काठमाडाैं-‘एभरेष्ट मःमः र नेपाली फिल्म उस्तै हो, मिठो भए खाइन्छ, नमिठो भए खाइन्न। सगरमाथाको नाममा छ भन्दैमा खानैपर्छ भन्न मिल्दैन’
यो भनाइ हो युट्युबर तथा हाँस्य कलाकार विशाल गौतमको। ६ महिनाअघिको उनको यो भनाइ ‘नेपाली फिल्म र राष्ट्रियता’ बहससँग मिल्न पुगेको छ।
सबप्लटको तालमेल नमिलेको, द्वन्द्व स्पस्ट नभएको फिल्म ‘एउटा यस्तो प्रेम कहानी’ अहिले हलमा लागिरहेको छ। निर्देशकले के कथा भन्न खोजे भन्ने प्रष्ट छैन। फिल्मको डबिङ र लिपसिंकसमेत मिलेको छैन।
पटकथा, संवादमात्रै हैन प्राविधिक पक्षसमेत निकै कमजोर भएको नेपाली फिल्म बलिउड ब्लकबस्टर ‘मास्टर’ सँग जुधेको छ। कतिपयले यसलाई बाघ र बाख्रा एकै खोरमा थुनेको प्रतिक्रिया पनि दिइरहेका छन्।
कमजोर फिल्म भएकाले दर्शकले नेपाली फिल्मलाई बेवास्ता गर्दै विदेशी फिल्मलाई साथ दिइरहेका छन्। योसँगै फेरि राष्ट्रप्रेम र नेपाली फिल्मको कुरा बहसमा आएको छ।
के भन्छन् दर्शक ?
सोमबार सुन्धारास्थित सिने डि भिल्ला हलमा पुग्दा टिकट काउन्टर सुनसान थियो। नेपालका अन्य हलहरुको तुलनामा महंगो यो हलमा कोही दर्शक फेला नपरेपछि नजिकै रहेको क्युएफएक्समा नेपाललाइभ पुग्यो।
त्यहाँ केही जोडी दर्शक भेटिए जो दक्षिण भारतीय फिल्म मास्टर हेर्न हल पुगेका थिए। नेपाली फिल्म किन नहेरेको भन्ने प्रश्नमा बखुन्डोलका सुरेश रेग्मीले भने, ‘नेपाली फिल्म हेर्न लायककै छैन । त्यसैमाथि फिल्मको ट्रेलर हेरेरै वैराग लाग्यो।’
सुरेशका अनुसार उनी फिल्मप्रेमी मानिस हुन्। लकडाउनको समयमा घरमा बसेर उनले धेरै फिल्म र सिरिजहरु हेरे। भने, ‘नेटफ्लिक्समा विदेशका अवार्डविजेता फिल्म हेरेर समय बिताएँ, मास्टर भने हलमै हेर्ने चाहना थियो।’
मास्टर हेर्न हल पुगेकी स्वस्तिका सिंहले पनि नेपाली फिल्म मनै नपर्ने प्रतिक्रिया दिईन्। उनले भनिन्, ‘नेपाली फिल्मका कलाकारलाई अभिनय गर्नै आउँदैन। उनका अनुसार जे काम गर्छु भनेर उनीहरुले आफूलाई चिनाइरहेका छन्, त्यो बाहेकका काममात्रै उनीहरुलाई आउँछ।
नेपाली फिल्म क्षेत्रलाई चलायमान बनाउन त नेपाली फिल्म हेरिदिनुपर्छ भन्छन् नि भन्ने जिज्ञासामा सिंहले भनिन्, ‘पैसा तिरेर टर्चर किन्ने हैन, मनोरञ्जन लिने हो।’
कुरा सुनिरहेका अर्का दर्शक कमल सिंहले थपे, ‘कतिपयले हिन्दी फिल्म हेरेर पैसा भारतमा पठाएको, देशलाई माया नगरेको भन्छन् तर कलाको कुरामा देशप्रेमको कुरा कसरी आयो?’
उनले आक्रोशित हुँदै भने, ‘फेसन र सपिङका कुरा गर्नेबित्तिकै नेपालका नायक नायिकाले विदेशी ब्राण्डका कुरा गर्छन्, विदेश घुम्न गएका बेला नेपालमा खासै सपिङ नगर्ने बताइरहँदा उनीहरुको अनुहार धपक्क बलेको हुन्छ। अनि हामीले विदेशी फिल्म हेर्दाचाहिँ राष्ट्रविरोधी हुने भन्ने कुरा कसरी आयो?’
उनले राम्रा फिल्म बने नेपाली फिल्म नै हेर्ने बताए। ‘नेपालमा बनेका राम्रा फिल्म नछुटाई हेर्छु तर पुरानै ढर्रामा बनाएका फिल्म ठीक लाग्दैन,’ उनले भने।
नेपाली भएकै कारण झुर नेपाली फिल्म हेरिदिएर देशभक्त नागरिक बन्न नपरेको पनि उनले बताए ।
फिल्म निर्माताहरुको दुखेसो
यता फिल्म निर्माण गर्नेहरु भने निकै आक्रोसित छन्। वितरक र संञ्चारकर्मीले साथ नदिएको उनीहरुको आरोप छ।
एउटा यस्तो प्रेम कहानीको वितरणको जिम्मा लिएको एफडी कम्पनीका प्रमुख सुशील पोखरेलले हलवालाले नेपाली फिल्मलाई साथ नदिएको आरोप लगाए।
केही दिनअघि सामाजिक सञ्जालमा लामो स्ट्याटस लेख्दै उनले मोफसलका हलहरुमा नेपाली फिल्म नपुर्याइदिएको आरोप लगाएका थिए। उनले लेखेका थिए, ‘सर्भरवालाले हिन्दी फिल्म मास्टरलाई कुरेर बसे, त्यसैले मोफसलमा फिल्मको हार्डडिक्स र फिल्म पुगेन।’ उनले उक्त स्ट्याटस अहिले भने हटाइसकेका छन्।
त्यसो त उनले फिल्म लाग्नुअघि सबैले हलमा गएर, टिकट काटिदिएर, चलचित्र हेरिदिएर, यो क्षेत्रलाई चलायमान बनाउन आग्रह गरेका थिए। जसमा सम्पूर्ण कलाकर्मीको साथ र समर्थन थियो। तर फिल्म लाग्दा समर्थन जनाउने कोही कलाकार हल पुगेनन्।
हलवाला भन्छन्–दर्शक बिच्काउन भएन
लामो समयको बन्दपछि बल्ल सरकारले हल खोल्ने अनुमति दियो। त्यसो त, हल खोल्ने अनुमति नदिए पनि हलवाला तात्तिएर पहिल्यै सञ्चालनमा ल्याएका थिए। तर निर्माताले नयाँ फिल्म हलमा नदिँदा पुरानै फिल्म देखाउनुपरेको थियो।
खडेरीको समयमा एक थोपा पानी नै सही, अभिनेता शिव श्रेष्ठले फिल्म प्रदर्शनको मिति तय गर्नेबित्तिकै हलवाला जुर्मुराए । चलचित्र संघका अध्यक्षसमेत रहेका मधुसुदन प्रधानले त सार्वजनिक स्थानमा भाषण गर्दै भनेका थिए– रिलको मात्रै हैन रियल हिरो शिव नेपाली फिल्मका लागि भगवान हुन्।
जब सरकारले हल खोल्ने अनुमति दियो, वितरकले लाखौं खर्चेर दक्षिण भारतीय फिल्म किने।
यसबारे क्युएफएक्सका एक कर्मचारीले भने–नेपाली फिल्मले झनै दर्शक बिच्काउने भए, बाध्य भएर हिन्दी फिल्म किन्नुपर्यो।’
उनका अनुसार फुर्सदको समयमा विदेशी फिल्मको लत बसेका नेपाली दर्शकलाई कमजोर फिल्मले झनै बिच्काउँछ। आफूहरुले मनोरञ्जन क्षेत्रको भविष्य सोचेरै हिन्दी फिल्म प्रदर्शनमा ल्याएको उनको ठहर छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768288990.png)
-1768271809.png)
-1764146706.png)
