फ्रेन्च चित्रकारको चित्रकला प्रदर्शनी : सेलावी अर्थात् जीवन यस्तै हो

साहित्य डबली

नेपाल लाइभ सोमबार, पुस ५, २०७८ २०:००

आफ्ना चित्रहरूसँग चित्रकार भिन्सेन्ट ग्रेवी।

काठमाडौं– ‘जीवन के हो?’

फ्रेन्च चित्रकार भिन्सेन्ट ग्रेवीलाई लाग्छ जीवन केही होइन। केवल जन्म र मृत्यु हो।

पुल्चोकस्थित विकल्प आर्ट सेन्टरमा चलिरहेको भिन्सेन्टको एकल चित्रकला प्रदर्शनीमा राखिएका चित्रहरुले पनि यसै भन्छन्। ‘सेलावी’ अर्थात ‘जीवन यस्तै हो’ शीर्षकमा चलिरहेको प्रदर्शनीमा भिन्सेन्टले जीवनलाई सरल र सहज रेखाबाट चित्रण गरेका छन्। उनले बनाएका चित्रहरुले जीवनको सरलतालाई प्रस्तुत गरेका छन्।

एउटा चित्रमा दुई वटा फूल एकअर्कासँग संवाद गरिरहेका छन्। ‘फ्लावर कन्भरसेसन’ शीर्षकको चित्रलाई भिन्सेन्ट एउटा फूल अर्को फूलसँग रिसाउँदा फकाइरहेको रुपमा अथ्र्याउँछन्।

‘लभर्स’ शीर्षकको चित्रकला भिन्सेन्टले आफ्नी प्रेमिकासँग लकडाउनको समयमा बिताएको पलको दृश्यांकन हो। दुई आकृति एकअर्कासँग संवाद गरिरहेको चित्रकलामा देख्न सकिन्छ। ‘लकडाउनको बेला म र मेरी प्रेमिकाले बिताएको पल हो यो,’ भिन्सेन्ट भन्छन्, ‘त्योबेला मैले उनलाई सम्बोधन गरेको कुरा चित्रमा देखाउन खोजेको हुँ।’

‘मिस्टिरियस गर्ल’ नाम दिइएको चित्रकलामा एउटा महिलाको आकृति कोरिएको छ। हेर्दा स्विडिस कार्टुनको पात्र ‘मुमिन’जस्तो देखिने यो आकृतिमा भिन्सेन्टले एक अज्ञात महिला कल्पना गरेका छन्। ‘यी अज्ञात युवतीलाई तपाईं प्रेम गर्नुहुन्छ,’ भिन्सेन्ट भन्छन्, ‘उसलाई नचिन्दासम्म हामीले प्रेम गर्ने हो। बाटोमा हिँडदा कुनै महिला आफ्नो सामुन्नेबाट गएमा हामी उसलाई प्रेम गर्छौं। यो चित्रमा त्यही विषय देखाउन खोजेको हो।’

‘कन्क्युलिकोट’, ‘ट्रि इन द फरेस्ट’, ‘ग्रास प्लान्ट’ तीन चित्रमा भिन्सेन्टले फूल, रुख र रुखको खण्डहरु छुट्याएका छन्। तीनै चित्रकला स्केचविनाका हुन्। भिन्सेन्ट यसलाई आफ्नो शोधको रुपमा बुझाउँछन्। ‘ग्रास प्लान्ट’मा भिन्सेन्टले नीलो रङ पानीको संकेतमा राखेका छन्, गाढा हरियो झारको रुपमा र हल्का हरियो रङ घामको संकेतमा राखेका छन्। क्रमशः अन्य दुई ‘ट्रि इन द फरेस्ट’ र ‘कन्क्युलिकोट’ चित्रकलामा पनि भिन्सेन्टले विभिन्न रङले घाम, पानी, फूल र रुखजस्ता वस्तुलाई चित्रण गरेका छन्।

‘यहाँ फूल, पानी, रुख, पातहरु छ,’ भिन्सेन्ट भन्छन्, ‘यी चित्रहरुमा मैले फुलहरुको खण्डिकरण गर्न खोजेको हुँ। यो चित्र र मेरो अभिव्यक्ति मात्रै नभएर मेरो रिचर्स पनि हो। कसरी कुराहरु प्रस्तुत हुन्छ भन्ने शोध हो।’

भिन्सेन्टको फूलहरुसँगको लगाव अन्य चित्रमा पनि देखिन्छ। ‘डान्सिङ फ्लावर्स’ चित्रमा उनले फूलहरु नाचिरहेको देखाएका छन्। उनी भन्छन्, ‘फूलहरु पनि नाँच्नुपर्छ। फूलहरु डान्सक्लब जान्छन्, उनीहरु रमाउँछन्, नाँच्छन्। यो नै जीवन हो।’

भिन्सेन्टको चित्रकलाको श्रवण गर्दा त्यसमा सरलता र सहजता देखिन्छ। न्याना रङ, फूल, पातजस्ता वस्तु फरक ढंगले कल्पना गरिएका चित्रहरु सरल छन्। भिन्सेन्ट यसलाई जीवनसँग जोडेर हेर्छन्।

भिन्सेन्ट आफू भने चित्रकलाबाट ठ्याक्कै कुनै अर्थ दिन नखोजेको बताउँछन्। ‘तपाईंले मलाई मेरो चित्रबारे सोध्नुभयो र मात्रै मैले बताएँ,’ भिन्सेन्ट भन्छन्, ‘तर, खास अर्थ त हेर्ने मान्छेले खोज्ने हो। मैले भन्न खोजेको कुरा मेरो चित्रकलामा छ। म बोलेर होइन, चित्रहरू बोलेर मान्छेले बुझ्ने हो।’

भिन्सेन्ट जीवनलाई सरल रुपमा हेर्न रुचाउँछन्। चित्र पनि सरल नै बनाउन रुचाउँछन्। उनी भन्छन्, ‘मेरो चित्रकलाको कुनै अर्थ छैन। म चित्र बनाउँछु, किनकि मलाई चित्र बनाउन मन लाग्छ। चित्रकला गर्नु सिर्जनात्मक काममध्येको सबैभन्दा उत्कृष्ट काम हो।’

भिन्सेन्टले फिल्मदेखि संगीतसम्मका विधामा हात हालेका छन्। तीमध्ये उनको प्रिय भने चित्रकला हो।

भिन्सेन्ट आफूलाई चित्रकला गर्न नआएकाले चित्र बनाइरहेको बताउँछन्। जब उनलाई चित्र बनाउन आउँछ, जब सबै कुराको ज्ञान पाउँछन्, तब सायद चित्रकला छाड्नेछन्। उनी भन्छन्, ‘त्यो दिन सायद नआउला। किनकि, सधैं केही न केही त सिक्नै पर्छ।’

भिन्सेन्ट सन् २००६ देखि नेपालमा छन। सन् १९७० मा फ्रान्सको राजधानी पेरिस नजिकैको शहरमा जन्मिएका उनी २००१ मा भारत आएका थिए। त्यसयता पूर्वी एसियाका विभिन्न ठाउँमा बस्दै आएका थिए। ‘नेपाल चित्रकला गर्नका एकदमै उपयुक्त ठाउँ हो,’ भिन्सेन्ट भन्छन्।

प्रदर्शनीमा उनका १८ वटा चित्रकला राखिएका छन्। सबै चित्र क्यानभासमा तेल रङले बनाइएका छन्। डिसेम्बर १० बाट सुरु भएको प्रदर्शनी डिसेम्बर २७ सम्म चल्नेछ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

अफगानिस्तानद्वारा नेपाललाई मध्यम लक्ष्य

ऐतिहासिक सम्पदाको संरक्षण गर्नु हाम्रो साझा दायित्वःराष्ट्रपति पौडेल

सिंगो नेपाललाई खुला संग्रहालय बनाउनुपर्छ : पर्यटनमन्त्री पाण्डे