काठमाडौं- गैरआवासीय नेपाली संघ (एनआरएनए)की उपाध्यक्ष रवीना थापाले आगामी कार्यकालका लागि अध्यक्ष पदमा उम्मेदवारी दिने घोषणा गरेकी छन्। बिहीबार काठमाडौंमा पत्रकार सम्मेलन गरी उनले उम्मेदवारी घोषणा गरेकी हुन्।
यससँगै एनआरएनएको अध्यक्षमा उम्मेदवारी दिने थापा दोस्रो महिला बनेकी छन्। उनले गैरआवासीय नागरिकता, श्रमिक अधिकार, लगानी र युवा तथा महिलाको सशक्तीकरणलाई मुख्य चुनावी अजेण्डा बनाएको बताइन्। 'एनआरएनएमा रहेको अर्को महत्त्वपूर्ण अजेण्डा भनेको नागरिकता हो,' उनले भनिन्, 'अहिले नागरिकता विधेयक पास हुन नसकिरहेको अवस्थामा नागरिकताको अजेण्डालाई प्रमुखताका साथ उठाएको छु।'
यसैगरी उनले विदेशबाट मताधिकार र दोहोरो करका विषयलाई समेत प्रमुखताका साथ उठाउने बताइन्। सर्वोच्च अदालतले पनि विदेशमा बसेका नेपालीलाई मतदान गर्ने अधिकार सुनिश्चित गर्न सरकारका नाममा आदेश दिएको र त्यसलाई पूर्णरुपमा कार्यान्वयनमा ल्याउन दबाब दिने थापाले बताइन्। 'लाखौँ नेपाली विदेशमा काम गरेर देशमा रेमिट्यान्स पठाइरहेका छन्। उनीहरूलाई त मतदानको अधिकारबाट वञ्चित गर्नु हुँदैन भन्ने हो,' उनले पत्रकार सम्मेलनमा भनिन्, 'दोहोरो करका सम्बन्धमा पनि गैरआवासीय नेपालीले करमा छुट पाउनुपर्छ भन्ने उनको चुनावी नारा रहेको छ।'
अध्यक्षमा उम्मेदवारी दिने घोषणा गरेकी थापाले वर्तमान कार्यसमितिमा एनआरएनएका सबै सदस्यले नेतृत्व चुन्न पाउनुपर्ने माग गरे पनि अल्पमतमा पारिएको बताइन्। ‘संघमा अहिले एक लाख पाँच हजार सदस्य छन्, उनीहरू सबैले नेतृत्व चयनमा मतदान गर्न पाउनुपर्ने व्यवस्था गर्न माग गरेँ,’ थापाले भनिन्, ‘अब निर्वाचित हुने मेरो नेतृत्वले सबैलाई मतदानको अधिकार सुनिश्चित गर्ने प्रतिबद्धता जनाउँछु।'
उनले पहिलोपटक संघको अध्यक्ष महिलालाई निर्वाचित गराउन अपिलसमेत गरिन्।
थापासँगै उपाध्यक्षमा बेलायतका जयप्रकाश गुरुङ र महासचिवमा विनय अधिकारीले उम्मेदवारी दिने घोषणा गरेका छन्। थापाको समूहमा रहेका गुरुङ र अधिकारीले वैदेशिक रोजगारीमा जानेका लागि उनीहरूको हित र भूतपूर्व गोर्खा सैनिकको अधिकारमा काम गर्ने बताए।
विदेशमा रहेका दोस्रो पुस्तालाई नेपालको कला संस्कृति, धर्म, आर्थिक क्रियाकलाप, प्रविधि, लगानी, ज्ञानलाई नेपालसँग निरन्तर जोडिरहन नागरिकताको विषयमा सबै गैरआवासीय नेपालीले आवाज उठाउनुपर्ने थापा समूहको भनाइ छ।
थोरै आम्दानी गर्नेलाई पनि लगानीको अवसर
नेपालमा लगानी गर्ने विषय सबै गैरआवासीय नेपाली साझा नारा हो। थापा समूहले भने विदेशका साना साना लगानीलाई ल्याएर समूहमा लगानी गर्ने योजना रहेको बताएको छ। 'थोरै-थोरै पैसा संकलन गरेर यहाँ ठूलो क्षेत्रमा लगानी गर्ने सम्भावना धेरै रहन्छ,' अध्यक्षकी उम्मेदवार थापाले भनिन्, 'जसरी भए पनि हामीले साना-साना व्यवसायलाई सहयोग गर्ने भन्ने योजनासहित पुँजी संकलन गर्ने योजना रहेको छ।'
उनले विदेशमा हासिल गरेका सीपलाई व्यावसायीकरण गर्ने योजनासमेत रहेको बताइन्। विदेशबाट एक जना नेपालीले सिकेर आएको सीपलाई यहाँ आएर अन्यलाई तालिम दिएर धेरै जनालाई सीपयुक्त बनाउन सकिने उनको भनाइ छ। विदेशमा नेपालीले सिकेको ज्ञान र सीपलाई एनआरएनएले नेपालसँग जोडनसमेत आफूले धेरै काम गरेको बताइन्। विदेशमा रहेका एनआरएनएले सिकेको सीप र ज्ञान उनीहरूले ल्याएको पुँजीभन्दा ठूलो विषय भएको थापा समूहको भनाइ छ। थापाको उम्मेदवारी घोषणा कार्यक्रममा एनआरएनए एनसीसी सदस्यहरू जापानबाट ओम गुरुङ, अमेरिकाबाट प्रेम श्रेष्ठ र कृष्णजीवी पन्थले समर्थन गर्ने घोषणा गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
