काठमाडौं- फोरजी सेवा विस्तारमा लापरबाही गर्दै आएको दूरसञ्चार सेवाप्रदायक नेपाल दूरसञ्चार कम्पनी (नेपाल टेलिकम)ले आफूले प्रयोग गर्दै आएको फ्रिक्वेन्सी ब्याण्ड सपोर्ट गर्ने फोरजी सेटमात्रै आयात गर्न दिनुपर्ने गरी नियामक निकायसँग प्रस्ताव गरेको छ।
टेलिकमले नियामक निकाय दूरसञ्चार प्राधिकरणमा यस्तो प्रस्ताव गरेको हो। २०७६ फागुनभित्र देशभर फोरजी विस्तार गर्ने लक्ष्यसहित २० अर्ब रुपैयाँ खर्च गर्दै टेलिकमले काम थालेको थियो। तर, अहिलेसम्म फोरजी विस्तारमा ७० प्रतिशत पनि काम भएको छैन।
प्रतिस्पर्धी संस्था एनसेलले फोरजी विस्तारमा टेलिकमलाई उछिनेपछि उसले नयाँ रणनीति अपनाएको हो।
टेलिकमका प्रबन्ध निर्देशक डिल्लीराम अधिकारीले चैत ३ गते दूरसञ्चार प्राधिकरणमा उक्त प्रस्ताव गर्दै यसले डिजिटल नेपाल फ्रेमवर्कको लक्ष्य प्राप्तिमासमेत सहयोग पुग्ने दाबी गरे। फोरजी सेवा सञ्चालनमा रहेको ब्यान्ड २०/२८ फ्रिक्वेन्सी गर्ने मोबाइल सेटले गर्दा दुर्गम स्थानमा विस्तार गरिएको मोबाइल ब्रोडब्यान्ड सेवाको उपभोग गर्न पाउने हुँदा राजस्व बढ्ने उनको भनाइ छ।
अधिकारीले ब्यान्ड २०/२८ मा फोरजी लाइट नेटवर्कको कभरेज तथा पेनिट्रेसन बढी भएकोले सहरी क्षेत्र, ग्रामीण भेग तथा राजमार्ग गरी सम्पूर्ण स्थानहरुको नेटवर्क गुणस्तरीय हुने बताए। उनले उक्त ब्यान्ड सपोर्ट गर्ने मोबाइल सेटको वृद्धिले सेवाग्राहीहरु गुणस्तरीय सेवा उपभोग गर्न पाउने सेवाको उपभोग वृद्धि भई राजस्वसमेत वृद्धि हुने भन्दै त्यस्तो प्रस्ताव गरेका हुन्।
टेलिकमको उक्त पत्रको आशय आफूले प्रयोग गर्दै आएको फ्रिक्वेन्सी ब्याण्डहरुमात्र सपोर्ट गर्ने फोरजी सेटमात्रै भित्र्याउन दिनुपर्ने नै रहेको प्राधिकरण स्रोतको दाबी छ।
टेलिकमले अहिले फोरजी सेवा विस्तारका लागि ८०० र एक हजार ८०० मेगाहर्ज ब्याण्ड प्रयोग गरिरहेको छ। त्यसमा पनि सबैभन्दा बढी लगानी ८०० मेगाहर्ज ब्यान्डमा प्रयोग गरिरहेको छ। तर, लगानीअनुसारको प्रतिफल टेलिकमले लिन सकेको छैन। कम्पनीले आफूले प्रयोगमा ल्याएको फ्रिक्वेन्सी ब्याण्ड र मोबाइलको इकोसिस्टम नमिल्दा असर परिरहेको भन्दै यस्तो प्रस्ताव गरेको छ।
टेलिकमले दुर्गम क्षेत्रमा फोरजी सेवा विस्तारका लागि ८०० मेगाहर्ज ब्याण्डको फ्रिक्वेन्सी बढी प्रभावकारी हुने भन्दै त्यसलाई बढी प्रयोगमा ल्याएको छ। तर, अहिले नेपाली बजारमा उपलब्ध फोरजी सेटहरुमध्ये सीमित प्रतिशतलेमात्रै उक्त ब्याण्ड सपोर्ट गर्ने गरेका छन्।
जसकारण टेलिकमको फोरजी विस्तारले लक्ष्यअनुसार ग्राहक विस्तार गर्न सकेको छैन। नेपाल टेलिकमले प्राधिकरणलाई पठाएको पत्रमा दूरसञ्चार सेवाको रेडियो फ्रिक्वेन्सी (बाँडफाँड तथा मूल्यसम्बन्धी) नीति, २०६९ तथा पहिलो संशोधन २०७३ एवं प्राधिकरणबाट फोरजी सेवा सञ्चालन गर्न प्रदान गरेका फ्रिक्वेन्सी ब्याण्डहरु सपोर्ट गर्ने मोबाइल सेटहरुलाई मात्र आयातको लागि अनुमति दिँदा ह्याण्डसेट इकोसिस्टम सुदृढ हुने र सेवाग्राही तथा सेवाप्रदायक लाभान्वित उल्लेख गरेको छ।
‘टेलिकमले मोबाइल आयातकर्ताहरुलाई नेपालमा ८०० मेगाहर्ज ब्यान्डको फोरजी सेवा विस्तार भएको छ,’ प्राधिकरणका अध्यक्ष पुरुषोत्तम खनालले भने, ‘आयातकर्ताहरुलाई पनि जानकारी गराइदिनु भनेको हुन सक्छ। हामी मोबाइल आयातकर्तालाई यस विषयमा जानकारी गराउछौं।’
अहिले नेपालमा आयात हुने मोबाइल सेटहरु ९०० र एक हजार ८०० मेगाहर्ज ब्यान्डको फोरजी सपोर्ट गर्ने बढी छ। जसका कारण टेलिकमको फोरजी सेवा प्रभावकारी हुन सकेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
