फाइल तस्बिर।
काठमाडौं- प्रधानमन्त्री केपी शर्मा ओली र जनता समाजवादी पार्टीका नेताहरूबीच छलफल भएको छ। उनीहरूबीच प्रधानमन्त्री निवास बालुवाटारमा मंगलबार बिहान छलफल भएको छ।
छलफलमा जसपाको तर्फबाट गठित कार्यदलले रेशम चौधरीसहितको मुद्दाबारे प्रधानमन्त्री ओलीलाई ‘ब्रिफिङ’ गरेको छ। जसपाले लक्ष्मणलाल कर्ण र सर्वेन्द्रनाथ शुक्ला रहेको कार्यदल बनाएको थियो भने सरकारको तर्फबाट विष्णु पौडेल, सुवास नेम्वाङ र राजन भट्टराई सम्मिलित कार्यदल बनेको थियो।
जसपाका नेता/कार्यकर्ताविरुद्ध रहेका मुद्दाको प्रकृति, जेलमा रहेका कार्यकर्ताका विषयमा अध्ययन गर्न कार्यदल बनेको भनिएको थियो। तर, जसपाकै अध्यक्ष उपेन्द्र यादवसहितका नेताहरूले भने कार्यदलबारे पार्टीलाई कुनै जानकारी नभएको बताउँदै आएका थिए।
जसपाभित्र पूर्वराजपा पक्ष प्रधानमन्त्री ओलीले मुद्दा फिर्ता लिए, रेशम चौधरीको रिहाई गरे र संविधान संशोधन गर्न सहमत भए उनलाई साथ दिने मनस्थितिमा छ भने पूर्वसमाजवादी फोरम पक्ष ओलीविरुद्ध कडा रूपमा प्रस्तुत हुँदै आएको छ।
विकसित पछिल्लो राजनीतिक घटनाक्रममा सत्ता गठबन्धनका लागि निर्णायक मानिएको जसपा अनिर्णित छ। प्रधानमन्त्रीसँगको छलफलमा राजेन्द्र महतो, महन्थ ठाकुर, सर्वेन्द्रनाथ शुक्ला सहभागी थिए। छलफलमा सत्ता गठबन्धनका विषयमा भने कुनै छलफल नभएको नेताहरूले दाबी गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
