फाइल तस्बिर।
काठमाडौं- जनता समाजवादी पार्टी(जसपा)का अध्यक्ष उपेन्द्र यादवले प्रधानमन्त्री केपी शर्मा ओलीसँग सत्ता साझेदारी गर्नै नसकिने बताएका छन्। जसपा कार्यकारिणी समितिको बैठक स्थगित भएपछि सञ्चारकर्मीसँग संक्षिप्त कुरा गर्दै यादवले 'प्रतिगमनकारी ओली'सँग सहकार्य गर्नै नसकिने स्पष्ट पारे।
‘हामी स्पष्ट छौं। यसमा कुनै शंका छैन। ओली जस्ता प्रतिगमनकारी शक्तिका विरुद्ध उभिन्छौं। उनीसँग लगनगाँठो बाध्न सकिँदैन’ यादवले भने, ‘ओलीसँग सति जाने भनेर कसैले प्रस्ताव त ल्याउनु पर्यो ? त्यो प्रस्ताव कसैले ल्याएको छैन। पार्टी कमिटी बाहिर कसले के बोल्यो कसले कसलाई कान फुक्यो भन्ने आधारमा पार्टीले नीति निर्धारण हुँदैन।’ परिस्थिति परिपक्क भएपछि पार्टीले निर्णय गरेर जाने यादवले बताए।
ओलीसँग सहकार्य गरे मधेश आन्दोलनलाई धोका
ओलीसँग दीर्घकालीन सहकार्य गरेर जाँदा मधेश आन्दोलनलाई धोका हुने यादवले टिप्पणी गरे। उनका अनुसार जसपाले ओलीसँग सहयर्का गर्नु भनेको लोकतन्त्रलाई धरापमा पार्नु हो, संघीयतलाई खारेज गर्न सहयोग गर्नु हो। ‘पार्टीले निर्णय गरेर भन्यो ओलीले असंवैधानिक, अलोकतान्त्रिक र प्रतिगमनकारी काम गरे। संघीय गणतन्त्रलाई समाप्त पार्न खोजे संसद भंग गरे। ओलीले क्याबिनेटबाटै निर्णय गरेर संघीय लोकतान्त्रिक गणतन्त्र लेख्न पाइँदैन भन्नेसँग कसरी सहकार्य हुन सक्छ? भनियो’ यादवले प्रश्न गर्दै भने, ‘ओलीसँगको सहकार्यले के संघीयता लोकतान्त्रिक गणतन्त्र बलियो हुन्छ ? के प्रदेशका क्षेत्रधिकार बलिया हुन्छन् ? पहिचानको समस्या समाधान हुन्छ? समानुपातिक समावेशीकरण अझै व्यवस्थित भएर जान्छ ?’ ओलीसँग विगतमा सहकार्य गरेर प्रमाणित भइसकेकाले फेरि मरिहत्य नगर्ने यादवले बताए।
सत्तासाझेदारीका लागि पाँच सदस्यीय कार्यदल बाहेक अन्य कार्यदल बनाएको पार्टीलाई थाहा नभएको यादवले बताए। ‘हामीले पाँच जनाको कार्यदल बनाएका छौं। अर्को कार्यदल थाहा छैन। त्यो पार्टीले बनाएको कार्यदल पनि होइन। पार्टीले निर्णय गरेर बनाएको पाँच शीर्ष नेताहरुको कार्यदल मात्रै हो’ यादवले भने, 'त्यो कार्यदलले प्रधानमन्त्रीसहित कांग्रेस माओवादीसँग एकसरो छलफल गरिसक्यो। अर्को कार्यदलले छलफल गरेको पार्टीलाई थाहा छैन।’
संविधान लेख्दा ओली, देउवा र प्रचण्डले जसपालाई अन्याय गरेकाले उनीहरुलाई प्रतिगमनकारी करार गरेको विषयमा समेत यादवले खण्डन गरे। ‘सबैलाई प्रतिगमनकारी देख्ने सोंच गलत छ। ओली-प्रचण्ड-देउवालाई एउटै खाल्डोमा हाल्न मिल्दैन। सबै मधेशी एउटै हुन, सबै पहाडिया एउटै हुन, सबै पत्रकार एउटै हुन, सबै प्रोफेसर एउटै हुने भन्या जस्तै हो। दुनियाँमा कहिँ यस्तो हुन्छ ?’ यादवले भने, ‘सबैका आ-आफ्ना सोंच, विचार हुन्छन्। आ-आफ्ना विशेषता हुन्छन्। सबै एउटै हुन भन्ने सोच्नु गलत हो।’
प्रतिगमनका विरुद्ध लागेका शक्तिहरु मिलेर निकास दिनुपर्छ
अहिलेको राजनीतिक गतिरोधलाई निकास दिन प्रतिगमनका विरुद्ध लागेका शक्तिहरु एक ठाउँमा उभिउनुपर्ने यादवले बताए। ‘मुलुकलाई निकास दिन प्रतिगमनका विरुद्ध लागेका शक्ति, लोकतान्त्रिक शक्तिहरु र परिवर्तनकारी शक्तिहरु मिलेर मुलुकलाई निकास दिनुपर्छ। परिवर्तनलाई संस्थागत गर्नुपर्छ’ यादवले भने, ‘कांग्रेस प्रमुख प्रतिपक्ष हो। उसको सबैभन्दा धेरै दायित्व हुन्छ। यसको निर्णयले अन्य प्रतिपक्षलाई निर्णय गर्न सहज बनाउँछ।’
जसपाले मात्रै विकल्प दिएर मूर्त रुप नलिने भन्दै यादवले कांग्रेसले सबैभन्दा पहिले निर्णय गरेर जानुपर्ने बताए। ‘हामीले निर्णय गरेर जान सकौंला त्यसले मूर्त रुप लिँदैन। हाम्रो आफ्नै स्ट्रेन्थले कुनै परिणाम ल्याउँदैन। परिणाम ल्याउने नभएपछि निर्णय गरेर मात्रै के गर्ने? त्यसले उहाँहरूको अवसरका लागि खुला राखेका हौ’, यादवले भने।
कांग्रेससहित अन्य प्रतिपक्ष दलहरुबीच समझदारी हुन नसक्दा संकट थपिदै गएको उनको भनाइ छ। आफ्नो पार्टीले परिस्थितिमा स्पष्टता नदेखेकाले कार्यकारिणी समितिको बैठक स्थगित गरेको जसपा अध्यक्ष यादवले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
