पत्रकार महासंघ कोरियाविरुद्ध डेटा चोरीको आरोप, एनआरएनए कोरियाले दियो प्रहरीमा उजुरी

समाचार

शिव भुसाल आइतबार, असार २७, २०७८ १३:५३

सिओल- नेपाल पत्रकार महासंघ दक्षिण कोरियामाथि डेटा चोरीको आरोप लागेको छ। गैरआवासीय नेपाली संघ (एनआरएनए) दक्षिण कोरियाले आफ्नो गोप्य डेटा चोरेर सामाजिक सञ्जालमा सार्वजनिक गरिदिएको भन्दै पत्रकार महासंघविरुद्ध कोरियाको स्थानीय प्रहरीमा उजुरी दिएको हो।

संस्थाको गोप्य डेटा कोरियाको प्रचलित कानुनको उल्लंघन गरी सार्वजनिक गरिदिएको भन्दै पत्रकार महासंघ कोरिया शाखाका अध्यक्ष रञ्जनराज कुँवरको नाममा राजधानी सिओलस्थित छोङगाक प्रहरी स्टेसनमा उजुरी दिइएको एनआरएनए कोरियाका अध्यक्ष यज्ञराज सुवेदीले जानकारी दिए।

संस्थाको गोप्य डेटा संस्थासँग अनुमति नलिइ सार्वजनिक रुपमा प्रकाशित गर्नु/गराउनु कोरियाको कानुनको हिसाबले बर्जित रहेको एनआरएनएको दाबी छ।

यसअघि एनआरएनए कोरियामा आठौँ समितिको निर्वाचनका लागि स्वीकृत भएका मतदाताको सूची पत्रकार महासंघ कोरिया शाखाको फेसबुक पेजबाट सार्वजनिक भएको थियो।

अध्यक्ष सुवेदीले भने, ‘कतैबाट पत्रकारसमक्ष हाम्रो गोप्य डेटा पुगेको भए त्यसको भेरिफाइका लागि हामीसँग आधिकारिकता पुष्टि गर्नुपर्दथ्यो, महासंघको असावधानीका कारण संस्था तथा नामावली बाहिरिएका सदस्यहरुले मानसिक तथा अन्य हिसाबले ठूलो क्षति बेहोर्नसक्ने भएकाले हामीले उजुरी गरेका हौँ।'

एनआरएनएको उजुरीका आधारमा यहाँको प्रहरीले घटनाको अनुसन्धान गरिरहेको र तथ्य आउनासाथ अदालती प्रक्रियामा लागिने उनको भनाइ छ।

यता पत्रकार महासंघ कोरिया शाखाका अध्यक्ष कुँवरले आफूले संस्थाको फेसबुक पेजमा तेजप्रेमी नाम गरेको फेसबुक अकाउण्टमार्फत् उक्त डेटा प्राप्त गरेको बताएका छन्। तर, उक्त व्यक्तिको पहिचान नगरी आफूले फेसबुकमा लिंक पोस्ट गरेको उनको भनाइ छ। पछि उक्त फेसबुक अकाउण्ट 'फेक' रहेको पाइएको कुँवरको भनाइ छ।

नेपालमा मतदाता नामावली सार्वजनिक गर्नु सामान्य विषय भए पनि कोरियाको कानुनमा उक्त कुरा बर्जित रहेकाले आफूले त्यसरी पोस्ट गर्नु गल्ती भएको भन्दै आत्मालोचना गरिसकेको उनले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।