काठमाडौं– विभागीय क्लब नेपाल पुलिसले ‘काठमाडौं मेयर्स कप’ क्रिकेट प्रतियोगिताको उपाधि जितेको छ। फाइनलमा सशस्त्र प्रहरी बलको एपीएफलाई आठ विकेटले पराजित गर्दै उपाधि जितेको हो।
शनिबार त्रिवि क्रिकेट मैदानमा भएको फाइनल खेलमा पुलिसले एपीएफलाई स्तब्ध पार्दै उपाधि चुम्यो। १०६ रनको झिनो चुनौती पछ्याउँदै ब्याटिङ गरेको पुलिसले २४. १ ओभरमा दुई विकेटको क्षतिमा लक्ष्य भेटायो। पुलिसको जितमा ओपनर सुनिल धमलाले अर्धशतकीय पारी खेले। उनी ५९ रनमा अविजित रहे। त्यस्तै, कुशल भुर्तेल र अलिकुमार साहले समान १५–१५ रन बनाउँदा दीपेन्द्रसिंह ऐरी ११ रनमा अविजित रहे।
बलिङतर्फ एपीएफका अविनाश बोहरा र भुवन कार्कीले समान १–१ विकेट लिए।
यसअघि टस जितेर पहिले ब्याटिङ गरेको एपीएफले पुलिसलाई झिनो लक्ष्य दिएको हो। २९.४ ओभरमा सबै विकेटको क्षतिमा एपीएफले १०५ रन मात्रै बनायो। एपीएफका कुनै पनि ब्याट्सम्यानले उच्च रन बनाउन सकेनन्।
बसन्त रेग्मीले २२, सन्दीप जोरा र अमरसिंह रौटेलाले समान १८–१८ तथा भुवन कार्कीले १४ रन बनाए। १० रन हुँदा तेस्रो विकेटको रुपमा कप्तान शरद भेषावकर शून्यमै आउट भएपछि एपीएफ दबाबमा आएको थियो।
यसअघि शंकर राना चार र आशिफ शेख शून्यमै आउट भएका थिए। एपीएफका ब्याट्सम्यानले पुलिसविरुद्ध खुलेर खेल्न सकेनन्। पुलिसका गुल्सन झा र सागर ढकालले समान ४–४ विकेट लिए।
उपाधिसँगै पुलिसले पाँच लाख नगद पाउँदा उपविजेतामा चिक्त बुझाएको एपीएफले तीन लाख पाएको छ।
प्रतियाेगिताकाे सर्वाेत्कृष्ट खेलाडी दीपेन्द्र घाेषित भए। त्यस्तै उत्कृष्ट ब्याट्सम्यानमा आर्मीका कप्तान विनेद भण्डारी र उत्कृष्ट बलरमा बागमतीका आरियाे पाैडेल घाेषित भए।
यस्तो रह्यो उपाधि यात्रा
पुलिसले लिग चरणमा भोगेको हारको बदला समेत लिएको छ। लिग चरणमा पुलिसले एपीएफसँग आफ्नो दोस्रो खेलमा एक विकेटको हार ब्यहोरेको थियो।
यसअघि पुलिसले आफ्नो पहिलो खेलमा भने बागमती प्रदेशलाई दुई रनले पराजित गरेको थियो। तेस्रो खेलमा त्रिभुवन आर्मी क्लबलाई तीन विकेटले पराजित गरेको पुलिसले चौथो खेलमा काठमाडौं मेयर्स एघार टिमलाई १०३ रनले हराउँदै फाइनल यात्रा तय गरेको थियो।
पहिलो पटक आयोजना भएको काठमाडौं मेयर्स कपको उपाधि दौडमा पुलिसले लिग चरणको अंक तालिकाको शीर्ष स्थानमा रहँदै फाइनलमा प्रवेश गरेको थियो। पुलिसले चार खेलबाट तीन खेलमा जित र एक खेलमा हारसहित ६ अंक बनायो।
पुलिसलाई उपाधि जिताउन सबै खेलाडीले उतिकै महत्वपूर्ण भूमिका खेले। बलिङमा उत्कृष्ट प्रदर्शन गरेको पुलिसको ब्याटिङ पनि राम्रै देखियो।
विशेषगरी दीपेन्द्रसिंह ऐरी र पवन सर्राफको अलराउण्डर भूमिका रह्यो भने, सुनिल धमला, कुशल भुर्तेल, योगेन्द्रसिंह कार्की लगायतले ब्याटिङमा सन्तोषजनक नै प्रदर्शन गरे। बलिङ, सागर ढकाल, गुल्सन झा र ललितनारायण राजवंशीले किफायति प्रदर्शन गरे।
ब्याट्सम्यान, अलराउण्डर र बलरको समिश्रण प्रदर्शनमा पुलिसले उपाधि चुम्न सफल भयो।
दीपेन्द्र र पवनको शनसनीपूर्ण प्रदर्शन
काठमाडौं मेयर्स कप प्रतियोगिताको उपाधि पुलिसले जित्दा टिमका दुई हिरो सावित भए, दीपन्द्र र पवन। पुलिसले खेलेका लिग चरणका चार खेलमध्ये दुई खेलमा दीपेन्द्र प्लेयर अफ द म्याच घोषित हुँदा पवन पनि दुई पटक नै प्लेयर अफ द म्याच चुनिए।
पहिलो खेलमा बागमतीलाई दुई रनले हराउँदा दीपेन्द्रले चार विकेट लिए। त्यस्तै, एपीएफसँग एक रनले हार्दा पनि दीपेन्द्र उत्कृष्ट खेलाडी सावित भए। उनले शतकसहित १४० रन बनाए। जुन प्रतियोगिताकै पहिलो शतक बन्यो। प्रतियोगितामा दीपेन्द्रले कुल पाँच खेलबट १७६ रन बनाए। जसमा एक शतक र एक अर्धशतक बन्यो।
सर्वाधिक रन बनाउने खेलाडीमा भने आर्मीका कप्तान विनोद भण्डारी रहे। विनोदले चार खेलबाट एक शतकसहित १८४ रन बनाए। त्यस्तै, बलिङतर्फ पनि दीपेन्द्र चम्किए। उनले कुल ८ विकेट लिन सफल भए।
त्यस्तै, एपीएफविरुद्धकै खेलमा ब्याटिङतर्फ ३५ र बलिङतर्फ पवनले पाँच विकेट लिए।
आर्मीविरुद्ध ब्याटिङतर्फ २२ र बलिङमा तीन विकेट लिएका पवन नायक बने। त्यसपछि उनले काठमाडौंलाई पराजित गर्दा पनि चार विकेट लिँदै प्लेयर अफ द म्याच घोषित भएका थिए। ब्याटिङतर्फ ८४ रन बनाएका पवन बलिङमा जमे। उनले सर्वाधिक १३ विकेट लिए। एपीएफविरुद्ध उनले ९ ओभर बलिङ गर्दै पाँच विकेट लिएका थिए।
तीन शतक
काठमाडौं मेयर्स कप क्रिकेट प्रतियोगितामा यो पटक तीन शतक बन्यो। जसमा पहिलो शतक पुलिसका दीपेन्द्रले बनाउँदा दोस्रो शतक बागमती प्रदेशका पारस खड्का र तेस्रो शतक आर्मीका विनोद भण्डारीले बनाए।
दीपेन्द्रले बनाएको शतकमा टिम पुलिस भने एपीएफसँग एक विकेटले हारेको थियो। त्यो खेलमा दीपेन्द्रले १३१ बलमा ११ चौका र ६ छक्का प्रहार गर्दै शतकसहित १४० रन बनाए। जुन प्रतियोगिताकै सर्वाधिक उच्च रन हो।
पारस र विनोदले भने अन्तिम खेलमा एकआपसको टिमविरुद्ध बनाएका थिए। पहिले ब्याटिङ गरेको बागमतीका लागि पारसले शतकसहित उत्कृष्ट ब्याटिङ गर्दै टिमलाई उकासे।
१३३ बलमा ११ चौका र दुई छक्कासहित पारसले ११९ रन बनाएका थिए। जवाफी ब्याटिङ थालेको आर्मीले बागमतीसँग खेल १० रनले हारेपनि विनोदले भने शतक बनाए।
विनोदले पनि शतकसहित ११९ रन नै बनाएका थिए। उनले ११४ बलमा आठ चौका र सात छक्का प्रहार गरे। विनोद प्रतियोगिताकै सर्वाधिक रन बनाउने खेलाडी समेत हुन्।
१२ अर्धशतक
प्रतियोगितामा १२ अर्धशतक बन्यो। जसमा एपीएफका सन्दीप जोराले दुई अर्धशतक बनाए। सन्दीपले पुलिसविरुद्ध ६१ रन बनाए। त्यस्तै, दोस्रो अर्धशतक बनाउने क्रममा उनले काठमाडौं मेयर्स ११ टिमविरुद्ध ६२ रन बनाए। सर्वाधिक रन बनाउने खेलाडीको तेस्रो नम्बरमा रहेका उनले पाँच खेलबाट १६६ रन जोडे।
त्यस्तै, सुनिल धमलाले एपीएफविरुद्ध फाइनल खेलमा अर्धशतक बनाए। उनी फाइनलमा ५९ रनमा अविजित रहे। त्यस्तै, आर्मीका अलराउण्डर सोमपाल कामीले काठमाडौं मेयर्स एघारविरुद्ध अर्धशतक बनाए। उनले ८० रन जोडेका थिए। बागमती प्रदेशका नन्दन यादवले ६० रन बनाए।
एपीएफका आशिफ शेखले ५०, बागमतीका कप्तान ज्ञानेन्द्र मल्लले ५७, एपीएफकै सुमित महर्जनले ६०, पृथु बास्कोटाले ६०, एपीएफका कप्तान शरद भेषावकरले ६१, आर्मीका रोहितकुमार पौडेलले ५६, एपीएफका सुवास खकुरेलले ५० रन बनाउँदै अर्धशतक बनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
