सप्तरी- सप्तरीको डाक्नेश्वरी नगरपालिका–३ तरहिस्थित मुखिया टोलमा भएको आगलागीमा ६ घर जलेर नष्ट भएका छन्। स्थानीय बतही देवी मुखियाको घरबाट सुरु भएको आगो सल्केर राजकुमार मुखिया, रामरुप मुखिया, नरेश मुखिया, राज मुखिया र मुकेश कुमार मुखियाको घर बिहीबार दिउँसो जलेर नष्ट भएको जिल्ला प्रहरी कार्यलयले जनाएको छ।
सो आगलागीबाट घरमा रहेको सरसामान विभिन्न, खाद्यन्न, लत्ताकपडा, गरगहना लगायत जलेर नष्ट भएको छ। आगलागीमा करिब १४ लाख रुपैयाँ बराबरको धनमाल जलेर नष्ट भएको ईलाका प्रहरी कार्यालय पातोले जनाएको छ।
केटाकेटीले पड्काएको पटाकाले आगलागी भएको प्रहरीको भनाइ छ। आगलागी स्थानीय बासिन्दा र प्रहरीको सहयोगमा नियन्त्रणमा लिइएको थियो।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।