काठमाडौं- पछिल्लो समय ‘राइड सेयरिङ’का लागि सर्वसाधारणको रोजाइमा परेको पठाओले मंगलबार दिउँसो अचानक सेवा बन्द गर्यो।
सोही दिन बिहान ट्याक्सी चालकले पठाओका एक राइडरलाई कुटपिट गरेको समाचार आएको थियो। ट्याक्सी चालकबाट कुटिएको विरोधमा राइडरहरूले राजधानीमा विरोध र्याली नै निकाले।
मंगलबार अपरान्ह पठाओ नेपालले एक विज्ञप्ति जारी गर्यो। विज्ञप्तिमा राइडरहरूलाई पठाओको लोगो अंकित ‘प्रोटेक्टिभ गियर’ (ज्याकेट र ट्राउजरसहितको कपडा) नलगाउन निर्देशन दिइएको थियो। यसअघि पठाओले प्रोटेक्टिभ गियर अनिवार्य लगाउनुपर्ने नियम लागू गरेको थियो। मंगलबारबाट प्रोटेक्टिभ गियर लगाएको पाइए कारबाही गर्ने चेतावनीसमेत पठाओ नेपालले दिएको छ। कोभिड-१९ संक्रमणको जोखिम न्यूनीकरणका लागि अनिवार्य गरिएको प्रोटेक्टिभ गियर सरकारी निकायहरूसँगको सहमतिपछि प्रतिबन्ध लगाउने निर्णय भएको विज्ञप्तिमा उल्लेख गरिएको छ।
०००
मंगलबार पठाओको सेवा बन्द भएसँगै सामाजिक सञ्जालमा चर्चा हुन थाल्यो। अधिकांशले ट्याक्सीको ‘दादागिरी’ अन्त्य गर्दै सर्वसाधारणलाई सस्तो र सहज सेवा दिँदै आएको पठाओ बन्द गरेकोप्रति आक्रोश पोखे। पठाओको सेवालाई निरन्तरता दिनुपर्ने आवाज उनीहरूको थियो। कतिपयले कानुनी सवाल पनि नउठाएका होइनन्। तर, सामाजिक सञ्जालमा लेख्ने प्रायः सबैको एउटै मत देखिन्थ्यो- पठाओको निरन्तरता।
तर, पठाओ नेपालले प्राविधिक समस्या भएको तर आफ्नो सेवा नरोकिएको प्रतिक्रिया सञ्चारमाध्यमलाई दियो। सरकारी निकायका अधिकारीहरूले पनि आफूहरूले पठाओको सेवा रोक्न कुनै निर्देशन नदिइएको जानकारी दिए। यद्यपि, पठाओको एपमार्फत सेवाग्राहीले सेवा पाइरहेका थिएनन्। जसकारण सामाजिक सञ्जालमा चर्चाको क्रम झन् बढेको थियो।
बुधबार बिहान ट्विटरमा ‘पठाओ नेपाल’ ह्यासट्याग ट्रेन्डिङको पहिलो नम्बरमा थियो। मध्यान्हपछि फेरि ‘आइ एम विथ पठाओ’ ह्यासट्याग ट्रेन्डिङको पहिलो नम्बरमा आइपुग्यो। यसले पठाओजस्तै राइड सेयरिङ सेवा रोकिनुहुन्न भन्नेमा धेरैले समर्थन जनाएको देखाउँछ।
२५ घण्टापछि पुनः सुरू
मंगलबारबाट रोकिएको सेवा पठाओले करिब २५ घण्टापछि पुनः सुरू गरेको छ। बुधबार बिहानबाट कार र फुड डेलिभरी सेवालाई पुनः सञ्चालनमा ल्याएको पठाओले मोटरसाइकल सेवा भने दिउँसो ३ बजेबाट मात्र सुरू भएको हो।
‘हिजो (मंगलबार) दिउँसो २ बजेबाट रोकिएको मोटरसाइकलको सेवा आज ३ बजेबाट सुरू भएको छ,’ पठाओ नेपालकी मार्केटिङ प्रमुख सुरक्षा हमालले नेपाल लाइभसँग भनिन्, ‘कार र फुडको सेवाचाहिँ बिहान ८ बजेबाटै सुरू भएको हो।’
सेवा रोकिनुको कारण
हमालले बाहिर चर्चामा आएजस्तो कुनै कारण सेवा नरोकिएको बताइन्। प्राविधिक कारणले अवरुद्ध बनेको सेवा पुनः सञ्चालनमा ल्याइएको उनले जानकारी दिइन्।
‘हाम्रो एप्समा म्यापिङको समस्या थियो, त्यो टेक्निकल समस्या सल्भ गरेपछि सेवा नियमित गरेका हौं। अरू कुनै कारण रोकिएको होइन,’ उनले भनिन्।
मार्केटिङ प्रमुख हमालले राइडरहरूले ‘अफलाइन’ सेवा दिने समस्या बढेका कारण पठाओको लोगो अंकित प्रोटेक्टिभ गियर लगाउन नदिने निर्णय गरिएको बताइन्। ‘कोभिड-१९ बाट राइडर र प्यासेन्जरलाई सुरक्षित बनाउन प्रोटेक्टिभ गियर, मास्क र स्यानिटाइजरको व्यवस्था गरेका थियौं। अहिले अफलाइन गइदिने समस्या आएपछि सरकारी निकायसँगै समन्वय गरेर हटाएका हौं,’ उनले भनिन्, ‘अब प्रोटेक्टिभ गियर लगाएको पाइए राइडरमाथि कारबाही हुन्छ।’
०००
पठाओले राइडरलाई प्रोटेक्टिभ गियर लगाउन नदिने भनेपछि अर्को प्रश्न उठेको छ। यसअघि पठाओले अनिवार्य लगाउनुपर्ने भन्दै राइडरलाई प्रोटेक्टिभ गियर बेच्यो, अब त्यो पैसा फिर्ता गर्ला त?
‘कोभिड-१९ को जोखिमका कारण त्यो समय प्रोटेक्टिभ गियर अनिवार्य गरिएको थियो, त्यसको दुरूपयोग हुन थालेपछि हटाएका हौं,’ पठाओ नेपालकी मार्केटिङ प्रमुख हमाल भन्छिन्, ‘जहाँसम्म पैसा फिर्ताको सवाल उठेको छ- हामीले राइडरसँग दुई हजार रूपैयाँ लिएका थियौं। पैसा फिर्ता गर्ने भन्ने हुँदैन, तर एकदमै मारमा पर्ने खालका राइडरलाई के-कस्तो सुविधा दिन सकिन्छ भन्नेबारे छलफल भइरहेको छ।’’
नेपालमा दुई पांग्रे सवारीलाई भाडा लिएर यात्रु बोक्न दिने कानुन अहिलेसम्म बनेको छैन। यस विषयमा बहस निरन्तर चल्दै आएको हो। विशेषगरी पठाओजस्ता ‘स्टार्टअप’ व्यवसायलाई करको दायरामा ल्याउने तथा राइडर र यात्रुको दुर्घटना बिमाको सवाल उठ्दै आएका छन्। सरकारले कानुन बनाएर यस्ता सेवालाई नियमन गर्नुपर्ने र कानुनको दायरमा ल्याउनुपर्ने सरोकारवालाहरूको तर्क छ। यसमा काम भइरहेको सरकारी निकायका अधिकारीहरूले बताउँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010467.jpg)
-1786602170.png)
