काठमाडौं- राष्ट्रिय महिला लिग फुटबलको उपाधि विजेता टिम एपिएफकी प्रशिक्षक भगवती थापाले आफूहरुले लिग जितेको खुसीमा शतप्रतिशत रमाउन नपाएको बताएकी छिन्। एपिएफकी प्रमुख खेलाडी सावित्रा भण्डारी चोटमा रहेकाले आफूहरुको जितको खुसी छोपिएको उनले बताएकी हुन्।
‘हो, हामीले लिग उपाधि जित्यौँ, तर हाम्रो प्रमुख खेलाडी चोटमा रहकाले उत्सवको माहोल रहेन,’ सावित्राको चोटतर्फ संकेत गर्दै बुधबार विराटनगरसँगको खेलपछि उनले भनिन्। यसअघि नेपाल पुलिस क्लबसँगको खेलका क्रममा सावित्रा चोटमा परेकी थिइन्। उनी लामो समय मैदानबाहिर रहने देखिएको छ।
आफूहरूले विराटनगरविरुद्धको खेलमा पनि सावित्राको कमी महसुस गरेको भन्दै भगवती भन्छिन्, ‘हाम्रो खेलको योजनामा उनी महत्वपूर्ण छिन्, किनभने हाम्रो टिममा अधिकांश गोल उनैले गरेकी छिन्। उनीबिना हामीले आजको खेलमा पनि सोचेको जस्तो खेल्न सकेनौँ।’
प्रशिक्षक भगवती थापा।
बुधबार भएको दोस्रो खेलमा एपिएफले आफ्नो ११औँ खेलमा विराटनगर नगरपालिकालाई १–० ले हराएको हो। बुधबार भएको पहिलो खेलमा नेपाल पुलिस क्लब र त्रिभुवन आर्मी क्लबले बराबरी खेलेपछि एपिएफको उपाधि पक्का भएको थियो।
एपिएफको ११ खेलमा ३३ अंक रहेको छ। आर्मीको ११ खेलमा २६ अंक रहेको छ। यसैले बाँकी खेलअघि एपिएफ विजेता पक्का भएको हो। तेस्रो स्थानमा रहेको विराटनगरको १२ खेलमा १६ अंक रहेको छ। पुलिस क्लबको ११ खेलमा १५ अंक रहेको छ। वालिङको ११ खेलमा १४ अंक रहेको छ। चन्द्रपुरको ११ खेलमा ९ अंक छ। चौदण्डीगढले कुनै अंक जोड्न सकेको छैन।
बुधबार एन्फा कम्प्लेक्सको मैदानमा भएको विराटनगरविरुद्धको खेलमा एपिएफका लागि एक मात्र गोल खेलको ५५औँ मिनेटमा अनिता केसीले गरिन्। एपिएफले अहिलेसम्म खेलेका सबै खेल जितेको छ। अन्तिम खेलमा एपिएफले शुक्रबार त्रिभुवन आर्मी क्लबसँग खेल्नेछ। लिगमा आर्मीको दोस्रो स्थान पक्का भइसकेको छ।
प्रतियोगितामा अब तीन खेल बाँकी छन्। बिहीबार वालिङ नगरपालिका र चन्द्रपुर नगरपालिकाबीच खेल हुनेछ। यस्तै अन्तिम दिन शुक्रबार दुई खेल हुनेछन्। जसमा एन्फा कम्प्लेक्सको मैदानमा बिहान १० बजे चौदण्डीगढी र नेपाल पुलिस क्लब साथै दिउँसो २ बजे दशरथ रंगशालामा एपिएफ र त्रिभुवन आर्मी क्लब खेल्नेछन्। जुन खेलपछि एपिएफलाई उपाधि ट्रफी दिइनेछ।
१० खेलमा सावित्राको ४३ गोल
चोटमा पर्नुअघिसम्म सावित्राले १० खेलमा ४३ गोल गरिसकेकी थिइन्। पहिलो खेलमा सावित्राले चन्द्रपुर नगरपालिकाविरुद्ध नै ह्याट्रिक गोल गरेकी थिइन्। जसमा एपिएफले चन्द्रपुरलाई ६–० गोलअन्तरले पराजित गरेको थियो। त्यस्तै, एपिएफले आफ्नो दोस्रो खेलमा विराटनगर महानगरपालिकालाई ७–० गोलअन्तरले हराउँदा पनि सावित्राले ह्याट्रिक गोल गरेकी थिइन्। विराटनगरविरुद्ध सावित्राले ह्याट्रिकसहित चार गोल गरेकी थिइन्।
तेस्रो खेलमा आर्मीलाई एपिएफले २–० ले हराउँदा भने सावित्रा गोलविहीन बनिन्। तर, त्यो दुवै गोल सावित्राको पासमा भएको थियो। चौथो खेलमा एपिएफले पुलिसलाई ३–० ले हराउँदा पनि सावित्राले ह्याट्रिक पूरा गरेकी थिइन्। उनकै तीन गोलमा पुलिसविरुद्ध एपिएफले सहज जित निकालेको थियो।
पाँचौं खेलमा स्याङ्जाको वालिङ नगरपालिकालाई एपिएफले ३–० गोलअन्तरले हराउँदा सावित्राले दुई गोल गरेकी थिइन्। छैटौं खेलमा चौदण्डीगढीविरुद्ध २२–० को जित निकाल्दा सावित्राले १२ गोल गरेकी थिइन्।
सातौँ खेलमा चौदण्डीगढी नगरपालिकालाई १४–० ले हराउँदा सावित्रा एक्लैले आठ गोल गरेकी थिइन्। आठौँ खेलमा चन्द्रपुर नगरपालिकालाई ८–० ले हराएको खेलमा उनले दोहोरो ह्याट्रिक गरेकी थिइन्। नवौँ खेलमा वालिङविरुद्ध पाँच गोल गरेकी उनले पुलिस क्लबसँग चोट बोकेको दशौँ खेलमा गोल गर्न सकेकी थिइनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1695028531.jpg)
-1786602170.png)
