सिनेमा

महामारीको निराशालाई केही हदसम्म इतिश्री गर्ने ‘श्री’

पुष्पा थपलिया सोमबार, चैत ३०, २०७७ ०८:०१

काठमाडाैं- भनिन्छ, जहाँ धेरै पीडा, समस्या र अभाव हुन्छ, त्यहाँ हरेक कुनामा कथा नै कथा भेटिन्छ। तर, त्यो कथा देख्ने मन र आँखा भने चाहिन्छ। कोभिड-१९ का कारण मानिसले भोगेका समस्या, अभाव र पीडामा निर्देशक सूर्यबहादुर बोहोरा, कलाकार सन्दिप क्षेत्री लगायतको आँखा पर्‍यो। जसले गर्दा जन्मियो फिल्म ‘श्री’। फिल्ममा लकडाउनले निम्त्याएको एक्लोपनको कथा छ।

पाँच मिनेट शौचालयमा थुनिदाँ निसास्सिएको अनुभव बोकेका हामी, कयौं दिन लकडाउन भएर खानु न पिउनुसँग थुनिँदाको मनोदशा कस्तो होला? फिल्मले देखाउन खोजेको मुख्य कुरा यही हो। फिल्मको समय सन्दर्भ र प्रस्तुती केही हदसम्म नयाँ भएपनि, कतै थुनिएर एक्लो बन्दाको कथावस्तु नौलो भने हैन।

फिल्मको मुख्य पात्र छन्, मानव (सन्दिप क्षेत्री)। उनी व्यवसायी हुन्। विभिन्न व्यवसायमा हात हालेका मानवको २०२१ मा काठमाडौंमा घर बनाउने र २०२२ मा सुन्दर नायिका काव्या (वर्षा शिवाकोटी) सँग बिहे गर्ने योजना छ।

उनी निकै व्यस्त व्यक्ति हुन्। १० मिनेट पैसा कमाउने भाषण ठोकेर उनी हजारौं कमाउँछन्। त्यसैले उनका लागि समय निकै महत्वपूर्ण छ। खाने फुर्सद समेत छैन उनलाई।

यति धेरै व्यस्त मानिस, जसले एक सेकेन्ड खेर फाल्न सक्दैन। आफूलाई पैसाको बलमा शक्तिशाली ठान्छ। परिवार र साथीभाइसँग समय बिताउनु पैसा कमाउने समय सत्यानाश गर्नुजस्तो मान्छ। हो, उही मानव फिल्मको कथाभरी एक्लै थुनिएको छ।

मानव कसरी थुनियो, कसरी निकालिन्छ, खानु न पिउनुसँग थुनिँदा उसको मनोदशा कस्तो हुन्छ? यी सबै थाहा पाउन फिल्म हेर्न हल नै पुग्नुपर्छ भन्ने चिन्ता छैन, विभिन्न ओटीटी प्ल्याटफर्ममा पनि यसलाई सजिलै हेर्न सकिन्छ।

एक सामान्य दर्शकको नजरले हेर्दा फिल्म सुन्दर छ। हरेक दर्शकले मानवको भूमिकामा आफूलाई राख्न सक्छन्। सम्पूर्ण मानवजातिको प्रतिनिधित्व गर्ने भएकाले मुख्य पात्रको नाम ‘मानव’ सार्थक छ। ‘मानव’ पात्रमा हरेक दर्शकले आफूलाई राख्न सक्छन्।

फिल्ममा संवाद पनि त्यस्तै छन्। ‘मानव कहिल्यै ट्र्यापमा पर्न सक्दैन’ जस्ता संवादले आफूलाई सर्वोसर्वा ठान्ने मानिसको घमण्ड देखाउन खोजिएको छ।

फिल्म मध्यान्तरसम्म निकै स्लो छ। मानव अर्थात् सन्दिप निकै चर्को पनि सुनिन्छन्।

फिल्म लम्ब्याउनकै लागि धेरै ठाउँमा अनावश्यक फुटेज राखिएको छ। जस्तो कि, रक्सी खाएर मानवले देखाएको ताण्डव, गाँजा खाएर सोचेको रोमान्टिक दृश्य लगायतले दर्शकलाई अल्छि लाग्छ। बलिउड फिल्म बर्फीमा अभिनय गरिसकेका भोला सापकोटा पनि ‘श्री’मा अटाएका छन्। तर, फिल्ममा उनको कुनै संवाद छैन। फिल्मभरी उनको काम सन्दिपलाई खाना पुर्‍याउने मात्रै छ।

धेरै दृश्यमा दर्शकको अवमूल्यन पनि गरिएको छ। उदाहरणका लागि, मानव पशुपतिको घाटमा चितामा सुत्छ, पछि अस्पतालको श्ययामा उठ्छ र भन्छ, 'म मृत्युको मुखबाट फर्किएर आएँ।' मृत्युको मुखबाट फर्किएर आएको कुरा दर्शकलाई बुझाउन पशुपतिको घाटमै सुत्नुपर्थ्यो त?

सन्दिपको अभिनय भने अन्य फिल्मको तुलनामा राम्रो छ। यस्तो गम्भीर विषयमा फिल्म बनाउंँदा पनि उनले आफ्नो ‘धर्म पूरा गर्न’ हँसाएका छन्। यही हँसाउने चक्करमा फिल्मले लय बिगारेको छ। फिल्ममा सन्दिपले चर्चित हलिउड फिल्म जोक्करको पनि याद दिलाएका छन्। निकै गम्भीर समयमा पनि हाँसेको हाँसोमा दर्शकले पीडा महसुस गर्न सक्छन्।

नेपालमा लकडाउनको समय २०२० अगष्ट १९ लाई देखाउन खोजेको फिल्मलाई ७२ घण्टामा खिचिएको भनिएको छ। त्यस्तै फिल्म जम्मा २० लाखको खर्चमा तयार पारिएको पनि निर्माण पक्षले जनाएको छ।

थोरै लगानीमा यत्तिको फिल्म बन्नु नेपाली फिल्म क्षेत्रका लागि गतिलो पाठ हो। एउटै म्युजिक भिडियोमा २० लाख खर्च गर्न थालेको क्षेत्रले श्री फिल्मबाट थोरै लगानीमा पनि फिल्म बन्छ भन्ने प्रमाणित गरेको छ।

समग्रमा फिल्म राम्रो छ। कोभिड–१९ का कारण फिल्म क्षेत्र सुस्ताएको समयमा यत्तिको फिल्म बन्नु नेपाली फिल्मका लागि यो समूहले दिएको श्री अर्थात् सम्पति नै हो। तपाइँलाई सस्पेन्स जनराका फिल्म मन पर्छ या सन्दिपको फ्यान हुनुहुन्छ भने, तपाइँका लागि ‘श्री’ गतिलो फिल्म हो। फिल्ममा रोमान्स चाहनुहुन्छ, लभस्टोरी खोज्नुहुन्छ या मारकाट चाहनुहुन्छ भने श्रीका लागि समय र पैसा दुवै खर्च नगरेको राम्रो।

फिल्मको ट्रेलर :