एनआरएनएको अध्यक्ष पदमा कुल आचार्यद्वारा उम्मेदवारी घोषणा

समाचार

एनआरएनएको अध्यक्ष पदमा कुल आचार्यद्वारा उम्मेदवारी घोषणानागरिकता र सम्पत्तिको अधिकार स्थापित गर्ने प्रतिबद्धता

नेपाल लाइभ आइतबार, असोज १०, २०७८ १३:५८

काठमाडौं- गैरआवासीय नेपाली संघ (एनआरएनए) का सल्लाहकार तथा पूर्वउपाध्यक्ष कुल आचार्यले संघको अध्यक्ष पदमा उम्मेदवारी घोषणा गरेका छन्। काठमाडौंमा आइतबार पत्रकार सम्मेलन गरी आचार्यले २०२१-२०२३ कार्यकालका लागि संघको अध्यक्ष पदमा उम्मेदवारी घोषणा गरेका हुन्।

संघको दशौँ विश्व सम्मेलन आगामी अक्टोबरको २३-२५ सम्म काठमाडौंमा हुँदै छ। निर्वाचन समितिले अनलाइन माध्यमबाट विश्वभरबाट एकसाथ मतदान गराउने तयारी गरेको छ।

उम्मेदवारी घोषणा गर्दै आचार्यले भने, 'एनआरएनएलाई सही अर्थमा आमप्रवासी नेपालीहरुको साझा संस्था बनाउने मेरो अभियान हो, संस्थामा सबैको सहभागिता र अपनत्व सिर्जना गरेर यो अभियानलाई पूर्णता दिनेछु।'

पैत्रिक सम्पतिको अधिकार, राहदानीसहित तेस्रो पुस्तापछि पनि कायम रहनेगरी गैरआवासीय नेपाली नागरिकतालाई कार्यान्वयन गर्न सर्वोच्च प्राथमिकता दिने उनले बताएका छन्।

अध्यक्ष पदका उम्मेदवार आचार्यले आफ्नो दुई वर्षे कार्यकालमा संसारभर एनआरएनएको पञ्‍जीकृत सदस्य संख्या पाँच लाख पुर्‍याउने र राष्ट्रिय समन्वय परिषद्हरुको संख्या कम्तीमा १०० पुर्‍याउने घोषणा गरेका छन्। हाल एनसीसीको संख्या ८४ रहे पनि कतिपय एनसीसीहरु निष्कृय रहेका छन् भने संघका पञ्‍जीकृत सदस्यहरुको संख्या एक लाखको हाराहारीमा छ।

गैरआवासीय नेपालीहरुलाई मात्रै नभइ संसारका विभिन्न देशमा रहेका नेपाली मूलका मानिसहरुलाई पनि जोड्ने योजना रहेको उनले बताएका छन्। थाइल्याण्ड, म्यानमार लगायतका मुलुकमा बसोबास गर्ने नेपालीलाई 'पिपुल अफ नेपाली ओरिजिन (पीएनओ)' को मान्यता दिलाउन पहल गर्ने आचार्यले घोषणा गरे।

पर्वतको धाइरिङमा जन्मेका आचार्य हाल बेलायतमा बसोबास गर्दै आइरहेका छन्। उनी लण्डनका स्थापित व्यवसायी तथा समाजसेवी हुन्।

करिब दुई दशकदेखि एनआरएन अभियानमा सक्रिय आचार्यले आफ्ना कार्ययोजना सार्वजनिक गर्दै संगठनको सुदृढीकरण र संस्थागत पारदर्शिताको मुद्दालाई प्राथमिकतामा राखेको बताए।
अध्यक्षका प्रत्यासी आचार्यले वैदेशिक रोजगारीलाई थप व्यवस्थित र मर्यादित बनाउने भन्दै मध्यपूर्व, मलेसिया लगायतका मुलुकमा काम गर्ने नेपालीहरुको सुरक्षामा पनि विशेष ध्यान दिने घोषणा गरे। उनले वैदेशिक रोजगारीमा रहेका र थपिने नेपाली महिला कामदारको सुरक्षा र सीपको विकासमा संघले संस्थागत रुपमा ध्यान दिने उनले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

रविलाई हिरासत पठाइयो, प्रहरी कार्यालयबाहिर समर्थकको नाराबाजी

चितवनमा रविको बयान सकियो, थुनछेक बहस आजैबाट

महिला टी-२०आई शृंखला : पाँच खेल खेल्दा पनि जितविहीन नेपाल, पाँचौं खेलमा नेदरल्याण्ड्ससँग १० विकेटले पराजित