काठमाडौं–नेपाल ट्रष्टको कार्यालयले काठमाडौंको कमलादीस्थित काठमाडौं प्लाजा भवनमा अवैध रुपमा व्यापार गरिरहेको व्यवसायीलाई १० महिनापछि हटाएको छ। कार्यालयले सुरक्षा निकायको सहयोगमा भवन आफ्नो नियन्त्रणमा लिएको हो।
भवनमा अटेरी गरेर बसेको व्यवसायीको फर्म कार्यालयले सिल गर्दै आफ्नो नियन्त्रणमा लिएको कार्यालयका सहसचिव भीष्मकुमार भुसालले जानकारी दिए।
भवन खाली गराएर सहसचिव भुसाल बिहीबार नै वित्त आयाेगमा जिम्मेवारी सम्माल्न जाने भएका छन्। यसअघि कार्यालयले वैशाख २ गतेदेखि सुरक्षा निकायलगायत सरोकारवालाको सहयोगमा भवन खाली गराउने भन्दै ३१ गते माइकिङ गरेको थियो।
कार्यालयले भवन खाली गर्न २०७७ असारदेखि बारम्बार सूचना प्रकाशन गरे पनि भाडामा बसेको कम्पनीले अटेर गरिरहेका थिए। भाडामा बसेकाहरूले अटेरी गरेपछि भवन भाडा लिने दोस्रो पक्ष कन्सेप्ट डेभलपर्सले भवन खाली गर्न व्यवसायीले अटेरी गरेको कारण कार्यालयलाई नियन्त्रण लिन सहमति दिएको छ।
कब्जामाा लिएपछि सामान लैजान व्यवसायी फर्म कन्सेप्ट डेभलपर्सको सम्झौता अनुसारको सबै काम पूरा गरेर आएको अवस्थामा सामान लैजान दिने गरी निणन्त्रणमा लिएको कार्यालयको भनाइ छ। २०५० सालमा कन्सेप्ट डेभलपर्ससँग भएको २७ वर्षको सम्झौता सकिएपछि उक्त भवन काठमाडौं महानगरपालिकालाई दिने निर्णय ट्रष्टले गरेको थियो।
लामो समयसम्म कन्सेप्टले भवन खाली गरेको थिएन। भवन खाली गराउन बारम्बार ताकेता गरेपछि कन्सेप्टले भने सहमति दिएको छ। कार्यालयले १० महिनाको अवधिमा भवन खाली गराउन भन्दै ३ पटकसम्म सूचना जारी गरिसकेको छ। तर, भवनमा रहेकाले अटेरी गर्दै अदालतसम्म पुगेका थिए।
अदालतले पनि भवन खाली गराउनु पर्नेगरी व्यवसायीले दायर गरेको रिटमा अन्तरिम आदेश जारी गरेको थिएन। अवधि सकिएपछि पनि विभिन्न बहानामा कन्सेप्टसँग सम्झौता गरी भाडामा बसेको व्यवसायीले काठमाडौं प्लाजा हडपेर बसेको थिए।
कन्सेप्टसँगको सम्झौता सकिएसँगै ट्रष्टको कार्यालयले काठमाडौं प्लाजा कार्यालयीय प्रयोजनका लागि काठमाडौं महानगरलाई दिने निर्णय गरिसकेको छ। तर, कन्सेप्टले भवन खाली नगर्दा महानगरसँग दुईपक्षीय सम्झौता हुने सकेको छैन।
साथै, ट्रष्टको कार्यालयले असारदेखिको भाडासमेत पाएको छैन। ट्रष्टको कार्यालयले काठमाडौं महानगरपालिकालाई ६० लाख ५० हजार रुपैयाँ मासिक भाडा तिर्ने गरी काठमाडौं प्लाजा दिने निर्णय गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
