काठमाडौं- केही दिन यता सामाजिक सञ्जाल फेसबुक, ट्विटरदेखि टिकटकसम्म सपना रोका मगर र विनयजंग बस्नेतबीचको विषय भाइरल भइरहेको छ।
पशुपति आर्यघाटमा बेवारिसे शव जलाएका कारण बिबिसीको विश्वका सय प्रभावशाली महिलाको सूचीमा परेकी रोकामगरविरुद्ध विनयजंग बस्नेतले अश्लील अभिव्यक्ति दिएपछि यो विषय विवादमा तानिएको हो।
विनयजंगसँगै सपनाले पनि पशुपतिमा बेवारिस शव जलाउने काम गरेकी थिइन्। केही समयअघिसम्म उनीहरु 'बाबुछोरी'जस्तै भएको भन्दै अभिव्यक्ति दिन्थे।
तर अहिले 'बाबुछोरी' भनिएका यी दुई जनाको विषय सामाजिक सञ्जाल हुँदै प्रहरीसम्म पुग्ने भएको छ। विनयले विभिन्न युट्युब च्यानलहरुमा सपनाविरुद्धको नकारात्मक अभिव्यक्ति दिएको र उनको चरित्र हत्या गराउने किसिमका अभिव्यक्ति दिएपछि यो विषय प्रहरीसम्म पुगेको हो। विनयले आफूविरुद्ध अभिव्यक्ति दिएपछि सपनाले यो विषय प्रहरीसम्म जानकारी गराएको उनको पारिवारिक स्रोतले नेपाल लाइभलाई जानकारी दियो।
यसबारे महानगरीय प्रहरी परिसर काठमाडौंका एसएसपी अशोक सिंहले अहिलेसम्म मौखिक उजुरी मात्रै आएको बताए। ‘अहिलेसम्म मौखिक उजुरी मात्रै आएको छ। मौखिक उजुरी आएपनि हामीले विनयजंगलाई भने निगरानी सुरु गरिसकेका छौं,’ एसएस्पी सिंहले नेपाल लाइभसँग भने, ‘हिजो र आज दुई दिन सार्वजनिक बिदा भएकाले उजुरी आएन। पीडित पक्ष भोलि जाहेरी दिन आउने कुरा छ।’
विनयजंग अहिले काठमाडौं उपत्यकाभन्दा बाहिर रहेको र उनको निगरानी भइरहेको एसएसपी सिंहको भनाइ छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।