बिल बहिष्कार गर्ने भएका छन्। बिरामीको स्वास्थ्यलाई असर नपर्ने गरी वैकल्पिक उपायद्वारा ओपिडी सेवा सञ्चालन गर्ने संघले निर्णय गरेको हो।
त्यस्तै उपत्यकाका चिकित्सकहरु वसन्तपुरमा सामूहिक अनसन बस्ने भएका छन्।
संघले सोमबार पत्रकार सम्मेलन गर्दै थप आन्दोलनका कार्यक्रम सार्वजनिक गरेको थियो। जसअनुसार संघले उपत्यका बाहिरका डाक्टरहरुलाई पनि नियमित ओपिडी टिकट बहिस्कार गर्दै रिले अनसन तथा धर्नाका कार्यक्रम गर्न भनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
