लाभांश समायोजनपछि सेयर किन्न कति उचित ? यस्तो छ प्राविधिक विश्लेषण

बैंक/बिमा/सेयर

अरुण सापकोटा शनिबार, पुस १८, २०७७ ०९:५९

काठमाडौं–बुलिस ट्रेण्डमा रहेको दोस्रो बजारमा समायोजनपछि सस्तिएको मूल्यमा सेयर किन्ने होडबाजी सुरु भएको छ। सिभिल बैंकबाहेक सम्पूर्ण सूचीकृत वाणिज्य बैंकहरुले लाभांश घोषणा गरिसके। कतिपयले लाभांश वितरण गरिसके। अर्कोतर्फ नेपाल इन्भेष्टमेन्ट बैंकको बाहेक सबैको बुक क्लोज भैसकेको छ।

दोस्रो बजारमा सबैभन्दा धेरै महंगा वाणिज्य बैंकको सेयर घट्ने दाउमा रहेका लगानीकर्ताले मौका छोपेका छन्। नविल बैंक, एभरेष्ट बैंक, स्ट्याण्डर्ड चार्टर्ड, हिमालयन, एनएमबी र नेपाल एसविआई बैंकको सस्तिएको मूल्यमा सेयर किन्ने होडबाजीजस्तै देखियो। यी वाणिज्य बैंकको सेयर मूल्य बढ्न थालेपछि अत्याधिक मात्रामा बढ्छन्।

नेप्से सूचक २१ सय पुग्नै लाग्दा पनि वाणिज्य बैंकहरुको सेयर मूल्यमा खासै सुधार देखिँदैन। एक वर्ष अवधिमा एक हजार अंकको हाराहारीमा रहेको वाणिज्य बैंकको सूचक १५ सय पुगेको छ। जबकि नेप्से सूचक एक वर्ष अवधिमा ११ सयको अंकबाट २१ सय अंक पुग्न लागिसक्यो। त्यसैले गर्दा लगानीकर्ता वाणिज्य बैंकको सेयरमा दाउ खोजेर बसिरहेका छन्।

बुक क्लोजपछि समायोजन भएको मूल्य सस्तो हुने भएकाले अहिलेको ट्रेण्डमा लगानीकर्ताको बढी आकर्षण देखिएको बजार विश्लेषकहरु बताउछन्। कम्पनीको सेयर मंहगो लाग्ने लगानीकर्ताले सस्तिएको भन्दै किन्न सुरु गरेको बजार विश्लेषक सुरज अधिकारी बताउछन्।

अहिले घोषणा भएको बोनस सेयर भोलिका दिनमा सप्लाइ आउदा बजार घट्ने सम्भावना पनि उत्तिकै रहन्छ। यसअघि नेपाल राष्ट्र बैंक र बिमा समितिले पुँजीवृद्धि गर्दा सेयर बजारमा उछाल आएको थियो। तर दोस्रो बजारमा अत्याधिक सप्लाइ आउदा भारी गिरावट भयो।

अहिले पनि राष्ट्र बैंकले वाणिज्य बैंकहरुलाई बोनस सेयर वितरण गर्न दबाब दिइरहेको छ। अहिले तत्कालका लागि कम्पनीको मूल्य बढाउन भूमिका खेले पनि भोलिका दिनमा सप्लाइ आउन थालेसँगै पुनः घटाउन यसको प्रमुख भूमिका हुन सक्ने विश्लेषकहरु बताउछन्।

अर्कोतर्फ सेयर संख्या बढ्दैमा सप्लाइ मात्रै बढ्छ भन्नुभन्दा पनि भोलिका दिनमा डिमाण्ड साइड पनि बलियो भयो भने खासै असर नगर्ने अधिकारीको विश्लेषण छ। अहिलेकै अवस्थामा बैंकको व्याजदर घटेको छ। मानिसहरुसँग लगानी गर्ने पैसा छ। बैकहरुले आधार व्याजदरसँगै सर्वसाधारणको निक्षेपको व्याजदर पनि घटाइरहेका छन्। अझै केही समय कर्जाको व्याजदर बढ्ने सम्भावना धेरै कम छ।

बजारलाई सपोर्ट गर्ने अर्को आधार भनेको बजारको ट्रेण्ड पनि हो। बजार बुलिस ट्रेण्डमा छ। यहीकारण लगानीकर्ताहरुले समायोजन भएपछि सस्तिएको मूल्यमा किन्ने ट्रेण्ड पनि बढेको अर्का बजार विश्लेषक अरुण लामा बताउछन्। बुलिस ट्रेण्डको मनोविज्ञानले गर्दा जतिसुकै धेरै सप्लाइ आउदा पनि लगानीकर्ताहरुले किनिरहेका छन्। त्यसैले गर्दा उनीहरु अझै बजारबाट उचित लाभ लिन सकिन्छ भन्ने विश्लेषण गरिरहेका छन्।

तर बैंकिङ क्षेत्र अहिलेकै जस्तै नरहन सक्छ। बैंकहरुले साधारणसभा गरेर प्रस्तावित बोनस सेयर सूचीकृत गर्न वैशाख जेठसम्म लगाउछन्। त्यसपछि बैंकिङ कर्जा तथा व्याजदर बढ्न थाल्यो भने पुनः दोस्रो बजार प्रभावित हुने सम्भावना पनि उत्तिकै रहन्छ। त्यसैले बोनस सेयर सूचीकृत हुने बेलासम्ममा बेचिसक्ने लगानीकर्ताले भने अहिले किनेको सेयरबाट उचित लाभ लिन सक्ने विश्लेषकहरु बताउछन्।

पछिल्लो समय दोस्रो बजार दुई वटा विन्दुको रेन्जमा चलिरहेको बजार विश्लेषक अरुण लामा बताउछन्। उनका अनुसार दोस्रो बजार माथिल्लो विन्दु २१ सय र तल्लो विन्दु १९३० को रेन्जमा चलिरहेको छ। बजारले जुन विन्दुलाई तोडेर अगाडि जान्छ त्यही दिशामा अगाडि बढ्ने लामाको विश्लेषण छ। यदि बजार १९३० को विन्दुबाट तल झ¥यो भने १८ सय १७ सयसम्म तल झर्न सक्ने छ। यदि २१ सय ब्रेक ग¥यो भने २२ सय, २३ सयको अर्को नयाँ टार्गेट लिन सक्ने उनले विश्लेषण गरे।

यस साताको कारोबारलाई हेर्दा बजारले २१ सयको विन्दुलाई तोड्न खोजेको थियो। तर तल नै बस्यो। अहिलेसम्म लगातार चार पटक २१ सयको लाइनलाई तोड्न खोजिसके पनि सकेको छैन। प्राविधिक विश्लेषकहरुका अनुसार यदि बजारले एउटा विन्दुलाई तोड्न लगातार प्रयास गर्दा पनि सकेन भने उल्टो दिशामा जान्छ भन्ने सिद्धान्त रहेको छ। २१ सयको लाइनलाई मनोवैज्ञानिक रुपमा सबल पक्ष मानिएको छ। त्यसैले गर्दा जुन विन्दुलाई बजारले तोड्न सक्छ त्यही दिशामा बजार अगाडि बढ्छ।

बजार सुधार हुने अन्य सैद्धान्तिक आधार धेरै छन्। बैंकिङ व्याजदर, राजनीतिक घटनाक्रम र चक्रको असर अझै बाँकी छ। तर बजार जुन हिसाबले अगाडि बढेको छ यसमा करेक्सन पनि आवस्यक छ। गएका दिनमा ह्वात्तै बढेको बजार केही समय रोकिनुमा राजनीतिक अस्थिरतालगायतका कारणले भएकाले केही समय बजार तलै रहने हो कि भन्ने विश्लेषण गर्न सकिने लामा बताउछन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।