जुन हिसाबले मैले विद्युत प्राधिकरणमा पहिलो कार्यकाल बिताएँ, टिमवर्कलाई महत्व दिएर काम गर्दा केही उपलब्धि हासिल गरेका थियौं। प्राधिकरणका १५ हजार कर्मचारीले सहयोग गर्दा हामी सफल भएका थियौं। सबै कर्मचारीको उल्लेख्य सहयोग थियो। यही सहयोगका कारण प्राधिकरणलाई उचाईमा पुर्याउन सम्भव भएको थियो। नेपाल सरकारले फेरि एक पटक चार वर्षका लागि कार्यभार तोकेर मलाई जिम्मेवारी दिएको छ।
निवर्तमान कार्यकारी निर्देशक हितेन्द्रदेव शाक्यलाई जल तथा ऊर्जा आयोगमा चार वर्षकै लागि नियुक्ति दिइएको छ। त्यो उहाँको लागि पनि सम्मान हो जस्तो लाग्छ। उहाँको कार्यकालमा भएका राम्रा कामहरूलाई निरन्तरता दिने र कमीकमजोरीहरू सुधार गर्ने हो। आगामी दिनमा अझै राम्रो गर्ने प्रयास गर्ने हो।
व्यवस्थापकीय रूपमा राम्रो गर्ने प्रयास सबैले गर्छन् नै। कसैको प्रयास सफल हुनसक्छ, कसैको नहुन पनि सक्छ। टिमलाई कसरी चलाउने भन्ने कुरा सबैको फरक हुन्छ, त्यहीअनुसार नतिजा आउने हो। सबैले आफ्नो क्षमताअनुसार काम गर्नुभएको छ। आजसम्म जे-जे उपलब्धि हुनेगरी काम गर्नुभएको छ, सबैलाई धन्यवाद दिन चाहन्छु। आगामी दिनमा कसरी अघि बढ्ने भन्नेमा लागौँ। कसैको टिकाटिप्पणी गर्नेतिर नलागौं।
मैले मेरो दोस्रो इनिङमा ठूलो चुनौती स्वीकार गरेर आएको छु। यो मेरो व्यक्तिगत जीवनमा सबैभन्दा ठूलो चुनौती हो। मलाई यहाँ फेरि आउनैपर्छ भन्ने थिएन तर, प्राधिकरणको आवश्यकता, सरकारको विश्वास र आमजनताले देखाएको विश्वासले फेरि आएको हुँ। मेरो व्यक्तिगत जीवनको यो भन्दा ठूलो चुनौती अरू नहोला। यो चुनौती म एक्लैले पार गर्नसक्ने हैन। हिजोका टिमका केही साथीहरू अवकाश हुनुभएको छ, केही नयाँ हुनुहुन्छ। सबैले नयाँ ऊर्जाका साथ टिमवर्क गर्नुपर्नेछ। कसैले टिकाटिप्पणी भन्दा पनि प्राधिकरणलाई कसरी माथि लैजाने भन्नेमा सोच्न जरुरी छ।
आज प्राधिकरण राम्रो काम गरेका कारण चर्चामा छ। यहाँ आएर म फेरि बोल्दै गर्दा मैले मात्र जस लिने होइन, सबैले पाउने हो। यसको शीर उच्च राख्न सबै मिलेर काम गरौँ। सरकारले जुन जिम्मेवारी दिएको छ, जनअपेक्षा धेरै रहेको छ। एउटा संयोग पनि हो तत्कालीन समयमा कार्यकारी निर्देशक हुँदा जनार्दन शर्मा ऊर्जामन्त्री हुनुहुन्थ्यो भने पुष्पकलम दाहाल प्रधानमन्त्री हुनुहुन्थ्यो। संयोग नै, अहिले ऊर्जामन्त्री माओवादीकै हुनुहुन्छ, माओवादी गठबन्धन सरकारमा रहेको छ। सबैलाई मेरो कार्यकालको दोस्रो इनिङ सुरू गर्दा पाएको जिम्मेवारीअनुसार नेपालको ऊर्जा क्षेत्रलाई अझै हाइटमा लैजाने प्रतिबद्धता जनाउँछु। हामी यहाँ टिमबाट अघि बढ्नेछौँ।
आगामी लक्ष्य
आगामी दिनमा मैले केही काम गर्नुपर्नेछ। ती काम दीर्घकालीन र तत्कालीन रहेका छन्। पहिलो नम्बरमा विद्युत् प्राधिकरणको जनतालाई सेवा दिने कार्यलाई अझै राम्रो बनाउनका लागि काम गर्नुपर्नेछ। प्राधिकरणमा आउने गुनासोहरूको व्यवस्थापन अब छिट्टै हुनेछ। अनियमितता र सुशासनको विषयलाई महत्त्वपूर्ण रूपमा अघि बढाउनेछौं। सुशासन र गुणस्तरीय सेवा दिने कार्य अब केन्द्रित हुनेछ। स्मार्ट मिटर पाइलटको रूपमा राम्रो नतिजा आएको छ, अब देशभर सञ्चालन हुनेछ। यसमा धेरै काम गर्नुपर्नेछ।
अन्डरग्राउन्ड केबलिङ सुरू गरियो तर, यसको काम प्रभावकारी हुन सकेको छैन। म आजै यस विषयमा कुरा गर्नेछु। सहरलाई सुन्दर बनाउने हिसाबले काम गर्नुपर्नेछ। सहरलाई ताररहित बनाउन हामीले जुन काम गरेका छौं, त्यसलाई राम्रोसँग गर्नुपर्नेछ। ट्रान्समिसनमा धेरै काम गर्नुपर्नेछ। हाम्रो ऊर्जा खेर जाने अवस्था आएको छ। यसलाई तत्काल सम्बोधन गर्नुपर्नेछ। यसका धेरै समस्या तत्काल सम्बोधन गर्नुपर्नेछ। बुटवलको ट्रान्समिसन लाइन म जाँदा प्रस्ताव पठाइएको थियो, अझै नभएकाले यसका लागि पहल गर्नेछु।
ठूलो परियोजना आएन भन्ने आरोप म माथि छ। म यसलाई केही स्वीकार गर्छु। अप्पर अरुण सुरू गरेका थियौं। अध्ययन सकिएको छ। डिजाइन अघि बढेको छ। ‘नेपालको पानी, जनताको लगानी’ भनी सुरू भएको अभियान अब अघि बढ्नेछ। अप्पर अरुण, तामाकोशी ५ अघि बढ्नेछ। नेपालको लगानी अब जलविद्युतमा बढाउनुपर्छ। तामाकोशी लामो समयपछि आएको छ। २० अर्बको आम्दानी अब हुनेछ। सञ्चयकोष लगायतसँग सहकार्य गरेर ठूला परियोजना सुरू हुनेछ। राम्रा परियोजनालाई अब अघि बढाउनुपर्ने छ। अब सुरू भएमा कम्तीमा सात वर्ष लाग्नेछ। दूधकोशी अघि बढेको छ। हामी अरू पनि लाइसेन्स लिने प्रक्रियामा छौं।
मलाई काम गर्न सहजता छ भन्ने महसुस गरेको छु। जुनसुकै निकायसँग समन्वय गर्न मलाई समस्या छैन। हाम्रा साथीहरूले आफूसँग भएको जिम्मेवारी राम्रो वहन गरौं, संस्थाले अवश्य पनि पुनरावलोकन गर्छ।
रिजर्भेयर आयोजना अघि बढाउन जरुरी छ। यसमा प्राधिकरणले हात हाल्न जरुरी छ। निजी लगानीमा पीपीए गर्ने कुरामा अब छनोट हुनुपर्छ। हाम्रो प्राथमिकता के हो भन्ने निर्धारण हुनुपर्छ। ग्रामीण विद्युतीकरण गर्ने कार्य अब अघि बढाउन जरुरी छ। म बाहिर बसेर पनि प्राधिकरणको अवस्थाबारे अध्ययन गरिरहेको थिएँ। अब डिमान्ड कसरी बढाउने भन्ने कुरामा पनि केन्द्रित हुनुपर्नेछ।
हामीले गर्ने भनेको अब पूर्वाधार विकासमा केन्द्रित हुनुपर्नेछ। भारत र बंगलादेशको मार्केटमा हामी जानैपर्छ। अब छिट्टै हाम्रो विद्युत् बिक्री गर्नैपर्छ।प्राधिकरण पुनर्संरचनाको कुरा पनि रहेको छ। अब नयाँ ऐन आउँदै छ। प्राधिकरणलाई अझै माथि राखेर काम गर्ने सोच राख्न जरुरी छ, नत्र प्राधिकरण नै नरहन सक्छ।
सुशासन, अनियमितता, ठेकेदारबाट काम नहुनेसहित अन्य गलत काममा कसैले छुट पाउँदैन। म ठूलो रिस्क लिएर आएको छु। यसमा कसैले केही नगर्ने छुट छैन। कर्मचारीका समस्या छन्, ती समस्या समाधान गरौँला। तपाईंहरूले गलत गरेको भए धेरै ठाउँमा वयान दिन जानुपर्ने हुनसक्ने थियो तर, यो भएको छैन। हाम्रा सिस्टर परियोजनामा काम गर्नेलाई थप सुविधा दिनसक्छौं तर त्यसका लागि सिस्टम बनाउन जरुरी छ। आजको सिस्टमबाट सम्भव छैन, नयाँ रूपमा जानैपर्छ। हाम्रो सबैको टिम हुनेछ, हामी अझै माथि जानेछौं भन्ने मैले सोचेको छु।
मलाई काम गर्न सहजता छ भन्ने महसुस गरेको छु। जुनसुकै निकायसँग समन्वय गर्न मलाई समस्या छैन। हाम्रा साथीहरूले आफूसँग भएको जिम्मेवारी राम्रो वहन गरौं, संस्थाले अवश्य पनि पुनरावलोकन गर्छ। सबैको उज्ज्वल भविष्य छ भन्ने मैले देखेको छु। हामी आर्थिक रूपमा पनि सवल अवस्थामा पुग्नेछौं भन्ने मैले देखेको छु।
ऊर्जामन्त्रीज्यूले अहिले भनिरहनुभएको आमजनतालाई राहत दिने, निःशुल्क बिजुली दिने कुरा हाम्रा लागि ठूलो कुरा हुँदैन। यदि राम्रो व्यवस्थापन गर्यौं भने यो सम्भव छ। यसलाई हामीले सही रूपमा व्यवस्थापन गर्न जरुरी छ। हिजो हामीले जसरी राम्रो व्यवस्थापन गर्यौं, त्यसबाट जनतालाई राहत दिन सहज भएको थियो। राम्रो र चुस्त व्यवस्थापन गर्नसके यो अझ राम्रो हुनेछ। तपाईंहरू सबै कर्मचारीले काम राम्रो गर्नुस्, तपाईंहरूलाई प्रोटेक्सन गर्ने जिम्मा मेरो हुनेछ। विगतमा पनि मैले राम्रो काम गर्ने कर्मचारीको प्रोटेक्सन गरेको थिएँ र आगामी दिनमा पनि गर्नेछु।
(बुधबार दोस्रोपटक नेपाल विद्युत् प्राधिकरणको कार्यकारी निर्देशकको पदबहाली गरेपछि प्राधिकरणमा आयोजित स्वागत कार्यक्रमलाई सम्बोधन गर्ने क्रममा घिसिङले व्यक्त गरेको विचार।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764383179.png)
-1764146706.png)
-1763721444.png)
-1763559424.jpg)
-1764080971.png)
