काठमाडौं- नेपाल उद्योग वाणिज्य महासंघको स्टार्टअप एण्ड इनोभेसन समितिले महासंघका लगानीकर्ताहरूसँग आबद्ध हुन इच्छुक नव उद्यमी (स्टार्टअप) हरूका लागि आवेदन आह्वान गरेको छ। समितिले आफनो कार्ययोजना अनुसार मेन्टरसिप सहयोगसहित आबद्ध हुन चाहने स्टार्टअपहरुलाई उक्त आह्वान गरेको हो।
आवेदन सबै क्षेत्र (कृषि, उत्पादनमुलक, सूचना प्रविधि, सेवा) का लागि खुला गरिएको समितिले जानकारी दिएको छ। समितिले गएको चैत ९ गते पत्रकार सम्मेलन गरी यस विषयमा विस्तृत जानकारी गराएको थियो। महासंघको वेबसाइटमार्फत् आवेदन दिन सकिने छ।
समितिसँग आबद्ध रहेका लगानीकर्ताहरूको समूहमा रहेका लगानीकर्ताहरूको व्यावसायिक अभिरुचिलाई उद्यमीहरूको व्यवसायसँग मिलान गरी फलदायिक सहकार्यको लागि सहजीकरण गर्ने कार्यमा समितिले सहयोग गर्नेछ। नवप्रवर्तनीय वस्तु, सेवा वा प्लेटफर्मको परिवेश वा उपयोगमा सम्भाव्य व्यावसायिक मोडेलको स्थापना/स्तरोन्नति गर्ने प्रक्रियामा रहेका उद्यम वा व्यवसायहरूका लागि यो आवेदन गरिएको हो।
एक वर्षभन्दा बढी समय अघिदेखि सञ्चालनमा आइरहेका र कम्तीमा पनि एक वर्षको लेखा परीक्षण प्रतिवेदन भएका, कानुनीरुपमा दर्ता व्यवसाय आवेदनका लागि योग्य मानिने छन्। आफ्नो व्यवसायमा सीप, ज्ञानको आधार र दह्रो प्रतिबद्धता प्रदर्शन गर्नसक्ने सशक्त समूहले यसमा आवेदन गर्न सक्ने छन्।
आवेदनका साथ कम्पनी दर्ता प्रमाणपत्रको प्रतिलिपि तथा कम्पनीको विधान (प्रबन्धपत्र, मेमोरेन्डम अफ एसोसिएसन), आर्टिकल अफ एसोसिएसन र सम्बन्धित अन्य रजिस्ट्रेसनहरू, प्यान/भ्याट दर्ता, कर चुक्ता प्रमाणपत्रहरू, कम्पनीको सञ्चालक समितिको माइन्युट, कम्पनीका प्रवर्द्धक/संस्थापकहरूको बायोडाटा लगायतका आवश्यक दस्तावेजहरू संलग्न हुनुपर्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
