इजलासमा प्रश्न- क्याबिनेटको फाइल आयो कि आएन? प्रधानन्यायाधीशको जवाफ- आएर फर्काइसकियो

राजनीति

इजलासमा प्रश्न- क्याबिनेटको फाइल आयो कि आएन? प्रधानन्यायाधीशको जवाफ- आएर फर्काइसकियो

नेपाल लाइभ शुक्रबार, माघ २, २०७७, १५:५५

काठमाडौं- प्रतिनिधि सभा विघटनविरुद्धको मुद्दामा रिट निवेदकका तर्फबाट बहस गर्दै वरिष्ठ अधिवक्ता रमण श्रेष्ठले प्रतिनिधि सभा विघटन गर्न राष्ट्रपतिलाई सिफारिस गरिएको मन्त्रिपरिषद् बैठकको निर्णयबारे जानकारी माग गरेका छन्। प्रतिनिधि सभा विघटनको निर्णय भएको मन्त्रिपरिषद्‍ बैठकको निर्णय फाइल आए/नआएको बारे उनले जानकारी मागेका हुन्। शुक्रबार संवैधानिक इजलासमा भएको बहसमा सहभागी भएका श्रेष्ठ यस्तो जानकारी इजलाससमक्ष मागेका हुन्।

'क्याबिनेटको फाइल आएको छ कि छैन? यो विषयमा जानकारी हुनुपर्‍यो,' उनले भनेका थिए। श्रेष्ठले क्याबिनेटको फाइलबारे जिज्ञासा राखेपछि प्रधानन्यायाधीश चोलेन्द्र शमशेर राणाले क्याबिनेटबाट निर्णयको फाइल आएको र फर्काइएको समेत जानकारी गराएका थिए।

मन्त्रिपरिषद् बैठकको निर्णयमा संविधानको धारा उल्लेख नै नगरी संसद् विघटन गरेको उल्लेख गरिएको तर, राष्ट्रपतिले संविधानको धारा उल्लेख गरी प्रतिनिधिसभा विघटन गरेको भन्दै उनले प्रश्न उठाएका थिए। 'सिफारिमा नै नभएको धारा राष्ट्रपतिले उल्लेख गर्न कसरी मिल्छ?,' उनको प्रश्न थियो।