काठमाडौं– प्रधानमन्त्री केपी शर्मा ओली तथा पूर्वप्रधानमन्त्री पुष्पकमल दाहाल 'प्रचण्ड'ले आज पुष्पलाल स्मृति दिवसको अवसरमा दिएको अभिव्यक्तिप्रति कांग्रेसले ध्यानाकर्षण भएको बताएको छ।
कार्यक्रममा डा केसीसँग जोड्दै दुवै नेताले आलोचना गरेका थिए। साथै उनीहरुले कांग्रेसलाई लोकतन्त्र नपढाउन समेत आग्रह गरेका थिए।
पढ्नुहोस्ः नेकपाका दुई अध्यक्षको कांग्रेसमाथि आक्रोश : एजेण्डा विहीन भएपछि केसीको सहारा
डा केसी र समर्थकप्रति प्रधानमन्त्री र पूर्वप्रधानमन्त्रीको आक्रोश
कांग्रेस प्रवक्ता विश्वप्रकाश शर्माले एक प्रेस विज्ञप्ति जारी गर्दै हलुका र दम्भयुक्त शब्द लफ्फाजीभन्दा माथि उठेर तत्कालै समाधानमा पुग्न प्रधानमन्त्री र सिंगो सत्तापक्षलाई सचेत गराएका छन्।
यस्तो छ विज्ञप्तिको पूर्णपाठः
सम्माननीय प्रधानमन्त्री ओली तथा नेता दाहालको आजको अभिव्यक्ति सम्बन्धमा प्रेस व्यक्तव्य
आजको एक कार्यक्रममा सम्माननीय प्रधानमन्त्री केपी शर्मा ओली र नेता पुष्पकमल दाहालले व्यक्त गर्नु भएको धारणाप्रति हाम्रो ध्यानाकर्षण भएको छ।
१. प्रधानमन्त्रीज्यूले हाल भइरहेको आन्दोलनलाई लक्षित गर्दै डा गोविन्द केसी र उहाँको मुद्दालाई समर्थन गर्नुलाई त्यान्द्रो समाएर राजनीति गरेको भन्ने अभिव्यक्ति दयनीय त छ नै आपत्तिजनक पनि छ। हामी स्मरण गराउन चाहन्छौं, लोकतन्त्र भनेको लाख मानिसले जुलुस गर्न पाउने अधिकार मात्र होइन, केवल एकजना व्यक्ति मात्रैले पनि न्यायको लागि आवाज उठाउँछ भने राज्यले त्यसलाई सुनुवाई गर्नु वास्तविक लोकतन्त्र हो। त्यसमा पनि डा गोविन्द केसी केवल एकजना व्यक्ति मात्र नभई यतिबेला आम नेपालीले समर्थन गरिरहेका अभियन्ता हुनुहुन्छ। उहाँको न्यायोचित मागका पक्षमा उभिनुलाई त्यान्द्रो समाएर राजनीति गरेको भन्नु र राजनीतिक आग्रह राखेर डा. केसीलाई हेर्नु प्रधानमन्त्री पदको उचाई अनुरुपको स्वभनिय अभिव्यक्ति विल्कुलै होइन।
२. डा. केसीले विगतमा गर्नु भएको अनसन र मागलाई सम्बोधन गर्ने क्रममा नेपाली कांग्रेसका तत्कालीन सभापति सुशील कोइरालाको नेतृत्वमा रहेको सरकारले डा. केदारभक्त माथेमाको संयोजकत्वमा उच्च स्तरीय कार्यदल गठन गरेको थियो। सोही कार्यदलको प्रतिवेदनमा आधारित रहेर नेपाली कांग्रेसका सभापति शेरबहादुर देउवाको नेतृत्वमा रहेको अघिल्लो सरकारले अध्यादेश जारी गरी डा गोविन्द केसीले उठाउनु भएका मागहरु पूरा गरेको थियो।
३. आजको मितिमा उत्पन्न भएको समस्या नेपाली कांग्रेस वा डा केसीका कारण नभई सो अध्यादेशलाई उल्ट्याउनतर्फ ओली सरकार उद्दत भएका कारण उब्जिएको समस्या हो। सबैमा जगजाहेर नै छ।
४. प्रष्ट भाषामा के प्रष्ट्याउन चाहन्छौः डा. केसीको मागलाई सम्बोधन गरी उहाँको जीवन रक्षा गर्न पक्ष र प्रतिपक्ष दुबै ऐक्यवद्ध ढंगले गम्भीर हुन जरुरी छ। तर संसदलाई समेत छलेर सडकमा दमनको अस्त्र प्रयोग गर्ने सरकारलाई सच्चिनका लागि दबाब दिनुपर्नेमा उल्टै नेता दाहालले कांग्रेसमाथि लासको राजनीति गरेको आरोप लगाउनु दुःखद छ।
नेपाली कांग्रेस हलुका र दम्भयुक्त शब्द लफ्फाजी भन्दा माथि उठेर तत्कालै समाधानमा पुग्न सम्माननीय प्रधानमन्त्रीज्यू र सिंगो सत्तापक्षलाई फेरि पनि सचेत गराउन चाहन्छ।
जय नेपाल!
विश्वप्रकाश शर्मा
प्रवक्ता
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
