काठमाडौं–प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले संसद विघटन गरेकै दिन आइतबार ९७ अंकले ओरालो झरेको शेयर बजार साताको अन्तिम दिनसम्म बराबरजस्तै भएको छ। गत साताको क्लोजिङ सूचक र यस साताको क्लोजिङ सूचक बराबर रहेको छ।
संसद विघटनपछि अन्योल हुने हल्लाले ओरालो झरेको शेयर बजार प्रधानमन्त्रीको संवोधनपछि सुधार भएको थियो। संसद विघटनसँगै आगामी वैशाखमा आमचुनाव गर्ने भनिएको छ। अहिलेको परिस्थितिमा कम्युनिष्ट सरकारको दबदबा रहेकोमा बैशाखपछि नेपाली कांग्रेस शक्तिमा आउने विश्लेषणसँगै दोस्रो बजारमा पुनः उछाल आएको हो। आइतबार ९७ अंकको गिरावट भएकोमा बुधबार नेप्से सूचक २०६८ अंकसम्म पुगेको थियो।
बिहीबार लगानीकर्ताले नाफा बुक गर्न खोज्दा पुन २९ अंकको गिरावट आएको थियो। आगामी साता १५ वटाभन्दा धेरै वाणिज्य बैंकको बुक क्लोज रहेको छ। नाफा बुक गर्न खोज्दा केही तल झरे पनि बुक क्लोजपछि घटेको मूल्यमा शेयर किन्ने लगानीकर्ता हाबी हुने भएकाले यस साता पनि नेप्से सूचक सुधार हुने विश्लेषण गरिएको छ।
अर्कोतर्फ नेपाल राष्ट्र बैंकले बिहीबार ५० अर्ब रुपैयाँको रिभर्स रिपो जारी गरेको छ। यो बजारमा अधिकतम तरलता रहेको संकेत हो। अबको तीन महिना कम्तिमा पनि कर्जाको व्याजदर बढ्ने देखिँदैन। यो शेयर बजार लगानीकर्ताका लागि राम्रो हो। बैंकमा पैसा जम्मा गर्दा थोरै मात्रै व्याजदर पाइने भएकाले शेयरधनीको आकर्षण शेयरमा केन्द्रित हुन्छ।
वाणिज्य बैंकहरुले मुद्दती निक्षेप तथा साधारण निक्षेपको व्याजदर घटाउन थालेका छन्। नेपाल राष्ट्र बैंकले मुद्दती निक्षेप र साधारण निक्षेपको अन्तर ५ प्रतिशतभन्दा तल हुन नहुने निर्देशन दिएको छ। वाणिज्य बैंकले साधारण निक्षेपको व्याजदर घटाउँदा निक्षेपकर्ताले पाउने व्याजदर धेरै कम हुन्छ। यसले गर्दा उनीहरुले बैंकमा पैसा जम्मा गर्नुभन्दा शेयर बजारलगायत अन्य क्षेत्रमा लगानी गर्न थाल्छन्। यहीकारण अझै केही समय दोस्रो बजारमा बैंकिङ तरलताको प्रभाव रहने र दोस्रो बजारले नयाँ उचाइ बनाइरहने देखिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
