काठमाडौं– नेकपा एमालेका अध्यक्ष केपी शर्मा ओलीले एमालेलाई एकताबद्ध पार्नका लागि सहमति कायम गर्ने प्रयत्न धेरै गरिसकेको भन्दै अब सहमतिकै लागि भनेर लामो समय नकुर्ने बताएका छन्। आफूनिकट नेताहरुसँग उनले पार्टीका वरिष्ठ नेता माधवकुमार नेपाललाई धेरै पर्खिन नसक्ने स्पष्ट पारेका छन्। त्यसकै लागि ओलीले आफ्नो समूहमा शनिबारसम्मको ‘डेडलाइन’ तोकेका छन् र त्यो समयसम्म सहमति नजुटे एमालेको स्थायी कमिटी बैठक राखेर अघि बढ्ने तयारी गरेका छन्।
शुक्रबार एमाले मुख्यालय थापाथलीमा साउन १५ का अवसरमा आयोजना गरिएको 'खिर खाने कार्यक्रम'मा उपस्थित ओली पक्षीय धेरै नेताहरुले ओलीको यही आसय सुनाए। त्यो खिर कार्यक्रममा नेपाल पक्षका नेता र कार्यकर्ता उपस्थित थिएनन्। नेपाल पक्षले भने आफूहरुलाई कार्यक्रमबारे जानकारी नै नरहेको बताएको छ।
फुटको संघारमा पुगिसकेको एमालेलाई एकताबद्ध पार्ने भन्दै ओली र नेपाल पक्ष दुवैले पाँच–पाँच जनाको कार्यदल बनाएका थिए। त्यो कार्यदलले १० बुँदे सहमतिको प्रस्ताव ओली र नेपाललाई बुझाएको थियो। ओली अब त्यही सहमतिअनुसार स्थायी कमिटीबाट निर्णय गरेर अघि बढ्ने ‘मूड’मा पुगेको उनीनिकट एक नेताले नेपाल लाइभलाई बताए।
एमालेले साउन १५ गतेको खिर खुवाउने कार्यक्रम गर्नुअघि एमाले स्थायी कमिटी सदस्य विष्णु पौडेल वरिष्ठ नेता नेपाललाई भेट्न कोटेश्वर पुगेका थिए। नेपाललाई मनाउन कोटेश्वर पुगेका पौडेलले ‘उत्साहजनक’ खबर नल्याएको ती नेताले बताए।
यसअघि बिहीबार स्थायी कमिटी सदस्य सुवास नेम्वाङ पनि नेपाललाई भेट्न कोटेश्वर पुगेका थिए। नेपालसँगको भेटमा उनले पार्टी विवादका विषयमा अध्यक्ष ओलीसँग भेटेर छलफल गर्न आग्रह गरेका थिए। नेम्वाङले नेपाललाई ओलीसँग भेटेर छलफल गर्न आग्रह गरे पनि केही प्रगति हुन नसकेपछि शुक्रबार पौडेल फेरि कोटेश्वर पुगेका थिए।
यो प्रयासबाट सहमतिमा पुग्ने सम्भावना ओली पक्षले नदेखेको संकेत शुक्रबार एमाले मुख्यालयमा महासचिव ईश्वर पोखरेलले गरे। उनले ओली पक्ष अब कसरी अघि बढ्छ भन्ने संकेत पनि गरे। ओलीनिवास, बालकोटबाट सिधै थापाथली आएका पोखरेलले पत्रकारहरुसँग कुरा गर्दै पार्टीको विवाद मिलाउन गठित कार्यदलले तयार पारेको सहमतिको १० बुँदे प्रस्तावअनुसार नै अघि बढ्नुपर्ने बताए। तर, दैनिक आउने नयाँ प्रस्तावले पार्टी एकतामा अप्ठ्यारो पारेको उल्लेख गर्दै उनले भने, ‘कार्यदलले अघि सारेको १० बुँदे प्रस्तावलाई कार्यन्वयन गर्ने हिसाबले अगाडि बढ्नु पर्छ। अध्यक्ष (केपी ओली)ले आजसम्म नमिलेको विषय ल्याउन भन्नुभएको छ। बेलुकासम्म केही सहमति होला। त्यसपछि धेरै प्रतिक्षा गर्नु उचित हुँदैन भन्ने छ।’
कुनै विधि वा पद्दतिभन्दा बाहिर गएर सहमति नहुने भन्दै उनले दोस्रो अध्यक्षको प्रस्तावमा पनि जान नसकिने बताए। ओलीले केही दिनअघि एमाले विवाद मिलाउन वरिष्ठ नेता नेपाललाई दोस्रो अध्यक्षको प्रस्ताव गरेको बताएका थिए। नेपाल पक्षबाट कार्यदलमा भएको सहमतिभन्दा बाहिर गएर आउने प्रस्ताव कुनै हालतमा मान्य नहुने पोखरेलले जिकिर गरे।
ओलीले शुक्रबार बेलुकासम्म वा शनिबार बिहान नेपाल पक्षसँग केही सहमति हुन सक्ने आफूनिकट नेताहरुलाई बताएका छन्। तर, सहमति नभएमा शनिबार नै स्थायी कमिटी बैठक राखेर अघि बढ्ने ओली पक्षको तयारी छ। यद्यपि, बैठक अहिलेसम्म बोलाइएको भने छैन।
‘पार्टीमा सहमति गर्न अधिकतम लचकता अपनाएका छौं। माधव कमरेडहरु पनि यही पार्टीमा आउँनहुुन्छ भन्ने विश्वास छ, त्यसका लागि दुवैपक्षबीच छलफल र भेटघाट जारी छन्’, एमाले केन्द्रीय कार्यालयका सचिव शेरबहादुर तामाङले भने, ‘यदी माधव कमरेडहरु सहमतिमा नआए बैठक बसेर अघि बढ्नेछौं।’
ओलीनिकट एमाले केन्द्रय सदस्य कर्णबहादुर थापाले आफ्नो पार्टी नेतृत्वको सरकारलाई हटाएर विपक्षीलाई समर्थन गर्नेहरु एमाले हुनै नसक्ने जिकिर गरे। ‘एमाले भन्दा विपक्षीसँगै कुरा र सल्लाह मिल्नेहरु एमाले हुनै सक्दैनन्’, थापाले भने, ‘अब उहाँहरु पार्टीमा आउन चाहेमा कार्यदलमा भएको सहमतिलाई कार्यान्वयन गर्नेगरी आउन सक्नु हुन्छ। त्यो नभए कतिपय साथीहरु अब पछाडि छुट्नुहुनेछ।’
नेपाल पक्षले पार्टी एक बनाउने नाममा कार्यदलमा भएको १० बुँदे सहमति पर्याप्त नभएको बताएको छ। वरिष्ठ नेता नेपालले पार्टीलाई साँच्चै एकताबद्ध गर्न तीन प्रस्ताव अघि सारेका छन्। नेपालले केही दिनअघि आफूपक्षीय सांसदहरुको भेलामा यस्तो प्रस्ताव गरेका थिए। उनले आफू दोस्रो अध्यक्ष बन्ने स्पष्ट गर्दै भनेका थिए– ‘पहिलो, केपी ओलीसहित झलनाथ खनाललाई अध्यक्ष बनाउने, दोस्रो, ओलीसहित झलनाथ खनाल र वामदेव गौतम रहेको अध्यक्ष मण्डल बनाउने, तेस्रो, ओलीसहित नेपाल, खनाल र गौतमसहित पहिलो पुस्ताका नेताहरुले विदा दिएर दोस्रो पुस्तालाई नेतृत्व हस्तान्तरण गर्ने।’
नेपाल पक्षका नेता रघुजी पन्तले यो संगठित प्रस्ताव नभएर नेपालले अघि सारेको प्रस्ताव भएको बताए। पन्तले नेपाल लाइभसँग भने, ‘उहाँहरु (ओली पक्ष) सहमतिका लागि तयार नभएकाले अब यसको पनि औचित्य सकिन लागिसक्यो।’
ओली पक्ष भने नेपाल पक्षले नयाँ नयाँ सर्त तेस्र्याउन थालेको भन्दै अब अलमल नगरी एउटा निर्णय गरेर अघि बढ्नुपर्ने बताउन थालेको छ। शनिबार स्थायी कमिटी बैठक राखेर एउटा ठोस निर्णय हुनसक्ने उल्लेख गर्दै ओलीनिकट एक नेताले भने, ‘शनिवार विहानसम्म नेताहरुले भेटघाट जारी राख्नुहुन्छ, त्यहाँबाट सहमतिको बिन्दु फेला पार्न सक्ने सम्भावना भने कायमै छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
