भागरथी हत्या घटनाको अनुसन्धानमा लापरबाही नगर्न कांग्रेस महिला विभागको चेतावनी

राजनीति

नेपाल लाइभ आइतबार, माघ २५, २०७७ १४:२०

काठमाडौं- नेपाली कांग्रेसको महिला विभागले बैतडीकी १७ वर्षीया किशोरी भागरथी भट्टको हत्या घटनाको अनुसन्धानमा कुनै लापरबाही नगर्न चेतावनी दिएको छ। भट्टको बलात्कारपछि हत्या भएको भन्दै विभागले घटनाको निष्पक्ष छानबिन गरी अपराधीलाई हदैसम्मको सजाय गर्न सरकारसँग माग समेत गरेको छ।

अढाई वर्ष पहिले कञ्चनपुरमा बलात्कारपछि हत्या गरिएकी बालिका निर्मला पन्तको हत्यारालाई सरकारले अहिलेसम्म कानूनी कठघरामा उभ्याउन नसकेकाले उस्तै प्रकृतिका घटना बढ्दै गएको विभागकी सचिव लक्ष्मी खतिवडाले आइतबार जारी गरेको विज्ञप्तिमा भनिएको छ।

माघ २१ गते विद्यालयबाट घर फर्किने क्रममा लबलेक सामुदायिक वनको झाडीमा मृत फेला परेकी भागरथीको परिवारलाई उचित क्षतिपूर्ति पनि विभागले माग गरेको छ।

घटनाको सत्यतथ्य पत्ता लगाई पीडितलाई न्याय दिलाउन खबरदारीका निम्ति नेपाली कांग्रेस जिल्ला कार्यसमिति बैतडीसँग समन्वय गरी स्थलगत अवलोकनसहित आवश्यक कार्य गर्ने गरी केन्द्रीय महिला विभागका सदस्य राधिका सिहंलाई खटाएको छ।

किशोरी भागरथीको बलात्कारपछि हत्या गरिएको आशंका गरिएपनि पोस्टमार्टम रिपोर्ट आइनसकेकाले यकिन नभएको प्रहरीले जनाएको छ। घटना अनुसन्धानका लागि प्रहरीको केन्द्रीय अनुसन्धान ब्युरो र सुदूरपश्चिम प्रदेश प्रहरी कार्यालयको छुट्टाछुट्टै टोली परिचालन गरिएको छ।

बुधबार विद्यालय गएकी भागरथी घर नफर्किएपछि खोजी तीब्र पारिएको थियो। उनको शव भोलिपल्ट बिहीबार विभत्स तवरले हत्या गरिएको अवस्थामा लबलेक जंगलमा फेला परेको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

प्रधानमन्‍त्री ओलीका बुवा अस्पताल भर्ना, फोक्सोमा समस्या

धरहरा चढ्न विद्यार्थी, ज्येष्ठ नागरिक र अपांगता भएका व्यक्तिलाई ५० प्रतिशत छुट

मानव बेचबिखन गर्न लागेको आरोपमा एक जना पक्राउ